Əli Mustafa: “Bu savaş dünya düzənini dəyişdirəcək bir müharibədir və Tramp belə bir savaşı dayandıra bilməz”
ABŞ Prezidenti Donald Tramp Ukraynadakı müharibənin prezidentlik müddəti bitməmiş başa çata biləcəyini bildirib. Tramp bu barədə “Fox News” telekanalına müsahibəsində danışıb.
“Düşünürəm ki, bu münaqişə mənim prezidentlik müddətim başa çatana qədər bitə bilər. Hesab edirəm ki, o (Vladimir Putin) razılaşma əldə etməyə hazırdır. Və bu, yaxın zamanda baş verəcək”, - ABŞ lideri bildirib.
Qeyd edək ki, Trampın prezidentlik müddəti 2029-cu ildə başa çatacaq. Halbuki, Tramp ikinci dəfə prezident olanda deyirdi ki, müharibəni 24 saata bitirəcək. Sonra bir ay, daha sonra 3 aya bitirəcəyini bəyan etdi. İndidə deyir ki, prezidentlik müddəti bitməmiş başa çatdıracm.
Sözügedən məsələni baki-xeber.com-a şərh edən siyasi şərhçi Əli Mustafanın fikrincə, Tramp əvvəl Rusiya-Ukrayna müharibəsinin dayandırılması ilə bağlı çox iddialı mövqedən çıxış etdi: “Ancaq çox keçmədi ki, onun bu proqnozları özünü doğrultmadı. Artıq elə vəziyyət yaranıb ki, dünyada Tramp ciddi qəbul olunmur. Problem ondadır ki, Tramp ciddi siyasətlə məşğul olan fiqur olmayıb. Hətta təsadüfən siyasətə gəldiyini də deyə bilərik. Tramp əsasən biznes fəaliyyəti ilə məşğul olub. O üzdən, onun hər açıqlamasını çox da ciddi qəbul etmək lazım deyil. Çünki verdiyi açıqlama 24 saat ərzində dəyişə bilər, fərqli ola bilər. Başqa bir tərəfdən bütün bunlar təkcə Trampın xarakteri ilə bağlı olan məsələ deyil. Həm də onun vəzifəsi və funksiyası ilə bağlıdır. Çünki ABŞ özü çox mürəkkəb, çox qütblü bir dövlətdir. Tramp qlobal miqyaslı bir prosesin içindədir. Ona görə də ola bilər o, bəzən bilərəkdən, qəsdən doğru olmayan açıqlamalar verir. Belə baxanda Birləşmiş Ştatlar da maraqlıdır ki, tükəndirici müharibədə Rusiya daha çox resurs itirsin. Çünki bu, nəticə etibarı ilə Rusiyanın zəifləməsinə xidmət edir. Deməyim odur ki, bir sıra məsələlər heç də göründüyü kimi deyil. Bir il əvvəl təsəvvür etmək çətin idi ki, Rusiyanın neft emalı zavodları bu cür intensivliklə atəşə tutulacaq. Faktiki olaraq Rusiyanın yanacaq təminatı iflic edilib. Tramp ilk dövrlərdə müharibəni 24 saata dayandırmağa cəhd etdi, amma alınmadı. Gördü ki, bu savaş böyük müharibədir və dünya düzənini dəyişdirəcək bir savaşdır. Tramp belə bir savaşı dayandıra bilməz. Əksinə, zaman-zaman bundan istifadə edə bilər və yəqin edir də. Ancaq konkret olaraq bu savaşın nə vaxt dayanacağı və yaxud da bitməsi, Trampın prezidentlik müddətinin bitməsinə qədər olacağını söyləmək də kifayət qədər risklidir. Məsələ ondadır ki, ən azı NATO 2026-2027-ci illər üçün Ukraynanın savaşda duruş gətirməsi üçün bu ölkəni maliyyələşdirir. Fransa 2028-2029-cu illərdə Ukraynaya “Rafal” təyyarələrinin verilməsini vəd edib. Avropa İttifaqı Ukrayna ilə birgə dron istehsalına başlayır. On Avropa ölkəsi ABŞ-ın lisenziyası ilə “Patriot” raketlərinin istehsalına başlayırlar. Yəni bütün bunlar hamısı böyük hərbi layihələrdir və müharibənin davam etməsinə xidmət edən məqamlardır. Odur ki, tərəflərdən biri məğlub olana qədər müharibə davam edəcək. Yəqin ki, məğlub olan tərəf Rusiya olacaq”.
Vidadi ORDAHALLI
