Xalid Kərimli: “Bu, onu göstərir ki, tərəflər ardıcıl olaraq biznes əlaqələrinin genişlənməsində maraqlıdırlar”
Məlum olduğu kimi, Azərbaycan ilə Almaniya arasında iqtisadi əməkdaşlıq yeni mərhələyə qədəm qoyur. Prezident İlham Əliyev və Almaniya kansleri Fridrix Mertsin mətbuata birgə bəyanatlarında diqqət çəkən əsas məqamlardan biri Azərbaycan-Almaniya Biznes Şurasının yaradılması oldu.
Maraqlıdır, bəs yeni qurum praktik müstəvidə hansı imkanları yaradacaq? Bu platforma Azərbaycan iqtisadiyyatına hansı dividentləri qazandıra bilər?
Sözügedən məsələyə aydınlıq gətirən iqtisadçı Xalid Kərimli baki-xeber.com-a açıqlamasında bildirdi ki, Almaniya dünyanın ən böyük 5 iqtisadiyyatından biridir: “O cümlədən, Avropa İttifaqının əsas iqtisadi gücü və mərkəzidir. Bu ölkə həm texnoloji, həm də sənaye məhsullarının ixracında dünya liderlərindən biridir. Azərbaycanın Almaniya ilə münasibətlərinin artıq strateji səviyyəyə çatması və fəaliyyət istiqaməti ilə bağlı birgə bəyannamənin imzalanması, iki ölkə arasında iqtisadi Biznes Şurasının yaradılması onu göstərir ki, dövlətlər artıq bunda maraqlıdır. Yəni dövlətlər artıq ayrı-ayrı layihələr, ayrı-ayrı hadisələr zəminində əlaqələrin bundan sonrakı inkişafını yox, daha çox planlaşdırılmış dayanıqlı və qarşılıqlı faydaya əsaslanan inkişafda maraqlıdılar. Azərbaycan Avropa İttifaqının bir sıra ölkələri ilə strateji tərəfdaşlıq barəsində sənədlər imzalayıb. Xüsusən də Almaniya ilə bu istiqamətdə imzalanan sənədlər ölkəmiz üçün yaxşı perspektivlər vəd edir. Nəzərə almaq lazımdır ki, son illərdə baş verən proseslər Azərbaycanın Avropa və Almaniya üçün önəmini daha da artırıb. Azərbaycan 2022-ci ildə Avropa Komissiyası ilə imzaladığı memorandiumda Avropaya daha çox qaz ixrac etmək barədə razılaşmışdıq. Lakin Avropa institutlarının, maliyyə qurumlarının bu memoranduma soyuq yanaşması ona gətirib çıxartdı ki, 4 il vaxt keçməsinə baxmayaraq, qaz təchizatının artırılması məsələsi hələ öz həllini tapmayıb. Məsələ ondadır ki, Azərbaycan Cənub Qaz Dəhlizinin potensialından tam istifadə edir. Həm TANAP, həm TAP layihəsi üzrə maksimal güc nədir ondan istifadə edərək Avropaya qaz satır. Avropaya qaz ixracını artırmaq üçün CQD-ni genişləndirmək lazımdır. Bunun üçün isə Avropa maliyyə qurumlarının, ölkələrinin iştirakçılığı vacibdir. Yəni Avropa maliyyə qurumlarının layihəni maliyyələşdirməsi, Avropa dövlətlərinin isə uzunmüddətli qaz alışı müqavilələri imzalaması lazımdır. Çünki CQD-nin ötürmə gücünün artırılması məhz təyinatlıdır. Bu, o halda mümkün ola bilər ki, Avropa maliyyə qurumları və ölkələri konkret olaraq maliyyələşmədə, alış öhdəliklərində pay almış olsunlar. Məhz burda baş verən proseslər layihənin genişləndirilməsinə bir qədər mane oldu. Ancaq son dövrlər həm Ursula Fon der Lyayenin Bakıya səfəri, həm Azərbaycanla Almaniya arasında birgə Bəyannamə işə təkan verə bilər. Xüsusən yaşıl enerji sahəsində əlaqələrin genişləndirilməsi sahəsində addımlar bu istiqamətdə tədbirlərin genişlənəcəyini göstərir. Çünki Almaniya Avropanın maliyyə qurumlarında əsas söz sahibidir. Almaniyanın bununla bağlı səy göstərməsi bu istiqamətdə real addımların atılmasına gətirib çıxaracaq”.
X. Kərimli onu da qeyd etdi ki, iki ölkə arasında əlaqələrin genişləndirilməsinin böyük perspektivi və potensialı mövcuddur: “Həm enerji, həm sənaye sahələrində, həm də rəqəmsal platformaların inkişaf etdirilməsi, qeyri-iqtisadi sahələrdə böyük əməkdaşlıq potensialı mövcuddur. Ölkəmizin Almaniya kimi bir dövlətlə yaxşı iqtisadi əlaqələr qurması Azərbaycanın sənayesinin, iqtisadiyyatının modernləşdirilməsinə də mühüm töhfə verəcək. Böyük Britaniyadan sonra Almaniya ilə əlaqələrin daha da inkişaf etdirilməsi ölkəmizin birbaşa maraqlarına uyğundur. Biznes Şurasının yaradılması onu göstərir ki, tərəflər ardıcıl olaraq biznes əlaqələrinin genişlənməsində maraqlıdılar. Şura biznes əlaqələrində ortaya çıxan problemlərin operativ həllinə kömək edəcək. Eyni zamanda alman investorlarının Azərbaycan iqtisadiyyatına yatırımını genişləndirəcək”.
Vidadi ORDAHALLI
