Son illər ənənəvi olaraq keçirilən Şuşa Media Forumu yeni qlobal təzahürləri və yeni baxışları aktual gündəmə çıxarmaqla əlamətdar olmağa başlayıb.
Xüsusilə budəfəki forumun yeni regional reallıqların dünya tərəfindən təsdiq və qəbul olunması ilə bir vaxta düşməsi özü də maraqlı bir hadisə kimi diqqətləri cəlb etməkdədir. Bir vaxtlar bizim bölgə üçün acı görüntü sayılan " ststus-kvonu" dəyişmək çoxlarına mümkünsüz görünsə də, Azərbaycan üçün bunu etmək müstəsna dərəcədə vacib idi. Azərbaycanın hərbi və diplomatik-siyasi vasitələrlə Qafqazda təcavüzə söykənən həmin reallığı dəyişdirməsi bütün bölgənin taleyini dəyişdi. Şuşa forumunda Prezident İlham Əliyevin söylədiyi kimi, "indi postmüharibə reallıqları dünya tərəfindən nəinki tanınır, üstəlik qəbul edilir". Mühüm bir geosiyasi məkanda yeni reallıqlar yaratmağın özlüyündə çətin problem olduğunu hər kəs başa düşür. Yeni yaradılmış reallıqların dünya tərəfindən tanınmasına və qəbul edilməsinə nail olmaq isə ondan da çətin problemdir .Azərbaycan bunların hər ikisini uğurla bacardı və Prezidentin sözləri həm də Azərbaycanın potensialının, real gücünün və öz milli maraqlarını müdafiə etmək qabiliyyətinin bəyan olunması kimi qəbul edilməlidir...
Şuşa forumunun dünyaya təsirli mesajlarından biri də Azərbaycanın dünyada "orta güc dövlətinə" çevrilməsinin rəsmən ifadə edilməsi oldu. Prezidentin bu mənada "Azərbaycan artıq orta gücə çevrilib" sözlərinin çox qətiyyətlə səsləndirilməsi həm də gələcəyə yönəlmiş mütərəqqi milli iradənı ifadə edir. Prezident bunu inamla söylədisə, deməli, dünyanın kiçik ölkələrinə də, özünü super güc sayanlara da təsirsiz qalmayacaq. Ona görə ki, əvvəla, kiçik və haqqı pozulmuş xalqlara və dövlətlərə nümunə götürmək üçün mühüm örnək verir. Onlara bundan artıq daha nə ilə təsir etmək olar? Dünənə kimi təcavüz qurbanı olan, ərazisi və süverenliyi pozulmuş Azərbaycan "orta dünya gücünə " çevrilmək yollarını misilsiz nümunə olaraq göstərir. Daha qiymətli isə orasıdır ki, İlham Əliyevin dəqiq ifadə etdiyi kimi, Azərbaycanın orta gücə çevrilməsi təcavüzə dəstək verən super güclərə qarşı şərəfli və qətiyyətli mübarizədən keçdi. Prezident məhz böyük güclərin dəstəyi ilə Ermənistanın yaratdığı 7 qatlı müdafiə xəttinin darmadağın edilməsini təsadüfən xatırlatmadı ...Bununla da öz haqqını bərpa etmək istəyənlərə " haqlı olan tərəf hətta süper güclərə də yenilməz" kimi qürur yolunu göstərdi. Beləliklə, İlham Əliyev Azərbaycanın özünəməxsus modelini nümayiş etdirdi - haqlısansa, ağıllı siyasət apara bilirsənsə, süper güclərə də qalib gələ və özün orta gücə çevrilə də bilərsən!....
Çox əhəmiyyətlidir ki, İlham Əliyev orta güc anlayışını xarakterizə edən meyarların özünü də müzakirə mövzusu kimi təqdim etdi. Beləliklə, “kim orta güc ola bilər”, “orta güc olmaq üçün nə etmək lazımdır” kimi sualların cavabı da artıq məlumdur. Prezidentin təbirincə desək, öz milli maraqlarını müdafiə edə bilən, real gücə malik ökələrin orta güc olmaq şansı mübahisəsizdir...Yetər ki, hədəfə doğru strateji yönlənməni düzgün tuta biləsən...Həqiqətən də, reallığı dəyişən, süverenliyini öz gücü ilə bərpa edən, çoxlarının inkar etdiyi sülh prosesini az qala hamının qəbul etdiyi gerçəkliyə çevirən bir dövlətin - Azərbaycanın öz mənafelərini yetərincə müdafiə etmək qabiliyyəti kimdə şübhə doğura bilər?!...
Regional konfiqurasiyanı, beynəlxalq təşkilatları yeni görkəmdə dizayn və təftiş edən bir ölkə - Azərbaycanın orta güc statusu niyə də qəbul olunmasın?!
Bu mənada Əliyevin "Avropa Şurası üzvlüyündən çıxsaq, xalq bunun fərqinə varmayacaq, müdafiəmiz Avropadan gəlmir" kimi bəyanatları təkcə ikili standartlara qarşı mövqe nümayişi deyil, həm də Azərbaycan Prezidentinin Avropa qurumlarını daha mütərəqqi, daha ədalətli səviyyədə dizayn etmək cəhdidir...
Bölgəmizin inkişafını və rifahını geosiyasi intriqaların təsirindən qorumaq zərurəti Şuşadan verilmiş qiymətli mesajlardan biridir. İlham Əliyev yerində dedi - bu bölgə geosiyasi intriqalara qurban verilə bilməz, bu bölgə geosiyasi qarşıdurmaların məkanı ola bilməz...
Bu gün Cənubi Qafqazın geosiyasi qarşıdurmalardan daha çox geosiyasi əməkdaşlıq imkanlarına malik olduğunu əsaslandırmaq Prezidentin dünya müzakirəsinə təqdim etdiyi çox perspektivli mövzulardan biridir.
Şuşa Forumunda dünyanın və regionun problemləri və onların həll yolları onun öz dilində özünə təqdim olundu...
Qalır, hər kəsin ona yetərincə məsuliyyətli və dürüst münasibət göstərməsi...
Aydın QULİYEV
