Rauf Zeyni: “Avropanın o strukturları Azərbaycanın tarixi zəfəri ilə barışmaq istəmirlər və səbəbdən də qərəz nümayiş etdirirlər”
Avropa təsisatları Azərbaycana qarşı qərəzli olsa da, ölkəmiz bu qurumlarla münasibətləri normal saxlamaqda maraqlıdır. Azərbaycan Avropa ölkələri və təsisatları ilə qarşılıqlı hörmətə, əməkdaşlığa əsaslanan ikitərəfli əlaqələrin inkişafında maraqlıdır və bu istiqamətdə səylərini əsirgəmir.
Avropa Komissiyasında anti-Azərbaycan şəbəkəsi mövcuddur və bu şəbəkənin fəaliyyəti ikitərəfli əlaqələrə ciddi zərbələr vurur. Məlumdur ki, Avropa İttifaqının (Aİ) xarici işlər və təhlükəsizlik siyasəti üzrə Komissarı Jozep Borrel Azərbaycana qarşı fəaliyyət göstərib. Onun Beynəlxalq Məhkəmənin sabiq hakimi Okampo kimi korrupsiyaya uğramış şəxslərlə yaxınlığı barədə məlumat dünya mətbuatında yer alıb.
Yeni Komissiya ilə konstruktiv əməkdaşlıq, Avropa İttifaqı Şurasının Prezidenti Koştanın, Avropa diplomatiyasının rəhbəri Kaya Kallasın və Avropa Komissiyasının Prezidenti xanım Ursula Fon der Lyayen Azərbaycana səfərləri diqqəti çəkir.
AŞPA və AP-də anti-Azərbaycan şəbəkəsinin qurduğu ssenarilər əsasında Azərbaycana qarşı müntəzəm hücumların təşkil olunması, AŞPA-da Azərbaycana qarşı sanksiyaların Azərbaycanın öz ərazi bütövlüyü və tam suverenliyini bərpa etməsi ilə bağlı olması və bunun insan hüquqları bəhanəsi ilə həyata keçirilməsi, Azərbaycanın Avropa Şurasına üzvlükdən çıxmağı ciddi şəkildə nəzərdən keçirməsi, buna ciddi əsasların olması faktları mövcuddur. Ölkəmiz dəfələrlə bəyan edib ki, Azərbaycan nümayəndə heyətinin səsvermə hüququ bərpa ediləcəyi halda Azərbaycanın nümayəndə heyəti qayıda bilər.
IV Şuşa Qlobal Media Forumunun açılış mərasimində Prezidenti İlham Əliyev bu mövzuda da bəyanatlar verib.
Prezident Əliyev bildirib: “...Avropa Komissiyası ilə əvvəlki Komissiya zamanı, xüsusən də Avropa diplomatiyasının əvvəlki rəhbəri cənab Borrelin dağıdıcı rolu səbəbindən asan vaxtlarımız olmayıb. O, əslində, Avropa Komissiyası ilə Azərbaycan arasında münasibətləri demək olar ki, dağıtdı. İndi isə səbəbi məlumdur, çünki o, korrupsiyaya uğramış bəzi şəxslərlə, o cümlədən Beynəlxalq Cinayət Məhkəməsinin keçmiş prokuroru cənab Okampo ilə qəti şəkildə əlbir olmuşdur. Okampo öz şərhlərində açıq şəkildə etiraf etmişdir ki, cənab Borrel ondan məvacib alırdı. Bununla belə, cənab Okampoya pul hazırda Ermənistanda ev dustaqlığında olan rus-erməni oliqarxından gəlirdi.
Bir sözlə, bu, Avropa Komissiyasında mövcud olmuş anti-Azərbaycan qrupunun uzun zənciridir. Yaxşı haldır ki, cənab Borrel hazırda siyasətdə deyil. Ümid edirik, əbədi gedib. Yeni Komissiya ilə münasibətlərimiz yaxşılaşmağa başladı. Bu, xüsusən də əlaqələrin yenidən baxılması üçün qarşılıqlı böyük marağı gördüyümüzdən sonra baş verdi və biz bunları dəstəklədik. Sizə sadəcə deyə bilərəm ki, bu ilin bir neçə ayı ərzində Brüsseldən bir sıra mühüm səfər oldu. Martda Avropa İttifaqı Şurasının Prezidenti cənab Koşta, mayda Avropa diplomatiyasının rəhbəri xanım Kallas və iyulda Avropa Komissiyasının Prezidenti xanım Ursula Fon der Lyayen Azərbaycana gəldilər.
Onların və mənim ictimaiyyətə açıqlamalarımızda hər kəs iki tərəfin əməkdaşlıq səviyyəsindən razı qaldıqlarını görə bilər. Təsvir etdiyiniz tərəfdaşlıq sahələri, əlbəttə, nəinki ikitərəfli, o cümlədən daha geniş çərçivə üçün vacibdir. Avropa Şurasının Parlament Assambleyasına gəldikdə isə əfsuslar ki, biz tamamilə başqa mənzərəni görürük və mən şəxsən təəssüf edirəm. Çünki mən 2001-ci ildə Parlament üzvü olanda Azərbaycan nümayəndə heyətinin ilk rəhbəri olmuşam və iki il orada işləmişəm. Bildiyiniz kimi, il ərzində orada dörd sessiya olur...”
