Əli Orucov: “O zaman Azərbaycan çox çətin şərtlər daxilində qələbə qazandı”
Prezident İlham Əliyev Xocavənd rayonunun Quzeyxırman kəndinin sakinləri ilə görüşündə deyib ki, Ermənistanın arxasında böyük dövlətlərin dayanmasına, bizə təzyiqlər, hədələr, təhdidlər etmələrinə baxmayaraq, biz istədiyimizə nail olduq:
“Müqayisə edəndə bir daha görürük ki, 44 gün ərzində belə çətin relyefi nəzərə alaraq, düşmənin 7 müdafiə xəttini nəzərə alaraq, - nəzərə alsaq ki, Ermənistanın arxasında böyük dövlətlər dayanmışdı və bu 44 gün ərzində bizə təzyiqlər, hədələr, təhdidlərlə dolu siqnallar göndərilmişdir, - bütün bunlara rəğmən, bunlara baxmayaraq, biz istədiyimizə nail olduq. Çünki haqq-ədalət bizim tərəfimizdə idi, güclü iradə bizdə idi və Azərbaycan xalqı birləşmişdi. Bax, 44 gün ərzində bir nəfər belə olsun döyüş meydanını tərk etmədi. Amma ermənilər özləri etiraf edirlər, özü də yüksək səviyyədə ki, onların 11-12 min fərarisi olmuşdur. Xalqımızın böyüklüyü budur”.
Sözügedən məsələni baki-xeber.com-a şərh edən AMİP funksioneri Əli Orucovun fikrincə, o zaman Azərbaycan çox çətin şərtlər daxilində qələbə qazandı: “Məsələ ondadır ki, ərazilərimizin işğalı ilə bağlı BMT Təhlükəsizlik Şurasının 4 qətnaməsinə rəğmən, bu, nəyisə dəyişmirdi. Ən azından işğalçı ilə işğala məruz qalan tərəfə fərq qoyulmurdu. Ermənistana işğalla bağlı ümumiyyətlə təzyiq edilmirdi. Üstəlik, həyasızcasına bəyan edirdilər ki, BMT qətnamələrində konkret olaraq Ermənistan işğalçı tərəf kimi göstərilməyib. Halbuki, təkcə separatçıların o boyda əraziləri işğal etməsinin mümkünsüz olduğunu bütün tərəflər bilirdilər. Bilavasitə Ermənistan ordusu tərəfindən ərazilərimizin işğal edildiyini bilirdilər, amma buna göz yumurdular. Niyə? Ona görə ki, Azərbaycan işğalla barışsın. Bilavasitə ATƏT-in Minsk qrupunun həmsədrləri tövsiyə edirdilər ki, Azərbaycan reallıqlarla barışsın. Sülh danışıqlarında elə şərtlər irəli sürürdülər ki, bu, birbaşa olaraq Ermənistanın maraqlarına xidmət edirdi. Üstəlik, 26 illik atəşkəs dövründə Ermənistan işğal olunmuş ərazilərdə çox güclü, eşalonlaşmış müdafiə səddi qurmuşu. Cəbhə xətti və digər ərazilər minalanmışdı. Demək olar bütün strateji yüksəkliklər erməni tərəfinin əlində idi. Bu gün bütün Qərb Ukraynanın arxasındadır. Ancaq Vətən müharibəsi başlayanda Türkiyə və Pakistan Azərbaycanın yanında idi. Həmsədr ölkələr, əsasən də Fransa müharibə zamanı Ermənistanı açıq dəstəkləyirdi. Rusiya İran üzərindən Ermənistana silah daşıyırdı. İran tərəfi cənub cəbhəsində yerləşən ordumuzun kordinatlarını Ermənistana ötürürdü. Belə bir çətin vəziyyətdə Azərbaycan axına qarşı gedərək ərazi bütövlüyünü və suverenliyini təmin etdi. Bunu hər ölkə bacara bilməzdi”.
Vidadi ORDAHALLI
