Bəhruz Quliyev: “Prezidentin mesajı o deməkdir ki, dövlətlər üçün təhlükəsizlik heç vaxt birdəfəlik əldə olunan nəticə deyil”
Şuşada “Sülhün təşviqində medianın missiyası: Həqiqətin bərpası və etimadın yenidən qurulması” mövzusunda keçirilən IV Şuşa Qlobal Media Forumunun açılış mərasimində çıxış edən Prezident İlham Əliyev dünyanın dəyişdiyini, yeni təhdidlərin və təxribatların ortaya çıxdığını bildirib:
“Amma biz gələcəyə baxmalıyıq. Dünya dəyişir və bu barədə də danışmışıq. Yeni təhdidlər, yeni təxribatlar ortaya çıxır. Əgər kimsə fikirləşir ki, bizi istəməyən qüvvələr bizdən əl çəkəcək, olmayacaq, heç vaxt olmayacaq. Bu mübarizə daimi olmalıdır - mübarizə öz hüquqlarımızı qorumaq üçün, mübarizə öz milli kimliyimizi qorumaq üçün, öz müstəqilliyimizi öz əlimizdə saxlamaq üçün. Bir çox misallar var ki, bəzi ölkələr, onların rəhbərləri kiminsə qanadının altına sığınırlar və hesab edirlər ki, bu, onları qoruyacaq. Amma nəticə etibarilə olurlar qurban. Böyük oyunların qurbanları”.
Bir sözlə, Prezident demək istədi ki, düşmənlərimiz heç vaxt bizdən əl çəkməyəcəklər və biz hər zaman təhdidlərə hazır olmalıyıq.
Sözügedən məsələni baki-xeber.com-a şərh edən “SƏS” qəzetinin baş redaktoru, politoloq Bəhruz Quliyevin fikrincə, Prezident İlham Əliyevin IV Şuşa Qlobal Media Forumunda səsləndirdiyi fikirlər təkcə bugünkü geosiyasi vəziyyətin təhlili deyil: “Bu, həm də Azərbaycanın gələcək təhlükəsizlik strategiyasının əsas konturlarını müəyyənləşdirən mühüm siyasi mesajdır. Dövlət başçısının “əgər kimsə fikirləşir ki, bizi istəməyən qüvvələr bizdən əl çəkəcək, olmayacaq, heç vaxt olmayacaq” sözləri emosional çağırış deyil, beynəlxalq münasibətlər sisteminin reallıqlarına söykənən siyasi xəbərdarlıqdır. Müasir dünya əvvəlki dünya deyil. Güclər nisbəti dəyişir, yeni siyasi ittifaqlar yaranır, iqtisadi rəqabət daha da sərtləşir, informasiya müharibələri isə klassik müharibələrin ayrılmaz hissəsinə çevrilib. Belə bir şəraitdə Azərbaycanın müstəqil siyasəti, artan nüfuzu, enerji və nəqliyyat layihələrindəki strateji mövqeyi, eləcə də Cənubi Qafqazda yaratdığı yeni reallıqlar təbii olaraq ölkəmizi istəməyən dairələrin də diqqət mərkəzində saxlayır. Prezidentin əsas mesajı ondan ibarətdir ki, dövlətlər üçün təhlükəsizlik heç vaxt birdəfəlik əldə olunan nəticə deyil. Onu hər gün qorumaq, möhkəmləndirmək və inkişaf etdirmək lazımdır. Müstəqillik də, suverenlik də, milli kimlik də daim müdafiə tələb edən dəyərlərdir. Tarix göstərir ki, zəifləyən, ayıq-sayıqlığını itirən dövlətlər xarici təsirlərin və geosiyasi oyunların qurbanına çevrilirlər”.
Politoloq onu da qeyd etdi ki, dövlət başçısının "kiminsə qanadının altına sığınanlar sonda böyük oyunların qurbanı olurlar" fikri də təsadüfi deyildi: “Bu, Azərbaycanın uzun illər ərzində seçdiyi müstəqil xarici siyasət kursunun doğruluğunun növbəti təsdiqidir. Azərbaycan heç bir güc mərkəzinin alətinə çevrilmədən, yalnız milli maraqlarını rəhbər tutaraq siyasət yürüdür. Məhz bu siyasət ölkəmizə həm siyasi sabitlik, həm də beynəlxalq etimad qazandırıb. Hesab edirəm ki, bu çıxışda medianın üzərinə düşən missiya da xüsusi vurğulanır. Bu gün təhdidlər yalnız hərbi xarakter daşımır. Dezinformasiya, saxta xəbərlər, ictimai rəyi manipulyasiya etməyə yönəlmiş informasiya hücumları da milli təhlükəsizliyin tərkib hissəsinə çevrilib. Ona görə də həqiqətin müdafiəsi, cəmiyyətin düzgün məlumatlandırılması və milli maraqların informasiya müstəvisində qorunması medianın strateji vəzifələrindəndir.
Prezident İlham Əliyevin Şuşadan verdiyi mesajın mahiyyəti ondan ibarətdir ki, Azərbaycan arxayınlaşmamalıdır. Qarabağda əldə olunan tarixi Zəfər yeni mərhələnin başlanğıcıdır. Bu mərhələdə əsas vəzifə dövlətçiliyi daha da möhkəmləndirmək, milli birliyi qorumaq, iqtisadi gücü artırmaq, güclü ordu saxlamaq və informasiya təhlükəsizliyini təmin etməkdir. Bəli, Azərbaycanın uğurlarını həzm edə bilməyən qüvvələr bundan sonra da müxtəlif vasitələrlə təzyiq göstərməyə çalışacaqlar. Lakin Prezidentin də vurğuladığı kimi, milli həmrəylik, güclü dövlət idarəçiliyi, müstəqil siyasət və ayıq-sayıqlıq olduğu müddətdə heç bir xarici təhdid Azərbaycanın inkişaf yolunu dəyişə bilməz. Şuşadan səslənən bu mesaj həm cəmiyyətə, həm də beynəlxalq ictimaiyyətə ünvanlanan aydın siyasi bəyanatdır. Bu o deməkdir ki, Azərbaycan öz müstəqilliyini, milli kimliyini və suverenliyini qorumaq əzmindədir və bu mübarizə davamlı xarakter daşıyacaq”.
Vidadi ORDAHALLI