Yeni Komissiya ilə konstruktiv əməkdaşlıq, Avropa İttifaqı Şurasının Prezidenti Koştanın, Avropa diplomatiyasının rəhbəri Kallasın və Avropa Komissiyasının Prezidenti xanım Ursula Fon der Lyayen Azərbaycana səfərləri, onların Azərbaycana normal yanaşması faktdır. Amma onlardan əvvəl Borrelin Azərbaycana münasibəti əsl düşmən münasibəti idi. Avropa strukturlarının Azərbaycana qərəzli, münasibəti, yanlış mövqeyi, hücumları Azərbaycanın öz ərazi bütövlüyünü, suverenliyini bərpa etdiyi dövrdən, yəni 2023-cü ildə xeyli dərəcə artdı. Burada Borrel xüsusilə aktivlik edirdi. Avropa təsisatlarında, AŞPA da, Avropa Şurasında Azərbaycana qarşı bu qərəzli münasibətin 2023-cü ildə daha da güclənməsinin səbəbləri nədən ibarətdir?
Bakı İctimai Əməkdaşlıq Mərkəzinin sədri Rauf Zeyni baki-xeber.com-a bildirdi ki, Avropa təsisatlarının Azərbaycana münasibətləri fonunda çox şeylər demək olar. “Yəni biz otuz illik işğal dövründə elə bir tarixi sınaqdan keçdik ki, Avropa Şurasını da, Avropa İttifaqını da, ATƏT də, Avropanın digər beynəlxalq təşkilatları- BMT də, UNESCO da necə mövqe tutduqlarını ortaya qoydular.
Bu qurumların tərkibi dəyişsə də, mahiyyətləri dəyişmir. Təəssüflər olsun belədir. Onların sədrləri bir-birini əvəz etsələr də niyyətləri dəyişmədi. Xüsusilə Azərbaycan olaraq vətəndaş müharibəsindən vətəndaş cəmiyyətinə, işğaldan zəfərə qədər tarixi şərəfli bir yol gəlmişik. O qurumlar 2020-ci ildən sonra Azərbaycanın tarixi zəfərini bizə bağışlaya bilmirlər. Avropanın o strukturları Azərbaycanın tarixi zəfəri ilə barışmaq istəmirlər və səbəbdən də qərəz nümayiş etdirirlər. Müxtəlif güc mərkəzlərinə xidmət edən bu şəxslər, istər Kallas, istər Lyayen istər Borrel, istərsə də digərləri olsun, bunların mahiyyətləri dəyişməyib. Yenə də deyirəm, adlar dəyişir, amma mahiyyət, üslub dəyişmir. Həmin dəst- xəttdir, həmin mövqeysizlikdir. Azərbaycanla həm etibarlı tərəfdaş kimi əməkdaşlıq edirlər, həm gedib Azərbaycanın əleyhinə qərar qəbul edirlər. Bu nə əqidəsizlikdir, bu nə düşüncəsizlikdir. Yəni bu düşüncənin adı yoxdur”.
R.Zeyni vurğuladı ki, bir təşkilat bir ölkə ilə əməkdaşlıq edirsə ona qarşı hər hansı bir qətnamə, qərar qəbul etməsi artıq ikili-üçlü standartlardır. “Biz də bunları otuz-otuz beş ildir görə-görə gəlirik. Amma Azərbaycan ictimaiyyəti bu halların, Azərbaycana qarşı bu təxribatların heç birini qəbul etmir, bu təşkilatların da heç birini dəstəkləmir. Nəyə görə? Ona görə ki, onların fəaliyyəti göz qabağındadır. Elə BMT-nin götürək, 30 il öz qəbul etdiyi qətnamələri icra etmədi. Azərbaycan dövləti o qətnamələri özü icra etmək məcburiyyətində qaldı. Yəni buna görə də bəşəriyyətdə hüquq yoxdur, bəşəriyyətdə ancaq güc var. Biz əvvəl düşünürdük ki, kim haqlıdırsa güc də onun tərəfində olmalıdır. Amma sonra gördük ki, yox, kim güclüdür, o da haqlıdır. Bu baxımdan biz onları səbəblərini bilirik. Onların münasibətlərinin səbəbi nədən ibarətdir? Yalnız və yalnız öz ittifaqlarının, öz şuralarının xeyirinə görə bu məsələləri danışırlar. Amma bizim xalqımızın, dövlətimizin mənafeyini düşünmürlər. Sadəcə olaraq diplomatik münasibətlər, yəni iqtisadi əməkdaşlıq onları maraqlandırır. Bunu da ilk növbədə öz mənafeləri üçün edirlər. Halbuki, bu beynəlxalq təşkilatlar öz öhdəliklərini unutmamalıdırlar ki, onlar həm də xalqların və dövlətlərin rifahı, onların hüquqlarının müdafiəsi üçün yaradılmış təşkilatlardır. Təəssüflər olsun ki, çox zamanlar onlar öz mandatlarından, öz nizamnamələrindən irəli gələn prinsipləri unudurlar. Təəssüf ki, belədir”-deyə R.Zeyni qeyd etdi.
İradə SARIYEVA
