Rusiyanın ən varlı iş adamlarından bir neçəsi, ölkə iqtisadiyyatının və dövlət büdcəsinin vəziyyəti ilə bağlı artan narahatlıqlar fonunda bir ildə ölkədən milyardlarla dollar çıxarıb.
“Bloomberg” məlumatlı mənbələrə istinadən xəbər verir ki, Rusiya prezidenti Putinə yaxın olan iş adamları da aktivlərinin müsadirə olunacağından qorxurlar. Məsələn, Domodedovo hava limanının keçmiş sahibi Dmitri Kamenşikin başına gələn hadisə kimi...
Bundan əlavə, biznes nümayəndələri dövlətin müharibəni maliyyələşdirmək üçün onlara təzyiqi artıracağından qorxurlar. “Bloomberg” mart ayında Putinlə görüşdə aparıcı iş adamlarından müharibəyə vəsait ianə etmələrinin xahiş olunduğunu xatırladır. Kreml isə iddia edir ki, iş adamlarından tələb olumayıb, təşəbbüsü özləri irəli sürüblər.
Nəşrin mənbələrinə görə, ən varlı iş adamları son bir ildə investisiya portfellərini kriptovalyuta, qızıl və xarici daşınmaz əmlaka investisiyaların lehinə yenidən nəzərdən keçiriblər.
“Bloomberg”, kriptovalyuta əməliyyatları kimi qeyri-rəsmi kapital axınının miqyasını dəqiq qiymətləndirməyin çətin olduğunu etiraf edir. Lakin, Rusiyanın ən varlı iş adamlarından bir neçəsinin investisiya qərarları ilə tanış olan iki mənbəyə görə, xaricolma on milyardlarla dollar təşkil edir. Onlar qeyd ediblər ki, xaricolma əvvəlki illə müqayisədə artıb.
Qeyd edilir ki, aktivləri Kremlin əlindən kənara çıxarmağa çalışan rusiyalı iş adamları Ukrayna ilə müharibə səbəbindən Rusiyaya tətbiq edilən Qərb sanksiyalarını da nəzərə almaq məcburiyyətində qalıblar. Bu baxımdan, nəşrdə, sahiblərinin qaçaq moldovalı iş adamı İlan Şor və Rusiyanın dövlətə məxsus PSB bankı (əvvəllər Promsvyazbank) olan A7 şirkəti və digər şirkətlərdən bəhs olunur. A7, sərhədlərarası ödənişləri reallaşdırmaq üçün rubla bağlı olan A7A5 kriptovalyutasından istifadə edir. PSB bildirib ki, 2025-ci ilin birinci yarısında A7 vasitəsilə əməliyyatların həcmi 7,5 trilyon rublu (təxminən 98 milyard dollar) keçib.
Tahir TAĞIYEV
