Turan Rzayev: “Əgər Bolqarıstan da belə bir təhlükəli vəziyyətdə olsa, yəqin ki, İran zərbə endirəcək”
Tehran Sofiyanı "təcavüzkarların və qanun pozucularının əlbirçisi" olmamağa və ölkənin hava bazasında Amerika yanacaqdoldurma təyyarələrini yerləşdirməməyə çağırıb.
İran Bolqarıstanı Sofiyanın ABŞ-ın Tehrana qarşı hərbi əməliyyatlar üçün öz ərazisindən istifadə etməsinə icazə verəcəyi təqdirdə potensial nəticələr barədə xəbərdar etdi. “Reuters” agentliyinin məlumata görə, İran Xarici İşlər Nazirliyi belə bir addımın "təcavüz və müharibə cinayətlərində" iştirak hesab ediləcəyini bildirib.
Agentliyin məlumatına görə, bu açıqlama Bolqarıstan prezidenti Rumen Radevin ölkənin hava bazalarından birində səkkizə qədər Amerika tanker təyyarəsinin yerləşdirilməsini təsdiqləməsini parlamentdən xahiş etmək niyyətində olduğunu açıqlamasından sonra verilib.
İran Xarici İşlər Nazirliyi Bolqarıstan hakimiyyətini "təcavüzkarların əlbirləri və beynəlxalq hüququ pozanlar" olmamağa çağıraraq, ABŞ-ın hərbi əməliyyatlarına hər hansı bir dəstəyin siyasi nəticələrə səbəb olacağını vurğulayıb.
Sofiya hələlik Tehranın açıqlamasına münasibət bildirməyib.
Əvvəllər bildirilirdi ki, İran prezidenti Məsud Pezeşkian ABŞ-ın bir sıra hücumlarından sonra ölkəni tammiqyaslı müharibə vəziyyətində elan edib.
Xatırladaq ki, Qətər, Misir, Pakistan və digər regional vasitəçilər eskalasiyanı dayandırmaq və Hörmüz boğazını bərpa etmək üçün ABŞ və İrana 10 günlük atəşkəs elan etməyi təklif ediblər.
İran Bolqarıstanı raketlə vuracaqmı?
Politoloq Turan Rzayev baki-xeber.com-a bildirdi ki, Amerika Birləşmiş Ştatları hələ bir neçə il öncdən Dedə Ağac deyilən əraziyə çox böyük miqdarda bir silah-sursat yığmışdı. “ Səhv etmirəmsə, o Yunanıstan-Türkiyə sərhədinə yaxın bir ərazidədir. O əraziyə çox böyük miqdarda bir silah-sursat yığılmışdı. Üstəlik, Rumıniya və Bolqarıstana da yenə eyni qaydada bir müddət idi ki, raket sistemləri cəlb edirdi. Həmin dönəmdə bunun Rusiyaya qarşı olduğu deyilsə də, sonralardan bunun istifadə olunmadığını gördük. İndiki situasiyada əlbəttə ki, Amerika Birləşmiş Ştatlarının İrana qarşı təzyiqləri artırması və artıq quru əməliyyatlara başlayacaq mesajlarını verməsi fonunda bu çox ciddi bir siqnaldır. O ki qaldı İranın Bolqarıstanı vurmasına. Bu bir qədər texniki məsələdir.
İranın əlində uzaq mənzilli ballistik raketlər var. Bu raketlərlə bu günə qədər daha çox Körfəz ölkələri, İraq, Suriya, İordaniya vurulub. Hətta Türkiyənin belə, daha çox şimal vilayətlərindəki bazalar hədəfə alınıb. Biliyim qədər hətta Kipri belə, hədəfə alıblar. İran Bolqarıstana zərbə endirə bilərmi? Bunun texniki parametrlərini sözün düzü dəqiq bilmirəm, amma İranın əlində çox uzaq mənzilli raketlərin olduğu məlumdur. Ümumiyyətlə, Çinlə əməkdaşlıq fonunda bu raketlərin mənzilləri daha da artırılıb. Yəni İranın Bolqarıstan ərazisini vura biləcək potensialda raketləri var, amma vura bilərlərmi? Vura bilməzlər. Çünki böyük ehtimal Türkiyə üzərindən keçdikdə bu raketlər Türkiyə bunu vuracaq”.
T.Rzayev hesab edir ki, həmin raketlər elə Qara dəniz üzərindən vurulacaq. Politoloqun sözlərinə görə, bu raketlərin Bolqarıstana dəyməsinə icazə verilməyəcək. “Bir də bunun olması üçün həm də həmin ərazidən zərbə gəlməlidir. Məsələn, bu günə qədər İranın vurduğu ərazilərdən, Körfəz ölkələrindən də zərbə ehtimalı olduğu üçün İran o əraziləri vurdu. Amma Bolqarıstandan hələlik bir təhlükə gəlməyib. Amerikanın çox ölkədə hərbi bazası var. Bu İranın hamısını vuracağı mənasına gəlmir”. T.Rzayevin fikrincə, İrana zərbə endirə biləcək riski və ehtimalı yüksək olan ərazilər hədəfə alınır və o ərazilərə zərbələr endirilir.
“Əgər Bolqarıstan da belə bir təhlükəli vəziyyətdə olsa, yəqin ki, İran zərbə endirəcək. Amma yox. İndiki məqamda fikrimcə, hələlik Bolqarıstan sadəcə bir logistika, yəni baza rolunu oynayır. Yəni o ərazidən yəqin Yaxın Şərqə nələrsə göndərilə bilər”-deyə T.Rzayev qeyd etdi.
İradə SARIYEVA
