Sahil Kərimli: “Azərbaycanın Cənubi Qafqazdakı liderlik rolu və missiyası uzun illərdir həyata keçirilən praqmatik, uzaqgörən və dəqiq siyasət nəticəsində mümkün olub”
Prezident İlham Əliyev IV Şuşa Qlobal Media Forumunun açılışında Azərbaycanın orta gücə çevrildiyini bildirib. Prezident Əliyev vurğulayıb: “Azərbaycan artıq ortasəviyyəli gücə çevrilir və düşünürük ki, ölkəni ortasəviyyəli güc kimi xarakterizə edən meyarların müəyyənləşdirilməsi mümkündür”.
Prezident qeyd edib:”...Mən bəzi analitik yazıları oxuyuram və həmçinin Azərbaycanın artıq orta gücə çevrilməsi ilə əlaqədar ekspertlərin müəyyən rəyi ilə tanışam. Bununla belə, düşünürəm ki, bu cür toplantı ölkənin orta güc olmasına dair hansı meyarların dəqiq müəyyənləşdirilməsinə kömək edə bilər. Burada müxtəlif meyarlar ola bilər, çünki vahid bir meyar hələ ki, müəyyən edilməyib. Mənim fikrimcə, bu terminologiya ölkənin potensialının, böyük güclərin necə düşündüyü və ya etdiyindən asılı olmayaraq, onun öz milli maraqlarını müdafiə etmək bacarığının, əgər kimsə sizə zərər vurmaq istəyirsə, bütün potensialınızla müqavimət göstərmək qabiliyyətinin etiraf olunmasını nəzərdə tutur.
Müdafiə qabiliyyəti, özü də təkcə hərbi paradda deyil, döyüş meydanında göstərilmiş həmin qabiliyyət vacibdir. Əlbəttə, fikrimcə, mühüm meyarlardan biri hüdudlarınızdan kənarda baş verən hadisələrə təkcə bir sözünüzlə və ya bəyanatınızla təsir göstərmək qabiliyyəti də olmalıdır. Azərbaycan bunu dəfələrlə nümayiş etdirib. Eyni zamanda, bu terminologiyaya aid edilə biləcək meyarlardan biri də məsuliyyətdir. Ölkənizin daxilində və müəyyən dərəcədə bütöv regionda baş verənlərə görə olan məsuliyyətdir. Fikrimcə, sonradan heyət də bu meyara əlavələr edə biləcək. Lakin düşünürəm ki, bütün bu dediklərimi Azərbaycana aid etmək olar. Ola bilsin bu səbəbdən bir sıra ekspertlər bizi orta güc adlandırır və səmimi desəm, mən buna etiraz etmirəm”.
Azərbaycanın Cənubi Qafqazda liderlik rolunu necə dəyərləndirmək olar?
Azərbaycanın regional liderlikdən "orta güc" statusuna yiyələnməsinin kriteriyaları nədir? Azərbaycan həmin kriteriyalara necə cavab verir?
Ekspertlərə görə, orta güc anlayışı, ilk növbədə, böyük dövlətlərin iradəsindən asılı olmayaraq, ölkənin öz milli maraqlarını müdafiə etmək və təhlükələrə qarşı bütün potensialı ilə müqavimət göstərmək bacarığını ehtiva edir.
Orta güc statusunun qlobal və regional siyasətdəki əsas meyarları başqalarının mövqeyindən asılı olmayaraq, suveren qərarlar qəbul etmək və dövlət maraqlarını qətiyyətlə qorumaqdır, kənar təhdidlərə və təzyiqlərə qarşı bütün mövcud resurslarla cavab vermək əzmi, ölkənin yalnız yerləşdiyi regionda deyil, həm də beynəlxalq miqyasda siyasi, iqtisadi və hərbi proseslərin gedişatına birbaşa təsir göstərmək qabiliyyəti, hərbi qələbələrin diplomatik və iqtisadi uğurlarla möhkəmləndirilməsidir.
