Arzu Nağıyev: “Orta Asiya və Azərbaycanın vahid iqtisadi, siyasi məkana çevrilməsi çox mühüm məsələdir”
Azərbaycan-Mərkəzi Asiya formatı çərçivəsində tərəflər əsasən bir neçə istiqamətdə fəaliyyət göstərir. Azərbaycan Mərkəzi Asiya ölkələrini Avropa bazarları ilə birləşdirən Orta Dəhlizdə mühüm qovşaq rolunu oynayır.
Mərkəzi Asiyanın zəngin enerji potensialının Xəzər dənizi üzərindən dünya bazarlarına çıxarılması müzakirə olunur.
Region ölkələri arasında iqtisadi əlaqələrin dərinləşdirilməsi və vahid logistika sistemlərinin formalaşdırılmasına dair təşəbbüslər irəli sürülür.
Azərbaycanın bu formatda yer alması onun regional qərarların qəbulunda söz sahibi olmasına və türk dünyası arasında əlaqələrin güclənməsinə xidmət edir.
Azərbaycanla Mərkəzi Asiya ölkələri arasında tarixi köklər, birlik, sıx dostluq əlaqələri mövcuddur. Azərbaycan-Mərkəzi Asiya formatı regionlar arasında geosiyasi və geoiqtisadi əlaqələrə müsbət təsir göstərəcək, Mərkəzi Asiya Azərbaycanla vahid bir iqtisadi və siyasi məkanda birləşir, bağlantılar, nəqliyyat, logistika layihələrinin icrasına müsbət təsir edəcək.
IV Şuşa Qlobal Media Forumunun açılış mərasimində Prezidenti İlham Əliyev Azərbaycan-Mərkəzi Asiya formatı barədə də danışıb.
Prezident Əliyev bildirib: “O ki qaldı Azərbaycan-Mərkəzi Asiya formatına, burada da Prezident Mirziyoyevin müstəsna xidmətləri, xüsusi rolu var. Azərbaycan artıq tamhüquqlu üzv kimi bu Məşvərət Şurasına qoşuldu. Mən fəxri qonaq qismində iki dəfə Zirvə görüşlərinə dəvət edilmişdim, son dəfə isə artıq Azərbaycan-Mərkəzi Asiya vahid bir Məşvərət Şurası yaradılmışdır. Bu, bizi çox qürurlandırır, çox sevindirir. Bu, deyə bilərəm ki, nadir bir hadisədir. Çünki biz coğrafi nöqteyi-nəzərdən, təbii ki, Cənubi Qafqazda yerləşirik. Amma mədəni, tarixi, etnik əlaqələr o qədər güclüdür və siyasi əlaqələr o qədər çoxşaxəlidir ki, dost Mərkəzi Asiya ölkələri bizi qəbul etməyə qərar verdilər.
Bu gün bu, geosiyasi və geoiqtisadi əlaqələrə də müsbət təsir göstərəcək. Çünki beləliklə, Mərkəzi Asiya Azərbaycanla vahid bir iqtisadi və siyasi məkanda birləşir. Eyni zamanda, bağlantılar, nəqliyyat, logistika layihələrinin icrası istiqamətində bunun çox böyük mənası var. Əlbəttə, deyə bilərəm ki, Prezident Şavkat Mirziyoyevin uzaqgörənliyi və strateji baxışları burada çox önəmli rol oynamışdır...”
Azərbaycanın və Orta Asiyanın vahid iqtisadi siyasi məkana çevriıməsinə Azərbaycan nə kimi töhfələr verib və verir?
Millət vəkili Arzu Nağıyev baki-xeber.com-a bildirdi ki, Azərbaycan əlverişli coğrafi mövqeyə malikdir, inkişaf etmiş nəqliyyat infrastrukturu var. “Enerji layihələri və türk dövlətləri ilə əməkdaşlığı sayəsində Orta Asiyanın Avropa ilə iqtisadi və siyasi əlaqələrinin güclənməsinə, eyni zamanda regionda vahid iqtisadi məkanın formalaşmasına çox mühüm töhfələr verir və gələcəkdə də düşünürəm ki, bu proses genişləndiriləcəkdir. Əsas məqam da ondan ibarətdir ki, Orta Asiya və Azərbaycanın vahid iqtisadi, siyasi məkana çevrilməsi çox mühüm məsələdir. Bu həm siyasi, həm iqtisadi, həm mənəvi, hətta deyərdim mədəni cəhətdən belədir. Nəqliyyat və logistika əlaqələrinin inkişafı Azərbaycan Avropa ilə Orta Asiyanı birləşdirən Orta Dəhliz, yəni Transxəzər beynəlxalq nəqliyyat marşrutunun əsas iştirakçılarından biridir. Enerji əməkdaşlığında bu da çox mühüm məsələdir. Azərbaycan Xəzər hövzəsində enerji layihələrinin həyata keçirilməsində fəal iştirak edir. İstər neft- qazla, yaşıl enerji, alternativ enerji ilə bağlı Azərbaycanla Orta Asiya ölkələri arasında əməkdaşlığı genişləndirir”.
A.Nağıyev qeyd etdi ki, Bakı Beynəlxalq Dəniz Ticarət Limanı, Bakı-Tbilisi-Qars dəmiryolu və müasir avtomobil yolları Orta Asiya ölkələrinin dünya bazarlarına çıxışını asanlaşdırır. “Ticarətin genişləndirilməsi həm Azərbaycana, həm Orta Asiyaya çox mühüm müsbət dividendlər gətirir. İstər Qazaxıstan, Özbəkistan, Türkmənistan və digər Orta Asiya ölkələri ilə ticarət dövriyyəsini artırır. Kömrük və nəqliyyat sahəsində əməkdaşlıq malların daha sürətli səmərəli daşınmasına imkan yaradır. Ən mühüm amillərdən də biri türk dövlətləri arasında inteqrasiyanın genişləndirilməsidir. Məlumdur ki, Azərbaycan Türk Dövlətləri Təşkilatı çərçivəsində iqtisadi, siyasi və mədəni əməkdaşlığın genişlənməsinə dəstək verir, xüsusi çəkisi var. Birgə investisiya layihələri, nəqliyyat təşəbbüslərini həyata keçirir, vahid iqtisadi məkanın formalaşmasına xidmət edir. Bu da ki, həm siyasi dialoq, həm də regional sabitliyə gətirib çıxara bilər. Azərbaycan regional əməkdaşlıq platformasında da fəal iştirak edir. Dövlətlərarası dialoqlar, qarşılıqlı etimad da çox mühüm məsələdir. Həm iqtisadi inteqrasiya, həm siyasi, həm gələcəkdə hərbi məsələlərdə də hər bir dövlətə olan təhdidin qarşısını almaq üçün atılacaq addımlarda da bu birgə aparılan siyasət çox mühüm əhəmiyyət kəsb edir. Ən mühüm məqamlardan da biri kimi qeyd edərdim ki, Prezident İlham Əliyevin apardığı siyasət və onun bu dövlətlərin rəhbərləri ilə olan şəxsi münasibətləri, bir-birinə inam da mühüm rol oynayır. Yəni bu da çox mühüm əhəmiyyət kəsb edir və bunu genişləndirməkdə də hər bir dövlət maraqlıdır”-deyə A.Nağıyev vurğuladı.
İradə SARIYEVA
