Faiq Ələkbərli: “Prezidentin mesajı odur ki, müxtəlif maraqların kəşişdiyi, bəzən ziddiyyətlərə çevrildiyi qloballaşan dünyada biz heç zaman milli kimliyimizdən uzaqlaşmamalıyıq”
Azərbaycan Prezidenti İlham Əliyev iyulun 13-də Şuşada keçirilən IV Qlobal Media Forumunda qlobal münaqişələr və geosiyasi təhdidlər dövründə xalqın dövlət ətrafında sarsılmaz birliyinin və həmrəyliyinin xüsusi əhəmiyyət daşıdığını vurğulayıb.
Prezident Əliyev bildirib: “...Ancaq özümüzə güvənməliyik və dövlətə güvənməliyik. Birlik heç vaxt sarsılmamalıdır. Nə üçün mən bunu deyirəm? Bəlkə də bu gün bunu demək o qədər də məntiqli səslənməz. Çünki bu gün Azərbaycan cəmiyyətində olan birliyə oxşar mənzərə tapmaq da çətindir. Çünki bu, ürəkdən gələn, insanların zehnindən gələn bir birlikdir. Elə bil ki, iki çay birləşir bir yerə. Bax, odur bu birlik - həm qəlbən, həm də necə deyərlər, fikir olaraq.
Amma biz gələcəyə baxmalıyıq. Dünya dəyişir və bu barədə də danışmışıq. Yeni təhdidlər, yeni təxribatlar ortaya çıxır. Əgər kimsə fikirləşir ki, bizi istəməyən qüvvələr bizdən əl çəkəcək, olmayacaq, heç vaxt olmayacaq. Bu mübarizə daimi olmalıdır - mübarizə öz hüquqlarımızı qorumaq üçün, mübarizə öz milli kimliyimizi qorumaq üçün, öz müstəqilliyimizi öz əlimizdə saxlamaq üçün.
Bir çox misallar var ki, bəzi ölkələr, onların rəhbərləri kiminsə qanadının altına sığınırlar və hesab edirlər ki, bu, onları qoruyacaq. Amma nəticə etibarilə olurlar qurban. Böyük oyunların qurbanları. Bizim xalqımız həm işğal görüb, həm dağıntılar görüb, həm Zəfər görüb, həm də bu gün bu bərpa və dirçəliş dövrünü həm görür, həm də bunun iştirakçısıdır. Ona görə bu sözlərim gələcək nəsillərə, gənc nəslədir ki, Azərbaycan xalqı əbədi, yəni qürurlu xalq kimi, qalib xalq kimi yaşasın, milli kimlik hər şeydən üstün olmalıdır, milli ləyaqət hər şeydən üstün olmalıdır. Məğlub ola bilərsən, - indi olur belə hadisələr, - amma gərək heç vaxt əyilməyəsən, sınmayasan. Heç vaxt işğalçı ilə razılaşmayasan, işğalçının diktəsi ilə oturub-durmamalısan. Lazım olsa, ölsən də belə, gərək ləyaqətlə yaşayasan və öz övladlarına, nəvələrinə, nəticələrinə bunu aşılayasan. Ona görə bizim gələcək inkişafımız gənc nəslə bağlı olacaq, təqribən 20 il, 30 il, 50 il sonra. Onlar da bizim kimi Vətənə bağlı, mətin, iradəli, güclü olmalıdırlar ki, Azərbaycan daim yüksəklərdə olsun”.
AMEA-nın Fəsləfə və Sosiologiya İnstitunun şöbə müdiri, fəlsəfə doktoru, siyasi ekspert Faiq Ələkbərli baki-xeber.com-a bildirdi ki, Prezident İlham Əliyevin müraciətlərində milli kimliyin qorunması, milli həmrəyliklə bağlı mühüm çağrışlar cəmiyyətə bir mesajdır. F.Ələkbərli qeyd etdi ki, Prezidentin dediyi kimi, biz ancaq özümüzə güvənə bilərik, milli birlik heç vaxt sarsınmamalıdır.
