Elşad Həsənov: “Həqiqətən dünya tarixində belə uğur əldə edən ikinci dövlət yoxdur”
Prezident İlham Əliyev Xocavənd rayonunun Quzeyxırman kəndinin sakinləri ilə görüşündə deyib ki, son 80 il ərzində Azərbaycan dövləti qədər heç bir dövlət, heç bir xalq buna oxşar Qələbə qazanmayıb:
“İkinci Qarabağ müharibəsi və ondan 3 il sonra antiterror əməliyyatı, bir daha deyirəm, bütün dünyaya xalqımızın nəyə qadir olduğunu göstərdi. Son 80 il ərzində Azərbaycan dövləti və xalqı qədər heç bir dövlət, heç bir xalq buna oxşar Qələbə qazanmamışdır, özü də cəmi 44 gün ərzində. İndi dünyada gedən hadisələri hamımız izləyirik. Əfsuslar olsun ki, dünyanın müxtəlif yerlərində münaqişələr, müharibələr alovlanır, dayanmır, davam edir. Bu müharibələrin gedişatına da baxdıqda, hər şey göz qabağındadır”.
Sözügedən məsələ ilə bağlı fikirlərini baki-xeber.com-la bölüşən siyasi ekspert Elşad Həsənov hesab edir ki, Azərbaycan düşünülmüş siyasət və uzaqgörənlik sayəsində buna nail olub: “İlham Əliyev 2003-cü ildə prezident seçiləndən sonra apardığı düzgün siyasət nəticəsində Azərbaycan öz torpaqlarını işğaldan azad etdi. Otuz illik işğala son qoyuldu, ərazi bütövlüyümüz və suverenliyimiz tam təmin edildi. Həqiqətən də son 80 illik dünya tarixində belə uğur əldə edən ikinci dövlət yoxdur. Bu, müasir dövrün hərbi-texniki avadanlıqları ilə, sonuncu nəsil pilotsuz uçuş aparatları ilə və ən başlıcası gənc nəslin milli ruhda böyüdülməsi ilə mümkün oldu. Çünki müstəqillik dövründə formalaşan gənclər sinələrini qabağa verdilər, düşmən üzərinə getdilər. Onların canlarını fəda etməsi nəticəsində ərazilərimiz azad edildi. Daha sonra bərpa-quruculuq işlərinə, böyük qayıdışa start verildi. Bu gün Qarabağ və Şərqi Zəngəzurda yaşayanların, işləyənlərin və təhsil alanların sayı 90 min nəfəri ötüb. O cümlədən, Xocəvənd rayonunda böyük işlər görülür, əhalinin ora qayıdışı təmin edilir. Deməyim odur ki, artıq Qarabağın hər yerində quruculuq işləri aparılır. Sevindirici haldır ki, bütün bunların hamısının başında Prezident Əliyev dayanır. Prezident prosesi nəzarətdə saxlayır, göstərişlərini verir, açılışlarda iştirak edir və s. Bu gün dünyanın dörd tərəfində müharibələr, münaqişələr baş verir. Bütün bunlar bizə təsirsiz ötüşmür və bəzi problemlər yaradır. Ancaq buna baxmayaraq, bir sabitlik məkanıdır. Minalanmış əraziləri təmizləyirik, torpaqları yararlı vəziyyətə gətiririk. Biz doğurdan da böyük və güclü xalqıq. Ona görə ki, işğal və müharibə dövründə ölkəmizə olan bütün xarici təzyiqlərə dözdük. İradəmizi ortaya qoyduq. Milli iradəmizi ortaya qoyaraq ərazi bütövlüyümüzü təmin etdik. Bütün bunlar Azərbaycanın son illərdə gördüyü işlərdir. Qarşımızda böyük hədəflərimiz var”.
Vidadi ORDAHALLI
