Arzuxan Əlizadə: “Türkiyə ilə münasibətlər daha da gərginləşərsə, parlament qondarma “erməni soyqırımı”nı tanıya bilər”
İsrailin baş naziri Binyamin Netanyahu Knessetdə “erməni soyqırımı”nın rəsmi tanınması ilə bağlı səsvermənin keçirilməsinin qarşısını alıb. İsrailin “Haaretz” qəzeti israilli mənbəyə istinadla yazır ki, bu, Azərbaycanın yüksək vəzifəli rəsmisinin müraciətindən sonra mümkün olub.
İsrail hökuməti ötən ay "erməni soyqırımı"nın tanınmasını təsdiqləmişdi. Qərarın parlamentdə səsverməyə çıxarılması nəzərdə tutulsa da, bu, indiyədək baş verməyib. İsrailli mənbənin sözlərinə görə, Azərbaycan prezidenti İlham Əliyevin köməkçisi Hikmət Hacıyev İsrailin baş nazir aparatı ilə əlaqə saxlayandan sonra belə qərar verilib.
Onu da qeyd edək ki, İsrail tərəfi rəsmi olaraq bu məsələyə izah verməyib. Bunu yalnız texniki vasitələrlə əlaqələndiriblər. Çox güman ki, köhnə parlamentin sonuncu iclası ərəfəsində bu prosesi dayandırdılar. Oktyabrda İsraildə yeni parlament seçkiləri keçiriləcək və o vaxta qədər Knesset toplanmayacaq. Əslində İsrailin hələ qondarma "erməni soyqırımı"nın tanınmasından tamamilə imtina edib-etməməsi bəlli deyil. Maraqlı olan odur ki, İsrailin yeni parlamenti yenidən bu mövzuya qayıda bilərmi?
Sözügedən məsələ ilə bağlı fikirlərini baki-xeber.com-la bölüşən AMİP sədri, millət vəkili Arzuxan Əlizadə hesab edir ki, İsrailin yenidən bu məsələyə qayıdıb-qayıtmaması Türkiyə ilə olan münasibətlərin səviyyəsindən asılı olacaq: “Bəli, qondarma “soyqırım”la bağlı məsələnin gündəlikdən çıxarılması bunun tamamilə ortadan qaldırılması deyil. Ancaq o da bir faktdır ki, bunun önlənməsində Azərbaycanın xüsusi rolu olub. Azərbaycan İsraillə olan yaxın əlaqələrindən istifadə edərək Knessetdə qondarma “erməni soyqırımı”nın gündəliyə çıxarılmasına, rəsmən tanınmasına mane olub. Hər halda İsrailin “Haaretz” kimi aparıcı bir media orqanında belə məlumatın dərc edilməsi sıradan bir hadisə deyil. Bu, bir daha onu göstərir ki, İsrail Azərbaycanla olan münasibətlərə xüsusi önəm verir. Yeni parlament seçkilərindən sonra İsrailin bu məsələyə qayıdıb-qayıtmamasına gəldikdə isə, bu, Türkiyə ilə münasibətlərdən asılı olacaq. Əgər Türkiyə ilə münasibətlər daha da gərginləşərsə, parlament qondarma “erməni soyqırımı”nı tanıya bilər. Yox əgər münasibətlərdə müəyyən yumuşlama olarsa və tərəflər ortaq dil tapsa, o zaman bu məsələ gündəliyə çıxarılmayacaq. Biz bilmirik qarşıdakı parlament seçkilərinin nəticələri necə olacaq. Bəlkə elə oldu ki, seçkilərdə daha ifrat radikal siyasi qüvvələr hakimiyyətə gəldi. O zaman İsrail-Türkiyə münasibətləri indikindən də sərt müstəvidə ola bilər”.
Vidadi ORDAHALLI
