Abutalıb Səmədov: “Əslində, Trampın o missiyadan imtina etmək şansı yoxdur”
Amerika Dövlət katibi Marko Rubio bildirib ki, ABŞ özünü Ukraynadakı münaqişəyə son qoya bilən yeganə ölkə hesab edir. Rubio Manilada jurnalistlərə "Biz inanırıq ki, hazırda və düşünürəm ki, ruslar da razılaşacaqlar ki, biz dünyada bu (konstruktiv) rolu oynaya və buna son qoymağa çalışa bilən yeganə ölkəyik”-deyə bildirib.
Burada maraqlı bir məsələ var. Çünki az müddət əvvəl ABŞ bəyan etmişdi ki, Rusiya və Ukrayna arasında vasitəçilikdən imtina edir. ABŞ tərəf “əgər görsək ki, bizim vasitəçiliyimiz konkret bir nəticə verə bilər, o halda yenidən qayıda bilərik”-deyə bildirib.
ABŞ-ın əvvəlki bəyanatı hara, Rubionun dedikləri hara? Bəs nə oldu ki, indi də Rubio “yalnız biz həll edə bilərik” deyir? Bu ziddiyyətli mövqelər nə üçündür? Niyə bir birini tutmayan bəyanatlar verilir?
“Alyans”SAM-ın sədri Abutalıb Səmədov baki-xeber.com-a bildirdi ki, Rusiya-Ukrayna müharibəsi kimi ağır münaqişədə vasitəçilik etmək üçün mütləq bu missiyanı öz üzərinə götürən dövlətin hər iki dövlətə təsir imkanları olmalıdır: “Müəyyən qədər neytrallıq nümayiş etdirilməlidir. Amerika Birləşmiş Ştatları Tramp hakimiyyətə gəldikdən sonra neytral mövqeya keçdi. Düzdür, sonradan rəsmilər bəyan etdilər ki, Amerika Birləşmiş Ştatları neytral dövlət sayıla bilməz. O Ukrayna tərəfindədir. Ancaq hər iki dövlətin təsir imkanlarını nəzərə alaraq həm Rusiya, həm də Ukrayna Amerika Birləşmiş Ştatlarını vasitəçi kimi qəbul edir. Və görünür Tramp ilə Putin arasında baş tutan son telefon danışıqlarında vasitəçilik missiyasının yenidən bərpa olunması məsələsi müzakirə olunub. ABŞ-ı da bu prosesə qayıtmaq qərarına gəliblər. Əslində, Trampın o missiyadan imtina etmək şansı yoxdur”.
A.Səmədovun sözlərinə görə, çünki prezident seçkiləri qabağı verdiyi vədlərin ən vaciblərindən biri qısa müddətdə Ukrayna, Rusiya-Ukrayna müharibəsini bitirmək vədi idi və Trampın tamamilə bu prosesdən kənara çəkilməsi onun nüfuzuna çox ciddi təsir göstərə bilər. “Bu səbəbdən ABŞ yenidən vasitəçilik missiyasına qayıtmaq qərarına gəlib və yaxın vaxtlarda Rusiya Xarici İşlər nazirinin dövlət katibi ilə Ukrayna məsələsini müzakirə etməsi gözlənilir. Üstəlik, onu da nəzərə almaq lazımdır ki, İran ətrafında baş verən proseslər Amerika Birləşmiş Ştatlarına əl-qol açmağa, başqa hansısa bir ciddi məsələ ilə məşğul olmağa imkan vermirdi. Düzdür, bu hadisələr hələ bitməyib və tamamilə mümkündür ki, Amerika Birləşmiş Ştatları-İran müharibəsi hələ bundan sonra da bir neçə ay uzansın. Hələlik məsələnin necə həll olunacağı gözə görünmür. Hər iki tərəf barışmaz mövqe tutublar və bir tərəf ciddi şəkildə məğlub olmalıdır ki, danışıqların uğurlu başa çatması mümkün olsun. ABŞ rəsmilərinin ziddiyyətli bəyanatlarına gəldikdə isə bu Tramp administrasiyası üçün xarakterik bir davranışdır. Əgər prezidentin özü bu gün dediyindən sabah imtina edirsə, digər rəsmilərdən başqa bir davranış gözləmək də qeyri-mümkündür. Bu administrasiyanın əsas fiqurları, çox təəssüf ki, verdikləri bəyanata bir qədər qeyri-ciddi yanaşırlar və biz də bu reallıqla barışmalıyıq”-deyə A.Səmədov bildirdi.
İradə SARIYEVA
