Ramil Məmmədli: “Həmin raketlər ölkə ərazisində qaldığı müddətcə Ankaraya F-35-lərin verilməsi real deyil”
Vaşinqtondan Ankaraya F-35 mesajı gəlib. ABŞ rəsmisi razılaşmanın müəyyən şərtlərlə mümkün ola biləcəyini açıqlayıb. Belə ki, ABŞ-ın NATO-dakı səfiri Metyu Uitaker CNN telekanalına müsahibəsində Türkiyəyə F-35 qırıcılarının tədarükü ilə bağlı razılaşmanın bütün hüquqi tələblər yerinə yetiriləcəyi təqdirdə reallaşa biləcəyini bildirib.
Uitaker Konqresin F-35 qırıcı təyyarələri ilə bağlı texniki məlumatların Rusiyanın əlinə keçməsi potensialı ilə bağlı narahatlıqlarını etiraf edib. Onun sözlərinə görə, bu məsələdə əsas şərtlərdən biri Rusiyadan alınmış S-400 zenit-raket kompleksləri ilə bağlı hüquqi tələblərin yerinə yetirilməsidir. Uitaker vurğulayıb ki, həmin tələblər yerinə yetirilərsə, F-35 proqramı üzrə razılaşmanın həyata keçirilməsi mümkündür.
Bütün bu deyilənlərin fonunda, Türkiyə S-400-ləri ölkədən çıxarmayacağı təqdirdə ABŞ F-35-ləri verəcəkmi?
Sözügedən məsələyə aydınlıq gətirən hərbi ekspert Ramil Məmmədli baki-xeber.com-a açıqlamasında bunu istisna etdi: “Türkiyə S-400-lərlə bağlı qəti addımlar atmasa, F-35 təyyarələrini ala bilməsi real deyil. Ən azından ona görə ki, bu, təkcə prezident Donald Trampın iradəsindən, Ərdoğana olan xoş münasibətindən asılı deyil. Bu məsələdə əsas qərarverici güc Konqresə məxsusdur. Konqresdə də yəhudi, yunan və erməni lobbisi buna mane olmaq üçün bütün vasitələrdən istifadə edirlər. ABŞ Konqresinin üzvləri Türkiyənin F-35 qırıcı təyyarələri proqramına qayıtmasına qarşı çıxırlar. Onlar bunun qarşısını alan əsas maneənin Ankaranın Rusiya S-400 hava hücumundan müdafiə raket sistemlərinə sahib olması olduğunu bildirirlər. Məsələ ABŞ prezidenti Donald Trampın müəyyən şərtlər yerinə yetirildiyi təqdirdə Türkiyəyə qarşı CAATSA sanksiyalarının yenidən nəzərdən keçirilməsi ehtimalını söyləməsindən sonra yenidən gündəmə gəlib. Respublikaçı Senatın Xarici Əlaqələr Komitəsinin sədri Cim Riş vurğulayıb ki, Türkiyə S-400-ləri saxladığı müddətcə Vaşinqton və Ankara arasında tam hüquqlu müdafiə əməkdaşlığının bərpası mümkün deyil. Bu arada, Nümayəndələr Palatasında Türkiyəyə qarşı siyasətin yumşaldılmasına qarşı müqavimət artır. Dina Titusun rəhbərlik etdiyi 18 demokrat konqresmendən ibarət qrup Konqres rəhbərliyini Ankaranın F-35 proqramına qayıtmasının qarşısını almağa çağırıb. Bütün bunlar onu deməyə əsas verir ki, S-400-lərin Türkiyədə passiv vəziyyətdə qalması nəyisə dəyişməyəcək. Türkiyə F-35-ləri almaq üçün S-400-ləri ya Rusiyaya qaytarmalı, yada başqa ölkəyə satmalıdır. Həmin raketlər ölkə ərazisində qaldığı müddətcə Ankaraya F-35-lərin verilməsi real deyil”.
Vidadi ORDAHALLI