Poltoloq Sahil Kərimli baki-xeber.com-a bildirdi ki, Azərbaycan uzun illərdir, Cənubi Qafqazda liderlik missiyasını həyata keçirir: “Dünyanın bütün siyasi dairələri, bütün super güclər ölkəmizi Cənubi Qafqazda əsas tərəfdaş, lider kimi qəbul edir və ölkəmizlə bu əməkdaşlığı dərinləşdirməyə çalışır. Əlbəttə ki, Azərbaycanın Cənubi Qafqazdakı liderlik rolu və missiyası uzun illərdir həyata keçirilən praqmatik, uzaqgörən və dəqiq siyasət nəticəsində mümkün olub. Xüsusilə də 44 günlük Vətən müharibəsindəki tarixi qələbəmiz və 1 günlük lokal antiterror tədbirləri nəticəsində ərazi bütövlüyümüzü və suverenliyimizi tam bərpa etdikdən sonra Azərbaycan Cənubi Qafqazda tamamilə yeni reallıqlar yaradıb. Bu gün bu reallıqları haqlı və ədalətli olaraq diktə edir. Təbiidir, Azərbaycan Cənubi Qafqazda ilk növbədə sülh və təhlükəsizliyin əldə olunması üçün çox ciddi, çoxşaxəli siyasət həyata keçirir. Bölgəmizdə rifahın, sabitliyin, təhlükəsizliyin dayanıqlı və uzunmüddətli olması üçün bütün mümkün tədbirlər səfərbər olunub. Xüsusilə də Ermənistanla sülh müqaviləsinin imzalanması, Ermənistanın sülhə məcbur edilməsi istiqamətində həyata keçirilən qətiyyətli siyasət, eyni zamanda bölgədə nəqliyyat kommunikasiya dəhlizlərinin şaxələndirilməsi, digər iqtisadi dirçəlişin, iqtisadi yüksəlişin əldə olunması istiqamətində də ölkəmiz çox ciddi addımlar atır. Biz Azərbaycanın dövlət və milli maraqlarına əsaslanan siyasətini daim müşahidə edirik. Bununla yanaşı, ölkəmizin müəllifi olduğu Zəngəzur dəhlizi layihəsinin həyata keçirilməsi istiqamətində də Azərbaycan çox ciddi addımlar atır.
Bu dəhliz həm Orta dəhlizin əsas açarı kimi xüsusi rol oynayacaqdır. Yəni Çindən Avropaya qədər uzanacaq bir nəqliyyat dəhlizinin əsas açarı kimi Zəngəzur dəhlizi layihəsi həyata keçiriləcəkdir”.
S.Kərimli qeyd etdi ki, eyni zamanda da Azərbaycanın əsas hissəsi ilə digər bir hissəsi Naxçıvanı quru yolla maneəsiz birləşdirən bir dəhlizdən söhbət gedir. S.Kərimlinin sözlərinə görə, təbiidir, Azərbaycan eyni zamanda uzun illərdir ki, Avropanın enerji təhlükəsizliyində də çox ciddi rol oynayır. “Avropa ilə iqtisadi əməkdaşlığın dərinləşdirilməsi, nəqliyyat kommunikasiya xətlərinin şaxələndirilməsi vasitəsilə Avropanın iqtisadiyyatına verilmiş olan töhfə, enerji təhlükəsizliyinə vermiş olduğu töhfə danılmazdır və bu da bütün bu amillər də Azərbaycanın bölgəmizdəki yerini və rolunu durmadan möhkəmləndirir. Biz daim dünyanın aparıcı ölkələrinin, xüsusilə də Qərb, Avropa ölkələrinin Azərbaycana olan marağının artdığının şahidi oluruq. Qarşıdakı dövrlərdə də Azərbaycanın müəyyənləşdirdiyi konkret və uzaqgörən hədəflər var və bu hədəflərin həyata keçirilməsi istiqamətində Azərbaycan yenə də öz liderliyini Cənubi Qafqazda qoruyub saxlayır və möhkəmləndirir”-deyə S.Kərimli vurğuladı.
İradə SARIYEVA
