İbrahim Rüstəmli: “Vaxtilə Jirnovskinın obrazında tez-tez belə hədə-qorxuları, tədidləri eşidirdik, indi də Kadırovu atıblar ortaya...”
Biz piyada əsgərlərik və Ali Baş Komandanın əmr etdiyi istənilən istiqamətdə hərəkət etməyə hazırıq, xüsusi təyinatlı qüvvələr isə sözün əsl mənasında ən çətin əmrləri yerinə yetirməyə can atırlar. Çeçenistan lideri Ramzan Kadırov bu barədə sosial mediada paylaşım edib.
"Yer həmişə Rusiyanın düşmənlərinin ayaqları altında yanıb və onları əritməyə davam edəcək, Vladimir Vladimiroviç! Sadəcə siz əmr edin, biz icra edək”. Bunu R.Kadırov deyib.
Bu hədə-qorxuda Azərbaycana da mesaj verilirmi?
Hərbi ekspert İbrahim Rüstəmli baki-xeber.com-a bildirdi ki, Kadırovun Putinə bu müraciəti marionet bir ölkə içindəki ölkənin liderinin Rusiya prezidentinə yarınmasından, özünü daha yaxşı, daha bacarıqlı, daha təəssübkeş bir oğlan kimi göstərməsindən irəli gəlir. “Əslində, Çeçenistanda çox az adam Kadırov sevir. Ümumiyyətlə ruhu, mənəviyyatı, əxlaqı ilə çeçen olanlar Rusiya ilə heç vaxt barışmayıb. Rusiyanın müstəmləkə siyasətini tənqid edirlər. Stalin dövründə də onların kütləvi şəkildə köçürülməsi, deportasiya prosesi həyata keçirilib. Çeçen xalqı həm Sovet dönəmində, həm də Rusiya Federasiyası dönəmində ən çox əziyyət çəkən, çox böyük itkilərlə, faciələrlə üzləşmiş bir xalqdır. Bu xalq üçün Rusiya ilə mənəvi, ruhi cəhətdən barışmaq məsələsi heç vaxt müzakirə mövzusu olmayıb.
Bu gün özünün bir küncündə müstəmləkəsi kimi saxladığı, protektorluq etdiyi Rusiya Çeçenistanın protektorudur. Yəni Rusiya Çeçenistanın həm işğalçısıdır, həm də onu öz əsarətində saxlayan bir dövlətdir. Yalnız gücün hesabına Çeçenistanı öz əyaləti kimi saxlayır və öz əyalətində də öz emissarlarını, öz hakimiyyətini yerləşdirib. Oranı idarə edir. İndiki dövrdə də Çeçenistanda əhalinin əhəmiyyətli dərəcəsini götürsək onlar rus işğalından çox böyük əziyyət çəkib. Oğul, ata, bacı-qardaş itiriblər. Yəni bu bağlılıq heç bir halda mənəviyyətə, əxlaqa və idraka, ruha söykənmir.
Kadırov Rusiyanın yerdəki danışan dilidir. Nəyi isə birbaşa deməyi bacarmayan da, yaxud nəyi isə birbaşa öz adından demək istəməyəndə onu ortaya atır.
Bir zamanlar Rusiyanın siyasi gündəmindən düşməyən adamlar Putinin sözünü deyirdilər. Bu gün də o adamlar seriyasından biri də Kadırovdur. O, Rusiyanın klonlaşdırdığı bir çeçendir. Rusiya onun dilində bu ifadələri bizə qarşı səsləndirir. Əlbəttə, hədə-qorxa gəlir. Yəni Kadırovun bu fikri yeni deyil. Bunu sabiq Amerika prezidenti də demişdi. Bunu Amerika prezidenti Tramp da deyir, Bayden də demişdi. Yəni Rusiyanın əsas məqsədi Ukrayna məsələsində mütləq şəkildə qalib kimi çıxmaq, qələbə qazanmaq və ondan sonra Avropanın üstünə yeriməkdir. Yəni, dolayısı ilə İkinci Dünya müharibəsindən sonrakı dönəm göz önünə gəlir. Məqsəd bütün Avropanı işğal etməkdən ibarətdir. Amma Rusiya bugün onu reallaşdıra bilmir. Rusiya bir növ bataqlığa batıb. O hansı yüngül müharibədir ki, rus əsgərinin Ukrayna cəbhəsindəki həyatı təqribən 30 saniyə çəkir…
Bunlar elə bilirdilər ki, üç gün ərzində Ukraynanın strateji məntəqələrini, o cümlədən hava limanlarını ələ keçirəcəklər və Ukraynanı Çeçenistan kimi öz müstəmləkəsinə çevirəcəklər. Orada da Kadırov kimi bir klonu yerləşdirəcəklər. Yəni burada mən klon deyəndə sirk klonunu nəzərdə tutmuram. Bu klonlaşdırılmış çeçendir. Yəni o mənada deyirəm ki, bunu öz istədiyi formata salıb, onun zehnini, beynini yuyub, millilikdən, milli kimlikdən uzaq bir adama çevirib. Bu gün elə tez-tez oradan hədə-qorxular gəlir. Bu o deyil ki, gəlib Azərbaycan təyyarəsini Çeçenistanın üstündə vurasınız, sonra da deyəcəksiniz ki, biz kompensasiya ödəyəcəyik. Sən kimsən? Kadirov deyirdi ki, mən kompensasiya ödəməyə hazıram. Sən bəyəm Rusiya prezidentisən? Faktiki olaraq onlar müstəmləkədir, yəni işğal olunmuş bir forpostdur. O, Çeçenistanın marionet prezidentidir. Çeçenistan müstəqil deyil ki… Rusiyanın işğalı altındadır. Yəni, əlbəttə, bu məsələdə ciddi məqamlar var.
Təbii, Rusiyanın çox ciddi, daha böyük planları var. Ola bilsin o planlar böyükdür, ciddidir, amma bu gün üçün xarakterik deyil. Hər halda bu heç vaxt itməyən bir iddiadır. Yəni Rusiya həmişə o arzu ilə, o istəklə yaşayıb. Bundan sonra əgər Putini dəyişdilər belə növbəti Rusiya prezidenti də məhz bu o ideya ilə yaşayacaq ki, tezliklə Sovet məkanında birləşdirilən ölkələr özünə ilhaq eləsin, yenidən güc toplayıb Avropanı öz işğalı altına salsın”.
İ.Rüstəmli hesab edir ki, Kadırovu bu açıqlaması ciddi hesab edilmir. “Kadrovun bu cür bəyanat verməsi qeyri-ciddi səslənir. Kadrov elə zənn edir ki, Azərbaycan sıradan adi bir dövlətdir, istədiyi bəyanatı verə bilər. Amma unudur ki, Azərbaycan bu gün həm iqtisadi, həm siyasi, həm də hərbi baxımdan güclü bir dövlətdir və onun müttəfiqləri var. Azərbaycan yiyəsiz bir ölkə deyil. Azərbaycanın çox ciddi potensialı, ciddi hərbi resursları var və bu resurslar təbii ki, Azərbaycanın öz fikrini müstəqil şəkildə deməsi üçün əsaslı rol oynayır.
Vaxtilə Jirnovskinın obrazında tez-tez belə hədə-qorxuları, tədidləri eşidirdik, indi də Kadırovu atıblar ortaya...” –deyə İ.Rüstəmli qeyd etdi.
İradə SARIYEVA
