Azər Həsrət: “Peskov onu izah etsə, şəxsən mən Rusiyanı dəstəkləməyə başlayacağam”
Rusiya Azərbaycan Prezidenti İlham Əliyevin Ukraynanın ərazi bütövlüyünə dəstək bildirən mövqeyini yanlış sayır. Bunu Kremlin sözçüsü Dmitri Peskov iyulun 14-də bildirib.
“Hesab edirik ki, bu mövqe yanlışdır. Və bütün kanallar vasitəsilə ardıcıl şəkildə əsaslandırılmış arqumentlərlə bunun niyə yanlış mövqe olduğunu izah etməyə davam edəcəyik”, – Peskov deyib.
O, əlavə edib ki, Rusiyanın tərəfdaşı olan bir sıra ölkələr Moskvanın qəti razılaşmadığı mövqe tuturlar: “Bununla yanaşı hesab edirik ki, bu məsələ ikitərəfli münasibətlərimizə kölgə salmaq üçün əsas deyil. Burada biz praqmatik yanaşmaya üstünlük veririk. Münasibətlərimizi hərtərəfli inkişaf etdirməliyik, xüsusilə də Azərbaycan kimi ölkə ilə”.
Axı Prezident Əliyevin mövqeyində nə yanlışdır? Beynəlxalq hüquqa əsaslanaraq Ukraynanın ərazi bütövlüyünə dəstək niyə yanlış olsun ki?
Sözügedən məsələni baki-xeber.com-a şərh edən siyasi ekspert Azər Həsrətin fikrincə, Rusiya kimi dövlətdən yalnız belə “cavab” gözləmək olar: “Ona görə ki, bu, Rusiyadır və təəccüblü heç nə yoxdur. Rusiya bütün dünyanın gözü qarşısında ağ yalanı utanmadan, qızarmadan insanların üzünə deyən bir dövlətdir. Rusiya rəsmiləri də bu dövlətə uyğun şəkildə belə danışmağı bacarır. Prezident İlham Əliyev nə deyir? Deyir ki, biz ölkələrin ərazi bütövlüyündən yanayıq. Biz təcavüzü qəbul edə bilmərik, ona biganə qala bilmərik. Biz BMT çərçivəsində tanınan sərhədləri tanıyırıq. Heç bir dövlətin hüququ yoxdur ki, başqa bir dövlətin suveren ərazisinə müdaxilə etsin. Bunları deyir Prezident Əliyev. Bu da onun kəşfi deyil, dünyada qəbul edilən beynəlxalq prinsiplərdir. Üstəlik, Rusiyanın da üzvü olduğu BMT də belə qəbul edir. Yəni BMT Ukrayna ərazisini necə tanıyırsa, Rusiyanın da canı çıxıb o cür tanımağa borcludur. İlham Əliyev də məhz bunu deyir ki, Ukrayna ərazisinə təcavüz olub, bu ölkənin xalqı da bu təcavüzlə barışmamalıdır. Burada Peskov nə yanlış tapıbsa, arqumentləşdirsin. Konkret beynəlxalq konvensiyalara, beynəlxalq hüquqa uyğun şəkildə izah etsin ki, doğurdan da Prezident Əliyev düz demir. Onu izah etsə, şəxsən mən Rusiyanı dəstəkləməyə başlayacağam. Ortada heç bir fakt, tutarlı əsas yoxdur. Durub deyir Əliyevin mövqeyi yanlışdır. Yanlış o deyil. Yanlış hələ də Rusiya adlı dövlətin mövcud olmasıdır”.
Vidadi ORDAHALLI
