Zaur İbrahimli: “İlin sonuna qədər bu istiqamətdə Avropa Şurası tərəfindən addımlar atılmazsa, Azərbaycan qurumu üzvlüyündən çıxacaq”
“Azərbaycan Avropa Şurasından tam çıxmağı nəzərdən keçirir”.
Bunu Prezident İlham Əliyev Şuşada "Sülhün təşviqində medianın missiyası: Həqiqətin bərpası və etimadın yenidən qurulması" mövzusunda keçirilən IV Şuşa Qlobal Media Forumunun açılış mərasimində çıxışı zamanı deyib.
Prezident Əliyev bildirib ki, Avropa Şurasının Parlament Assablemsiyasına burada başqa bir mənzərə var: "Mən təəssüf edirəm ki, belə bir hal baş verib. Vaxtilə mən 2001-ci ildə Azərbaycan Parlamentində üzv olduqda nümayəndə heyətinə rəhbər idim. İki il orada çalışdım. Orada il ərzində 4 sessiya keçirildi. Mənim üçün bu xoşa gəlməz hadisəsi idi. 2023-cü ildə biz öz legitim hüququmuzdan istifadə edərək seperatçıların əlində qalan torpaqlarımızı işğaldan azad etdik. Lakin Azərbaycanı cəzalandırmaq üçün qətnamələr qəbul etdilər".
Prezident bildirib ki, 2024-cü ildə yanvarında Azərbaycan nümayəndə heyətinin akkreditasiyanı sual altına çəkdilər və səsvermə hüququndan məhrum etdilər:
"Bu, sırf insan hüquqları ilə bağlı məsələ deyildi. Onunla bağlı olsaydı daha əvvəldən edərdilər. Bu, sadəcə bizimlə, ərazi bütövlüyümüzlə bağlı bir cəza idi. Azərbaycan nümayəndə heyəti çox müdrik qərar qəbul elədi. Onlar görüşlərdə iştirakdan imtina etdilər. Əgər bizim səsvermə hüququmuz yoxdursa, nəyə görə biz orada olmalıyıq?
Buna görə də biz onların qərarlarını tanımırıq. Biz hakimlər üçün səs verməmişik, iki ildir biz ayrı-seçkiliyə məruz qalırıq. Açıq şəkildə deyirəm ki, Azərbaycan tam olaraq təşkilatdan çıxmağı gözdən keçirir. Nəinki üzvlüyümüzün dayandırılması, dondurulması, birmənalı olaraq həmin təchizatdan getməyimizi nəzərdən keçiririk. Avropa Şurasının baş katibi mənimlə əlaqə saxladı və xahiş etdi ki, bunu etməyək, vəziyyətin yaxşılaşdırılması üçün çıxış yolu tapmalıyıq".
Politoloq Zaur İbrahimli baki-xeber.com-a bildirdi ki, Avropa Şurasının öz real missiyasını bir kənara qoyaraq siyasi təzyiq platformasına çevrilməsi ikitərəfli münasibətlərdə əsas problem kimi qalır. “Avropa Şurasının əvvəllər "siyasi məhbus", söz azadlığı”, “demokratiya” məsələləri ilə əlaqədar Azərbaycana təzyiq göstərməyə çalışırdı. Hazırda isə biz artıq yeni trendin şahidiik. Bu gün guya erməni hərbi əsirləri, guya Qarabağdan məcburi köçmüş ermənilərin hüquqlarının qorunması məsələləri gündəliyə gətirilir. Lakin baxmayaraq ki, Ermənistan siyasi rəhbərliyi belə bunu yalanlayır. Amma Avropa Şurası rəhbərliyi inadla bu məsələni gündəliyə gətirirlər. Xüsusən Avropa Şurasına təsir edən qüvvələr, biz bu məsələdə Fransa diplomatiyasını da qeyd etməliyik. Demək olar ki, hər sessiyada bunlar müzakirə olunur. Məqsəd aydındır. Məqsəd Azərbaycanı təzyiq altında saxlamaq və "bu problemlərlə əlaqədar hüquqi baza formalaşdırmaqdır". Azərbaycan dəfələrlə Avropa Şurasının erməni lobbisinin təsiri altında olduğunu, Azərbaycana qarşı sərt rəqabət aparan ölkələrin maliyyə imkanlarından yararlanması barədə faktlar, dəlillər ortaya qoyub. Eyni zamanda Avropa Şurası ilə ikitərəfli müzakirələr də aparılıb. Müxtəlif formatlarda işçi qrupları yaradılıb. Lakin buna baxmayaraq, Avropa Şurasının mövqeyi dəyişməyib. Əvvəllər Azərbaycan cəmiyyətində belə bir fikir var idi ki, biz öz həqiqətlərimizi daha geniş təbliğ etdikcə real məlumatları qərar qəbul edən şəxslərə çatdırdıqca bu mövqe dəyişəcək”.
Z.İbrahimlinin qeyd etdiyinə görə, biz güman edirdik ki, bu daha çox həm də erməni təbliğatının güclü olması ilə əlaqədardır. “Bəzən bizdə belə rəy formalaşırdı ki, ola bilsin, biz özümüzü düzgün ifadə edə bilmirik. Lakin İkinci Qarabağ savaşından və Azərbaycan öz ərazi bütövlüyünü tam bərpa etməsindən sonra aydın oldu ki, bu cür təsəvvürlər tamamilə yanlış imiş. Azərbaycana qarşı real siyasi təzyiq məqsədləri var. Bu, Azərbaycanın xarici siyasət qərarlarına, Azərbaycanın transmillı layihələrinə təsir etmək və öz dividendlərinə nail olmaq məqsədi daşıyır. Artıq Azərbaycanda heç kim buna şübhə etmir. Avropa Şurası Azərbaycan cəmiyyətində tamamilə iflasa uğrayıb və bu təşkilata heç bir etimad qalmayıb. Bu baxımdan top Avropa Şurasının meydançasındadır. Əgər onlar ikitərəfli münasibətləri düzəltmək və Azərbaycanın yenidən qurumun fəaliyyətində öz işini bərpa etməsini istəyirlərsə, real, praktik addımlar atmalıdırlar. Onlar öz tərəflərində müzakirəyə başlamalıdırlar və real zəmanətlər təqdim etməlidirlər ki, gələcəkdə bu cür hadisələr təkrarlanmayacaq. Əgər bu cür zəmanətlər veriləcəksə və real addımlar atılacaqsa, düşünürəm ki, Azərbaycan öz mövqeyini yenidən baxa bilər. Düşünürəm bunun üçün də o qədər böyük zaman yoxdur. Hesab edirəm ki, ilin sonuna qədər bu istiqamətdə Avropa Şurası tərəfindən addımlar atılmazsa, Azərbaycan bu qurumun üzvlüyündən çıxacaq”-deyə Z.İbrahimli qeyd etdi.
İradə SARIYEVA
