Firdovsi Şahbazov: “Təkcə TRIPP çərçivəsində ABŞ-ın bu ölkəyə sərmayə qoyması yetərli deyil”
ABŞ Dövlət Departamentinin “TRİPP+” fonduna rəhbər təyin etdiyi Konstantin Sokolov Ermənistanın ikinci ən zəngin mis-molibden yatağına da sahib olub. Söhbət Texut mis-molibden yatağından gedir.
Məlumat üçün qeyd edək ki, bu yataq Rusiyanın dövlət bankı olan VTB-yə məxsus olub və bank onu kredit borcunun ödənilməməsi qarşılığında əldə edib. Sokolovun investisiyası isə Ermənistanın dağ-mədən sənayesinə - Amulsardakı qızıl yatağından sonra yatırılan ikinci ən böyük Qərb investisiyası olub.
Belə məlum olur ki, ABŞ-ın Ermənistanda iqtisadi fəaliyyəti təkcə TRİPP-lə məhdudlaşmayacaq. Digər iqtisadi sahələri də əhatə edəcək. Bütün bunlar Rusiyanın Ermənistandakı iqtisadi hegemonluğunu mərhələli şəkildə minimuma endirəcəkmi?
Sözügedən məsələni baki-xeber.com-a şərh edən iqtisad üzrə fəlsəfə doktoru Firdovsi Şahbazovun fikrincə, Rusiyanın Ermənistanda iqtisadi hegemonluğunu ortadan qaldırmaq və yaxud da minimuma endirmək üçün vaxt lazımdır: “Təkcə vaxt yox, həm də digər məsələlərin həlli vacibdir. Bəli, Ermənistan 3 milyon əhalisi olan kiçik bir dövlətdir. Ancaq məsələ ondadır ki, Ermənistanın Rusiyadan iqtisadi asılılığı əhəmiyyətli dərəcədə böyükdür. Rusiyada milyonlarla erməni yaşayır. Təkcə ötən il Rusiyadan Ermənistana banklar vasitəsi ilə 4 milyard dollara qədər vəsait köçürülüb. Ermənistanda istehsal edilən aqrar məhsulların əsas bazarı Rusiyadır. Ermənistanda bir sıra sənaye, nəqliyyat sahələrinin səhmləri Rusiyaya məxsusdur. Rusiyanın Ermənistanda iqtisadi üstünlüyünü azaltmaq üçün təkcə TRIPP çərçivəsində ABŞ-ın bu ölkəyə sərmayə qoyması yetərli deyil. Sokolovun Ermənistanın ikinci ən zəngin mis-molibden yatağına sahib olması ilə iş bitmir. Bunun üçün həm Birləşmiş Ştatların, həm də Avropa İttifaqının ora milyardlarla dollar investisiya qoymasına, bir sıra layihələri həyata keçirilməsinə ehtiyac var. Təkcə Ermənistana 100-200 milyon dollar qrant verməklə Rusiyanın təsir imkanlarını azaltmaq mümkün deyil. Başqa bir tərəfdən Ermənistanın Azərbaycan və Türkiyə ilə olan sərhədləri açılmalıdır. Bu iki ölkə ilə normal münasibətlər olmadan Rusiya təsirini azaltmaq mümkün deyil. Bunun üçün də Ermənistan üzərinə düşən öhdəlikləri yerinə yetirməlidir. Konstitusiyasında Azərbaycana qarşı ərazi iddialarını çıxarmalıdır, sülh sazişi imzalanmalıdır. O cümlədən, Türkiyəyə qarşı da ərazi iddialarından imtina etməlidir”.
Vidadi ORDAHALLI
