Vasif Həsənli: “Fransa və bəzi Avropa dövlətləri Azərbaycanın bu cür ədalətli yanaşmasını...”
Beynəlxalq təşkilatlar və Avropa dövlətləri insan hüquqları kontekstində Azərbaycana qarşı hücumlar təşkil edir, məsələnin süni və əsasız şəkildə gündəmdə saxlamağa çalışırlar və bundan ölkəmizə qarşı təzyiq vasitəsi kimi istifadə edirlər.
“İnsan hüquqları heç bir ölkənin daxili işi hesab edilə bilməz” deyən Avropa dairələri Bakı Təşəbbüs Qrupu müstəmləkəçilik, müstəmləkə əsarəti və müstəmləkəçilikdən irəli gələn bərabərsizlik məsələlərini Fransanın timsalında qaldırmasına dözümsüzlük göstərirlər.
- Bakı Təşəbbüs Qrupu hüquqları pozulanların hüquqlarını müdafiə edib.
Uzun illər ərzində Fransanınqondarma dənizaşırı əraziləri, əslində isə faktiki müstəmləkələrinin təzyiqlərə məruz qalması, Yeni Kaledoniya, Polineziya, Martinika və digər ərazilərdə mövcud problemlər və onların susdurulması, Fransanın ermənipərəst siyasəti, qondarma “Dağlıq Qarabağ respublikası”nın tanınması, Fransada mövcud olmayan qondarma “Dağlıq Qarabağ”ın qondarma səfirliyinin fəaliyyət göstərməsi, vaxtilə Azərbaycanın müstəmləkə olması, müstəmləkə kimi yaşamağın, azad olmağın nə demək olduğunu da tarixi yaddaşdan yaxşı bilməsi faktdır.
Azərbaycan müasir dövdrə müstəmləkəçilikdən əziyyət çəkən Yeni Kaledoniyanın, Polineziyanın, Martinikanın və Sen-Martenin müstəqilliyini, azadlığını dəstəkləyir.
IV Şuşa Qlobal Media Forumunun açılış mərasimində Prezidenti İlham Əliyev bu barədə də danışıb: “Bilirsiniz, biz Avropa Şurasına qəbul olunarkən mən Azərbaycan nümayəndə heyətinin ilk rəhbəri idim və Strasburqa gəlmişdim. Nümayəndə heyətimizin Avropa Şurası rəhbərliyindən eşitdiyi ilk fikirlərdən biri bu idi ki, insan hüquqları heç bir ölkənin daxili işi hesab edilə bilməz. Biz yaxşı tələbələr idik və bunu öyrəndik. İndi isə Bakı Təşəbbüs Qrupu müstəmləkəçilik, müstəmləkə əsarəti və müstəmləkəçilikdən irəli gələn bərabərsizlik məsələlərini qaldıranda, onlar ittiham olunurlar. Təkcə onlar deyil, hətta Azərbaycan Hökuməti də Fransanın daxili işlərinə qarışmaqda ittiham olunur. Halbuki biz belə etmirik.
Çünki insan hüquqları ilə bağlı məsələlər ümumbəşəri məsələlərdir. Bakı Təşəbbüs Qrupu isə bu mövzunu qlobal gündəliyə çıxaran, bəlkə də ilk və ən səmərəli qeyri-hökumət təşkilatıdır. Uzun illər ərzində Fransanın qondarma dənizaşırı əraziləri, əslində isə faktiki müstəmləkələri təzyiqlərə məruz qalıblar. Orada müxtəlif qanunsuz əməllər törədilib, o cümlədən nüvə sınaqları keçirilib. Polineziyada nə qədər nüvə sınağı keçirilib? Bəlkə 100, bəlkə 200, bəlkə də daha çox. Bunun nəticəsində çox sayda insan zərər çəkib. Çox sayda insan həyatını itirib, sağlamlığına ciddi zərər dəyib. Bakı Təşəbbüs Qrupu isə bu məsələni gündəmə gətirdiyinə görə, təəssüf ki, əsassız olaraq hansısa hibrid müharibə aparmaqda ittiham edilir. Bu, tamamilə ədalətsizdir. Hesab edirəm ki, müstəqil medianın rolu çox böyük əhəmiyyət daşıyır.
