Elşad Həsənov: “Azərbaycan öz gücü hesabına bütün bunları təmin etdi”
IV Şuşa Qlobal Media Forumunda çıxış edən Prezident İlham Əliyev deyib ki, milli kimlik, milli ləyaqət hər şeydən üstün olmalıdır:
“Bəzi ölkələr, onların rəhbərləri kiminsə qanadının altına sığınırlar və hesab edirlər ki, bu, onları qoruyacaq. Amma nəticə etibarilə olurlar qurban. Böyük oyunların qurbanları. Bizim xalqımız həm işğal görüb, həm dağıntılar görüb, həm Zəfər görüb, həm də bu gün bu bərpa və dirçəliş dövrünü həm görür, həm də bunun iştirakçısıdır. Ona görə bu sözlərim gələcək nəsillərə, gənc nəslədir ki, Azərbaycan xalqı əbədi, yəni qürurlu xalq kimi, qalib xalq kimi yaşasın, milli kimlik hər şeydən üstün olmalıdır, milli ləyaqət hər şeydən üstün olmalıdır. Məğlub ola bilərsən, - indi olur belə hadisələr, - amma gərək heç vaxt əyilməyəsən, sınmayasan. Heç vaxt işğalçı ilə razılaşmayasan, işğalçının diktəsi ilə oturub-durmamalısan”.
Sözügedən məsələ ilə bağlı fikirlərini baki-xeber.com-la bölüşən siyasi ekspert Elşad Həsənov hesab edir ki, Forumda Prezidentin toxunduğu məqamlar reallığa əsaslanır: “Forumda Prezidentin toxunduğu məsələlər dünya mətbuatının manşetlərinə çıxarıldı. Onun səsləndirdiyi fikirlər hər biri ayrı-ayrılıqda tədqiq olunmalıdır. Prezident Əliyevin fikirləri əraziləri işğal altında olan dövlətlər, xalqlar üçün bir örnəkdir. Hər dövlət başçısının hünəri deyil ki, publika qarşısında Ukrayna məsələsində işğalla razılaşmaq olmaz desin. Azərbaycanın əraziləri 30 ilədək işğal altında qaldı. Bu illər ərzində dünya güclərinin vasitəçiliyi ilə danışıqlar aparıldı, amma bir qarış ərazi belə azad edilmədi. Bəli, atəşkəsdən sonra uzun illər ərazilərinizin işğal altında qalması ağır idi. Ancaq İlham Əliyev prezident seçiləndən sonra ordu quruculuğu ilə bağlı işlər daha da gücləndirildi, iqtisadiyyat inkişaf etdirildi. Neftdən əldə edilən gəlirlər insan kapitalına çevrildi. Yeni güclü ideyalı gənc vətənpərvər nəsil tərbiyə olundu. Ordumuz formalaşdırılarkən NATO standartlarına xüsusi önəm verildi. Məhz bunun nəticəsində 44 günlük Vətən müharibəsində ərazi bütövlüyümüz təmin edildi. 2023-cü ilin sentyabrında isə, keçirilən antiterror əməliyyatları sayəsində Qarabağda suverenliyimiz tam bərqərar edildi. Xalqımızın qüruru, ləyaqəti özünə qayıtdı. Bu gün biz çox qürurluyuq ki, öz torpaqlarımızın sahibiyik. Qarabağ və Şərqi Zəngəzur 6 ilə yaxındır dirçəlir. Azad edilər ərazilərdə böyük layihələr həyata keçirilir, məcburi köçkünlər öz yurdlarına qayıdırlar. Azərbaycan öz gücü hesabına bütün bunları təmin etdi. Hansısa dövlətin qanadının altına girərək bunu etmədi. İşğalla barışmadı, dövlətimiz cəmiyyəti buna köklədi. Prezidentin apardığı doğru-düzgün siyasət sayəsində bu, mümkün oldu. Bu gün Azərbaycan artıq orta güc hesab edilir. Cənubi Qafqazın lider dövlətidir. Həm hərbi, həm də iqtisadi cəhətdən böyük ölkədir, inkişaf edir. Bütün bunlar hər bir Azərbaycan vətəndaşında qürur hissi yaradır. O üzdən, bizim indi böyüyən gənclərimiz daha ləyaqətlə, qürurla yaşayacaqlar, oxuyacaqlar. Azərbaycan xalqı uzun illər ədalətsizliklərə məruz qalıb, ərazilərimizi bizdən qoparıblar. Ancaq 2020-ci ildəki şanlı Vətən müharibəsi ilə buna son qoyuldu”.
Vidadi ORDAHALLI
