Məhərrəm Zülfüqarlı: “Putin Tramp kimi sülhpərvər prezident imicini o zaman qazana bilərdi ki, sülh siyasəti yürütsün...”
IV Şuşa Qlobal Media Forumunda Prezident İlham Əliyev Donald Trampı "Sülh adamı" adlandırıb. ABŞ Prezidenti Donald Tramp “Truth Social” sosial şəbəkəsində Prezident İlham Əliyevin Şuşa Qlobal Media Forumunda onun ünvanına səsləndirdiyi fikirlərin yer aldığı “Breitbart” nəşrinin məqaləsini paylaşıb.
Prezident İlham Əliyev də ABŞ Prezidenti Donald Trampa Şuşa Qlobal Media Forumunda səsləndirdiyi fikirləri paylaşdığı üçün təşəkkür edib.
Tramp bölgədə sülh adamı oldu. Bəs Cənubi Qafqaz bölgəsində Rusiya prezidenti Vladimir Putin niyə sülh adamı olmadı, ola bilmədi? Putin Trampdan əvvəl bölgədə sülh adamı ola bilərdi. Nə üçün ola bilmədi?
Tarix elmləri doktoru, professor, siyasi ekspert Məhərrəm Zülfüqarlı baki-xeber.com-a bildirdi ki, Amerika prezidenti ilə Rusiya prezidentini müqayisə edərkən ilk növbədə onların rəhbərlik etdiyi dövlətlərin tarixinə, yeritdikləri siyasətə baxmaq lazımdır. “Yəni Amerika birdən-birə Amerika olmadı. Çünki Avropadan XV əsrdən Amerikaya köçən insanlar orada müxtəlif çətinliklərlə üzləşdilər və nəhayət, şimalla cənubun müharibəsi oldu. Cənubda quldarlığı müdafiə edənlər vardı. Şimalda isə yeni kapitalizm dəyərlərini müdafiə edən qüvvələr var idi. Nəhayət, şimalın qələbəsi ilə Amerikada yeni bir cəmiyyət yarandı. Demokratiyaya, demokratikləşməyə doğru mühüm addımlar atıldı. İndi dünya ölkələrinin nümunə götürdüyü vətəndaş cəmiyyəti sistemi quruldu. Rusiyada isə IX əsrdən başlayaraq bu günə qədər müsbətə doğru heç irəliləyiş olmayıb. Yəni IX əsrdən bəri qonşulara qarşı işğalçı siyasət yeritmək, öz xalqını əzmək və dünyanın gözünü qorxutmaq siyasəti davam edir. Bundan ən çox əziyyət çəkən bilavasitə rus xalqıdır. Yəni Putin Tramp kimi sülhpərvər prezident imicini o zaman qazana bilərdi ki, sülh siyasəti yürütsün, amma o irticaçı, işğalçı siyasət yürüdür, SSRİ-ni bərpa etmək niyyəti güdməklə öz mahiyyətini ortaya qoyur.
SSRİ dağılandan sonra 15 respublika, o cümlədən Rusiya da özünü müstəqil elan etdi. Yəni bu riyakarlıq olmamalı idi, həqiqətən müstəqil olmalı idi. Rusiya qonşularına qarşı mehriban qonşuluq, əməkdaşlıq siyasəti yeritməlidir. Yəni Putin SSRİ-ni bərpa etmək üçün müxtəlif hiylələrə əl atmamalı və işğalçı siyasətini davam etdirməməli idi. Əlbəttə ki, Rusiyada nümunəvi bir cəmiyyət yaratsaydı indi fərqli olardı. Amma Rusiyanın bu işğalçı siyasəti davam etdi və bu da qonşularla yanaşı, ən çox rus xalqına zərbə vurur, indi də vurmaqdadır. Azərbaycan siyasətçilərindən biri SSRİ dağılarkən belə bir fikir demişdi ki, 20 Yanvardan sonra əgər bu gün imperiya özünü qorumaq üçün başqa xalqları ölümlə hədələyirsə və yaxud öldürürsə, qırırsa, bir vaxt gələcək həmən siyasəti öz xalqına qarşı çevirib öz xalqını qıracaq. Yəni rus xalqını qıracaq. Biz bu gün onun şahidiyik. Putinin 5 ildir ki, Ukraynada apardığı müharibədə Ukraynada yaşayan digər xalqlarla yanaşı, etnik rusları da qırılmaqdadır, ölməkdədir. Əvvəllər Rusiyanın mərkəzi rayonlarında yaşayan müharibəni hiss etməyən ruslar bu gün enerji böhranından artıq hiss edirlər ki, 5 ildir müharibə gedir, başqa milli azlıqlar qırılır. İndi də artıq zərbə onlara gəlib çatıb və ona görə də rejimə qarşı müxtəlif üsullarla etirazlarını bildirirlər”.
M.Zülfüqarlı qeyd etdi ki, buna görə də Putin dünyada irticaçı, işğalçı bir imic qazanıb və Ukraynadakı uşaqları oğurlayaraq Rusiyaya qaçırdığı üçün Haaqa Məhkəməsi onu cinayətkar elan edib.
M.Zülfüqarlı bildirdi ki, bu da həmin işğalçı siyasətinin tərkib hissəsidir. “Yüz faiz həmin uşaqlar aparılıb müxtəlif hərbi internat məktəblərində yetişdirilir və yenidən başqa ölkələrə qarşı işğalçı siyasətdə onlardan istifadə etmək nəzərdə tutulur. Bu tarixən Rusiyanın siyasəti olub. Ona görə də bu gün Azərbaycan Prezidentinin dediyi kimi, Tramp sülh adamı imicini qazanıb.
IX əsrdən “miras” qalan siyasət indiyə qədər davam etdirildiyinə görə Rusiya prezidenti də bilavasitə işğalçı, irticaçı bir imic qazanıb. Mənə belə gəlir ki, Qorbaçov necə SSRİ-nin son prezidenti olmuşdusa, Putin də Rusiyanın son prezidenti olacaq. Çünki Rusiya bu cür dəhşətli müharibədən, iqtisadi çətinliklərdən sonra bir imperiya olaraq parçalanmağa məhkumdur. Ondan sonra bəlkə bəşəriyyət rahat nəfəs ala, həmin ərazilərdə normal bir cəmiyyətin yaranmasının şahidi ola”-deyə M.Zülfüqarlı qeyd etdi.
İradə SARIYEVA