“Son əsrlərdə milli ideya, milli birlik, milli kimlik, milli varlıq, milli dövlət anlayışı ön plandadır. Görünən odur ki, milli məsələlər hər bir xalqın, millətin varlığı üçün önəmini davam etdirəcək. Bu baxımdan Azərbaycan xalqı da, Azərbaycan türkləri də milli ideyadan, milli kimlik və milli mənsubiyyətdən şübhəsiz ki, çox önəmli şəkildə ifadə etməlidir. Yəni bizlər milli kimliyimizi, milli varlığımızı indiki qloballaşan dünyada ifadə etməliyik, onu daha da gücləndirməliyik. Bu baxımdan, Prezident İlham Əliyevin son çıxışlarında da milli kimlik məsələsinə müraciət etməsi təsadüfi deyil. Milli kimliyimizin qorunması və özümüzə güvənmək, özümüzə arxalanmaq vacib amildir. Yəni keçmişdən bu günə, bu gündən gələcəyə getmək, varlığımızı qorumaq üçün milli dəyərlər çox önəmlidir. Milli kimlik dedikdə bu ancaq bir gen və qan məsələsi deyil. Bu həm də bir dəyərdir, mədəniyyətdir, milli özünü ifadə formasıdır. Yəni milli kimlik bir tərəfdən milliyətçilik, millət anlamında özünü ifadə etdirsə, digər tərəfdən milli əxlaqdır, mədəniyyətdir, törədir, milli varlıqdır. Əlbəttə, məhz indiki dünyada hər hansısa bir xalqın, millətin mövcudluğunu davam etdirməsi də şübhəsiz ki, milli varlıqla, milli kimlik fəlsəfəsi ilə bağlıdır. Bu baxımdan cənab Prezident çox doğru vurğulayır. Biz də hesab edirik ki, gələcəyimizdə də, bu günümüz də məhz milli kimlik üzərindən ifadə edilməlidir”.
F.Ələkbərlinin fikrincə, ancaq milli kimlik məsələsini bir fəlsəfə anlamda dərk etməliyik. Ekspert vurğuladı ki, milli kimliyimizin qorunması keçmişdən gələn bir milli milliyyət, milli varlıq məsələsidir. “Ancaq digər tərəfdən onu fəlsəfi anlamında da dərk etməliyik ki, biz Azərbaycan türkü və ümumiyyətlə türk xalqları olaraq dəyərlərimizi məhz ilk növbədə milli fəlsəfə üzərində qurmalıyıq. Buna çox önəm verməliyik. Əslində dünənimiz də, bu günümüz də, gələcəyimiz də məhz milli kimliyimizin milli fəlsəfə üzərindən dərkininlə bağlıdır. Türk dövlətlərinin, o cümlədən Azərbaycan dövlətinin də varlığı, güclənməsi məhz bu anlamlar üzərində olmalıdır. Yəni bizim keçmişimiz, bu günümüz və gələcəyimiz məhz milli dəyərlərə, milli mədəniyyətə, milli fəlsəfəyə əsaslanmalıdır. Biz bundan daha irəli gələrək çıxış etməliyik. Prezidentin mesajı odur ki, müxtəlif maraqların kəşişdiyi, bəzən ziddiyyətlərə çevrildiyi qloballaşan dünyada biz heç zaman milli kimliyimizdən uzaqlaşmamalıyıq. Biz öz milli kimliyimizə bağlı olduqca daha həmrəy, daha mütəşəkkil, daha güclü olarıq və varlığımızı etibarlı şəkildə qoruya bilərik. Odur ki, milli kimliyimizə bağlı olmaqla, onu qorumaqla, onu irəliyə aparmaqla biz daha da güclü olarıq. Milli kimlik üzərində gücləndirməliyik və onu daha da yeni bir mərhələyə daşımalıyıq”-deyə F.Ələkbərli vurğuladı.
İradə SARIYEVA
