Azər Allahverənov: “Nəqliyyat-logistika layihələrində Almaniya şirkətlərinin geniş iştirakı üçün böyük potensial var”
“Bağlantılarla və tranzit imkanları ilə bağlı da Azərbaycan-Almaniya əməkdaşlığının çox böyük əhəmiyyəti var”. Bunu Prezident İlham Əliyev Almaniyanın Federal Kansleri Fridrix Merts ilə mətbuat konfransında deyib.
Daha sonra dövlət başçısı bunları qeyd edib: “Çünki Almaniya şirkətləri bu istiqamətdə çox böyük uğurlar əldə edib. Azərbaycan öz nəqliyyat infrastrukturunu təkmilləşdirir. Keçən il Orta Asiya məşvərət formatına tamhüquqlu üzv olmaqla, Azərbaycan bir növ Orta Asiya ilə Avropa arasında körpü rolunu oynayır və bu rol getdikcə artacaqdır. Bir çox istiqamətlər üzrə konkret fəaliyyət planı nəzərdə tutulur. Bu gün imzalanmış Bəyannamənin icrası ilə bağlı fikir mübadiləsi əsnasında konkret təkliflər irəli sürülmüşdür. Bir neçə işçi qrup yaradılacaq ki, bu gün imzalanmış sənədlər tezliklə həyatda öz əksini tapsın”.
Sözügedən məsələni baki-xeber.com-a şərh edən millət vəkili Azər Allahverənovun fikrincə, Prezident Əliyevin Almaniyaya səfəri zamanı mətbuat konfransında səsləndirdiyi fikirlər bütövlükdə iki ölkə arasında strateji tərəfdaşlığın bir neçə vacib sütunlar üzərindən daha da inkişaf etdirilməsinə xidmət edir: “Nəticə etibarı ilə iki ölkə arasında olan əlaqələrin yeni bir mərhələyə keçidini təmin edə biləcək çox vacib bir naliyyətdir. O baxımdan ki, bu günə qədər Azərbaycanla Almaniya arasında münasibətlər kifayət qədər sabit inkişaf dinamikasına malikdir. O üzdən, biz zaman-zaman bu dinamikanın artdığını görürük. Müəyyən elementlər üzərindən də belə, biz daha da dolğunlaşaraq, zənginləşərək münasibətlərin yeni bir müstəviyə keçidinin baş verdiyini müşahidə edirik. Bu son illər Azərbaycanla Almaniya arasında enerji sahəsindəki fəaliyyətlərdə özünü göstərir. Xüsusilə də Azərbaycanın təbii qazının Almaniyaya ixrac edilməsi və 10 il ərzində bunun artırılması önəmli məqamdır. Yəni iki ölkə arasında əsas daşıyıcı element enerji sahəsində əməkdaşlıqdır. Ancaq digər çox vacib sahə beynəlxalq yükdaşımalar, nəqliyyat-logistika sahəsidir. Burada da Almaniyanın iştirakı artıq Strateji Tərəfdaşlıq Bəyannaməsində öz əksini tapıb. Mərkəzi Asiya ilə Avropanı birləşdirəcək nəqliyyat-logistika layihələri Cənubi Qafqaz üzərindən qurulacaq. Burada da açar dövlət Azərbaycandır. Bu proseslərdə Almaniya şirkətlərinin geniş iştirakı üçün böyük potensial var. Nəzərə almaq lazımdır ki, Almaniya-Çin əlaqələrində çox ciddi əmtəə mübadiləsi özünü biruzə verməkdədir. Çin məhsullarının Almaniyaya ixracı ildən ilə artır. Ukrayna müharibəsi səbəbindən Rusiya üzərindən keşən Şimal dəhlizi tam funksional deyil. O üzdən, Orta Dəhliz üzərindən daşımaların həcmi artır. Nəticədə Orta dəhlizin geosiyasi əhəmiyyətinin artdığını görmüş oluruq. Almaniya hökuməti də bu məqama xüsusi diqqət yetirir. Bunun nəticəsidir ki, son 1 il ərzində Almaniya ilə Azərbaycan siyasi rəhbərlikləri arasında təmaslar artıb. Tərəflər arasında kifayət qədər dost münasibətlərinin olması yeni imkanlar yaradır. Bütün bunlar Almaniyanın bu prosesdə yaxından iştirakını şərtləndirir. Həm yükdaşımaların artmasında Almaniya amilinin artmasına gətirib çıxarır, həm də digər sahələrdə əməkdaşlığa stimul verir. Bütün bunlar Almaniya şirkətlərinin infrastruktur layihələrinin iştirakını şərtləndirən amildir”.
Vidadi ORDAHALLI
