Arzuxan Əlizadə: “Vəziyyətin yenidən dəyərləndirilməsi ilk növbədə ondan ibarətdir ki...”
Prezident İlham Əliyev IV Şuşa Qlobal Media Forumunun açılışında bəyan edib ki, Cənubi Qafqaz vəziyyət kəskin şəkildə dəyişib və buna səbəb İkinci Qarabağ müharibəsi olub.
Prezident Əliyev qeyd edib ki, çünki bir çox yataqlar yerindən tərpəndi. Regionda baş verən digər hadisələr – Azərbaycan tərəfindən suverenliyinin tam bərpa edilməsi, Ermənistanın avropayönümlü fəaliyyəti və bununla bağlı proseslər və s. Zənnimcə, bu, artıq, ümumiyyətlə, həm təhlilçilər tərəfindən, həm də dövlət səviyyəsində vəziyyətin yenidən dəyərləndirilməsini tələb edir.
Millət vəkili Arzuxan Əlizadə baki-xeber.com-a bildirdi ki, Prezident İlham Əliyevin "Cənubi Qafqazda vəziyyətin yenidən dəyərləndirilməsi tələb olunur" fikri regionda son illər baş verən fundamental geosiyasi dəyişikliklərə işarədir. “İkinci Qarabağ müharibəsi və sonrakı antiterror tədbirləri nəticəsində Azərbaycan öz ərazi bütövlüyünü və suverenliyini tam bərpa etdi. Bununla da, təxminən otuz il ərzində mövcud olmuş status tamamilə aradan qalxdı və regionda yeni siyasi reallıqlar formalaşdı. Bu reallıqları nəzərə almadan Cənubi Qafqazdakı prosesləri qiymətləndirmək artıq mümkün deyil.
Vəziyyətin yenidən dəyərləndirilməsi ilk növbədə ondan ibarətdir ki, həm region ölkələri, həm də beynəlxalq aktorlar əvvəlki yanaşmalardan imtina etməlidirlər. Uzun illər beynəlxalq vasitəçilər fəaliyyətlərini həll olunmamış münaqişə üzərində qururdular. Bu gün isə həmin münaqişə artıq mövcud deyil. Yeni mərhələdə əsas prioritet sülh müqaviləsinin imzalanması, sərhədlərin delimitasiya və demarkasiyası, nəqliyyat-kommunikasiya xətlərinin açılması və regional iqtisadi əməkdaşlığın genişləndirilməsidir”.
A.Əlizadə vurğuladı ki, Prezidentin Ermənistanın xarici siyasət kursuna toxunması da təsadüfi deyil. “Ermənistanın Avropa İttifaqı ilə yaxınlaşması və digər geosiyasi istiqamətlərdə atdığı addımlar bölgədə yeni siyasi balans formalaşdırır. Lakin istənilən inteqrasiya cəhdi regionda sabitliyə xidmət etməli, yeni qarşıdurma və geosiyasi rəqabət yaratmamalıdır. Əks halda, bu, Cənubi Qafqazda sülh prosesinə mənfi təsir göstərə bilər.
Bu baxımdan, Prezident İlham Əliyevin səsləndirdiyi fikir həm regional dövlətlərə, həm də beynəlxalq ictimaiyyətə ünvanlanmış mühüm mesajdır. Yeni geosiyasi reallıqlar qəbul edilməli, siyasi qərarlar da məhz bu reallıqlar əsasında verilməlidir. Azərbaycan artıq qalib dövlət kimi bölgədə sülhün, əməkdaşlığın və qarşılıqlı faydalı münasibətlərin tərəfdarıdır. Regionun gələcəyi köhnə münaqişə yanaşmaları ilə deyil, yeni siyasi reallıqlar və qarşılıqlı hörmət prinsipi əsasında qurulmalıdır”-deyə A.Əlizadə qeyd etdi.
İradə SARIYEVA
