Ceyhun Məmmədov: “İnformasiya müharibələri, kiber təhdidlər, ictimai rəyin manipulyasiyası və məqsədli dezinformasiya kampaniyaları dövlətlərin üzləşdiyi ən ciddi çağırışlar sırasındadır”
Xoşbəxtlikdən Azərbaycanın nə mövcud, nə də potensial daxili riskləri yoxdur. Bunu Prezident Əliyev IV Şuşa Qlobal Media Forumunda bildirib.
“Bütün risklər sərhədlərimizin kənarında formalaşır. Siyasi xarakterli risklər çox cüzidir. İdeoloji təxribatlarla bağlı riskləri də ciddi hesab etmirik. Çünki indiyədək belə cəhdlər çox olub, amma onların heç biri uğur qazanmayıb. Azərbaycan dövləti və cəmiyyəti Konstitusiyamızda təsbit olunmuş prinsiplərə sarsılmaz şəkildə sadiqdir. Fiziki təhlükələr isə əlbəttə ki, mövcuddur. Müasir müharibələrin xarakterini nəzərə alsaq, bu gün demək olar ki, heç bir ölkə özünü tam təhlükəsiz hesab edə bilməz. Xüsusilə də iki müharibə aparan dövlət arasında yerləşən bir ölkə üçün əsas təhlükə məhz budur. Üstəlik, həmin müharibələrin həm gedişi, həm də sonrakı nəticələri tamamilə proqnozlaşdırıla bilməz. Ona görə də bizim üçün əsas risk Azərbaycanı hansısa avantüralara cəlb olunmaq cəhdləridir”-deyə ölkə başçısı vurğulayıb.
Hansı avantüralara cəlb olunmaq cəhdindən söhbət gedir, yaxud gedə bilər?
Millət vəkili Ceyhun Məmmədov baki-xeber.com-a bildirdi ki, Şuşa artıq təkcə Azərbaycanın mədəniyyət paytaxtı deyil, bu şəhər eyni zamanda beynəlxalq dialoqun, fikir mübadiləsinin və qlobal əməkdaşlığın mühüm ünvanlarından birinə çevrilib. “IV Şuşa Qlobal Media Forumu bir daha təsdiq etdi ki, Azərbaycan beynəlxalq gündəmdə etibarlı tərəfdaş, sülhü və dialoqu təşviq edən, qlobal çağırışların müzakirəsi üçün platforma yaradan ölkə kimi öz mövqeyini daha da möhkəmləndirir.
Bu gün informasiya yalnız xəbər ötürən vasitə deyil. İnformasiya dövlətlərin təhlükəsizliyinə, beynəlxalq münasibətlərə, ictimai rəyə və qlobal proseslərə birbaşa təsir göstərən strateji amilə çevrilib. Təəssüf ki, müasir dövrdə dezinformasiya, saxta xəbərlər, informasiya manipulyasiyaları və ikili standartlar da beynəlxalq münasibətlərin ayrılmaz hissəsinə çevrilib. Belə bir şəraitdə həqiqətin qorunması, məsuliyyətli jurnalistikanın təşviqi və etibarlı informasiya mühitinin formalaşdırılması hər zamankından daha böyük əhəmiyyət kəsb edir.
Məhz buna görə IV Şuşa Qlobal Media Forumunun "Sülhün təşviqində medianın missiyası: Həqiqətin bərpası və etimadın yenidən qurulması" mövzusuna həsr olunması olduqca aktual və zamanın çağırışlarına cavab verən seçimdir. Sülh yalnız siyasi razılaşmalarla təmin olunmur. Sülh eyni zamanda doğru informasiyanın yayılması, qarşılıqlı etimadın möhkəmləndirilməsi və media məsuliyyətinin artırılması ilə mümkündür.
Forum çərçivəsində Prezident İlham Əliyevin çıxışı iştirakçılar tərəfindən böyük maraqla qarşılandı. Prezident İlham Əliyevin Azərbaycanın xarici siyasəti, regional proseslər, beynəlxalq təhlükəsizlik və informasiya mühiti ilə bağlı səsləndirdiyi fikirlər dünyanın aparıcı media qurumları tərəfindən geniş işıqlandırıldı. Xüsusilə Prezident İlham Əliyevin səsləndirdiyi bu fikir müasir dövrün reallıqlarını aydın şəkildə ifadə edir: "Bizim üçün yeganə risk Azərbaycanı müəyyən avantüralara cəlb etmək cəhdləridir. Keçmişdə də belə olmuşdur. Keçmişdə bu, siyasi xarakter daşıyırdı. Biz bunun öhdəsindən uğurla gəldik. Bu gün isə bu avantüralar daha ciddi və təhdidedici xarakter daşıyır. Ona görə də özümüzü müdafiə etməyə, konsolidasiya edilmiş müəyyən dairələrlə mübarizə aparmağa öyrəşmişik."
Bu fikirlər bir daha göstərir ki, milli təhlükəsizlik anlayışı artıq yalnız hərbi və siyasi müstəvi ilə məhdudlaşmır. İnformasiya müharibələri, kiber təhdidlər, ictimai rəyin manipulyasiyası və məqsədli dezinformasiya kampaniyaları dövlətlərin üzləşdiyi ən ciddi çağırışlar sırasındadır. Azərbaycan isə bu çağırışları düzgün qiymətləndirərək informasiya təhlükəsizliyinin möhkəmləndirilməsi, milli maraqların qorunması və beynəlxalq əməkdaşlığın inkişafı istiqamətində ardıcıl siyasət həyata keçirir”.
C.Məmmədovun fikrincə, təsadüfi deyil ki, builki forum xarici medianın da diqqət mərkəzində oldu. “Dünyanın müxtəlif ölkələrindən nüfuzlu media qurumları Şuşa Qlobal Media Forumunu beynəlxalq media dialoqu üçün mühüm platforma kimi qiymətləndirdilər. Xarici mətbuatda forumun əsas mövzuları, dezinformasiyaya qarşı mübarizə, süni intellekt dövründə medianın rolu və Prezident İlham Əliyevin beynəlxalq gündəmə dair səsləndirdiyi fikirlər geniş şəkildə işıqlandırıldı. Bu, bir daha göstərir ki, Şuşa Qlobal Media Forumu artıq təkcə Azərbaycanın deyil, qlobal media gündəliyinin mühüm hadisələrindən birinə çevrilib.
Şuşada belə mötəbər tədbirlərin keçirilməsi xüsusi rəmzi məna daşıyır. Vaxtilə işğalın ağır nəticələrini yaşamış bu şəhər bu gün beynəlxalq konfransların, mədəni tədbirlərin və qlobal forumların keçirildiyi nüfuzlu mərkəzdir. Bu, Azərbaycanın həyata keçirdiyi genişmiqyaslı bərpa və quruculuq işlərinin, eyni zamanda sülhə, əməkdaşlığa və açıq dialoqa sadiqliyinin bariz nümunəsidir” - deyə C.Məmmədov qeyd etdi.
İradə SARIYEVA