Siz çox mühüm bir məsələyə toxundunuz. Uzun illər ərzində Yeni Kaledoniya, Polineziya, Martinika və digər ərazilərdə mövcud problemlərlə bağlı eşidilən o çox zəif səslər koordinasiyalı şəkildə aparılan hücum qruplarının təzyiqi nəticəsində susdurulurdu. Onlara qarşı təzyiqlər göstərilir, hədələr edilirdi. Hətta mənə verilən məlumata görə, Bakı Təşəbbüs Qrupunun təşkil etdiyi beynəlxalq tədbirlərdə iştirak edən bəzi şəxslər saxlanılıblar. Yeri gəlmişkən, onlar təkcə Fransada deyil, İsveçrədə də saxlanılıblar. Onlardan bəziləri hətta həbs olunublar. Bütün bunlar isə insan hüquqlarından danışan, dünyaya demokratiyanın nə olduğunu öyrətməyə çalışan şəxslərin gözü qarşısında baş verir. Bilirsiniz, bumeranq çox təsirli silahdır. Bunu nəzərə almaq lazımdır. Demək istədiyim odur ki, Azərbaycana hücum etmək istəyənlər bizi lazımınca qiymətləndirmədilər.
Azərbaycana "insan haqları daxili məsələ deyil" deyərək hücum edənlər İndi Azərbaycan onların Kaledoniyada, Qvadelupada və başqa yerlərində müstəmləkə siyasətini ifşa edəndə özlərindən çıxırlar, bunu həzm edə bilmirlər”.
Azərbaycanın bu ölkələrdə müstəmləkəçilik problemini qaldırması bu ölkələrin niyə xoşuna gəlmir? Azərbaycan özü də bunu keçmiş müstəmləkə dövləti olaraq qaldırır. Bu ölkələr niyə rahatsız olur?
“Demokrat.az” xəbər portalının direktoru, “Ekoloji Dayanıqlılıq və Təbiətin Qorunması” İctimai Birliyinin sədri Vasif Həsənli baki-xeber.com-a bildirdi ki, bəzi dövlətlər uzun illər insan hüquqlarını universal dəyər kimi təqdim edərək başqa ölkələrdə bu mövzunu tez-tez gündəmə gətirirlər. “Onlar bu cür addımlarla Azərbaycan kimi müstəqil siyasət yürüdən ölkələrə qarşı təzyiq göstərməyə çalışırlar. Buna baxmayaraq, Azərbaycan mütəmadi olaraq müstəmləkəçilik və dekolonizasiya məsələlərini beynəlxalq platformalarda ədalətli şəkildə qaldırır. Xüsusilə Yeni Kaledoniya, Qvadelupa və digər dənizaşırı ərazilərdə yaşayan xalqların hüquqlarını cəsarətli şəkildə müdafiə edir.
Hər zaman Azərbaycanın mövqeyi ondan ibarət olub ki, sözügedən xalqların öz müqəddəratını təyin etməsi və hüquqlarının qorunması beynəlxalq hüququn əhatə etdiyi çərçivədə olmalıdır.
Rəsmi Bakı özünün də tarixdə xarici imperiya dövlətlərin təzyiqindən əziyyət çəkdiyini dəfələrlə bəyan edib. Bu səbəbdən də Azərbaycan hər zaman müstəmləkəçilik irsinin aradan qaldırılmasının vacibliyini müdafiə edir.
Bildiyiniz kimi, son illər Fransa və bəzi Avropa dövlətləri Azərbaycanın bu cür ədalətli yanaşmasını öz daxili işlərinə müdaxilə kimi qiymətləndirməyə çalışırlar. Ancaq Azərbaycan dövləti Fransa və digər Qərbi Avropa ölkələrinə hüquqları tapdalanan xalqların özünüidarə hüququ qazanması ilə bağlı qorxmadan cavab verir. Düşünürəm ki, Azərbaycanın Yeni Kaledoniya, Qvadelupa və digər dənizaşırı ərazilərdə yaşayan xalqların hüquqlarının müdafiəsi ilə bağlı tez-tez məsələ qaldırması rəsmi Bakının hər zaman dünyada ədalətli mövqedə olduğunun göstəricisidir. Bu nümunəvi addımlarımız BMT və dünya ölkələri tərəfindən də ciddi dəstəklənir”-deyə V.Həsənli qeyd etdi.
İradə SARIYEVA
