Ceyhun Məmmədov:“Rusiya tərəfi Azərbaycanın mövqeyindən ciddi bir formada narahatdır”
Azərbaycan dövləti müasir dünyada müstəmləkəçiliyə qarşı qarşı mübarizə aparan, Fransa başda olmaqla başqa xalqları müstəmləkə altında saxlayan dövlətlərə qarşı etiraz səsini qaldırır, əzilən, hüquqları tapdalanan xalqların azadlığına açıq dəstək verir.
Azərbaycan Prezidenti İlham Əliyev IV Şuşa Qlobal Media Forumunun açılışında
ölkəmizin müstəmləkə altında əzilən xalqlara həssas münasibətinin səbəblərini bəyan edib. Prezident Əliyev deyib: “...
Bilirsiniz, bu məsələlərə bu qədər həssas yanaşmağımızın səbəblərindən biri də odur ki, biz özümüz müstəmləkə şəraitində yaşamışıq. Biz XIX əsrdə müstəmləkəyə çevrildik və müstəmləkə kimi yaşadıq. Daha sonra Sovet İttifaqı yaradıldıqda isə biz müstəqil deyildik, Sovet İttifaqının tərkibində idik. Respublika idik? Bəli, amma heç bir real hüquqa malik olmayan bir respublika. Müstəmləkə kimi yaşamağın nə demək olduğunu da, azad olmağın nə demək olduğunu da tarixi yaddaşımızdan yaxşı bilirik.
Məsələn, XIX və XX əsrlərdə müstəmləkəçilik dövründəki Azərbaycanla bugünkü Azərbaycanı müqayisə etsəniz, aradakı fərqin gecə ilə gündüz qədər olduğunu görərsiniz. Onlar bizim yalnız sərvətlərimizi talayırdılar. Azərbaycandan milyardla barel deyil, milyard tonlarla neft hasil olunmuşdu. Sovet İttifaqı dağıldıqda isə biz təbii qazsız və elektrik enerjisiz qalmışdıq”.
Prezident İlham Əliyevin bu bəyanatı Rusiyada çox böyük ajiotaj yaradıb. İlham Əliyevin Azərbaycanı Çar Rusiyasının və Sovet İttifaqı dövründə müstəmləkə hesab etməsi Rusiyanın xoşuna gəlməyib.
Yəni İlham Əliyevin bu sözlərində həqiqət nə qədərdir? Rusiyanın aqressivləşməsinin səbəbi nədir? Niyə bu həqiqəti qəbul etmək istəmirlər?
Millət vəkili Ceyhun Məmmədov baki-xeber.com-a bildirdi ki, Prezident İlham Əliyev tarixi gerçəkliyi ifadə edib və onun vurğuladığı məsələlər reallıqdır.
“Təəssüflə qeyd etmək lazımdır ki, biz artıq Rusiya rəsmilərinin Prezident İlham Əliyevin verdiyi açıqlamalara tez-tez müxtəlif reaksiyalar verdiyinin şahidik. Cənab Prezident bunu haqlı olaraq mətbuat konfransında da qeyd etdi ki, onun haqqında xoş söz deyən şəxslər Rusiyada cəzalandırılır. Yəni biz bunu davamlı olaraq görürük, müşahidə edirik. Bu onu göstərir ki, Rusiya tərəfi Azərbaycanın mövqeyindən ciddi bir formada narahatdır. Bu bir reallıqdır ki, uzun müddət Azərbaycan müstəmləkə olub. Yəni, bu gün bütün dünya bilir ki, Azərbaycan Rusiyanın müstəmləkəsi olub və uzun illər müstəmləkə olaraq Azərbaycan xalqı müxtəlif məhdudiyyətlərə, təzyiqlərə məruz qalıb. Tarix boyu Azərbaycanın ərazilərini işğal edən, torpaqlarımızı qəsb edən ölkələrdən biri də Rusiya olub. Yəni, hesab edirəm ki, Rusiya buna belə yanaşmalı deyil. Hətta Rusiya etdiklərinə, 20 Yanvar hadisəsinə, ötən əsrdə ermənilərlə birlikdə törətdiyi soyqırım hadisələrinə görə Azərbaycandan üzr istəməlidir. Yəni, ona görə də bu gün Rusiyanın Azərbaycana qarşı ardıcıl bu cür bəyanatlar verməsinin heç bir əsası yoxdur”.
C.Məmədovun sözlərinə görə, heç şübhəsiz ki, Azərbaycan müstəmləkə olubdur və bu gün isə Azərbaycan müstəqil dövlətdir. “Təbii ki, bu gün Rusiyada Azərbaycanın müstəqil olmasını istəməyənlər çoxdur. Amma reallıqdır ki, Azərbaycan artıq müstəqil dövlətdir. Torpaqlarını azad edib, qələbəsini möhkəmləndirib”-deyə C.Məmmədov əlavə etdi.
İradə SARIYEVA
