Azər Həsrət: “Biz burada həyəcan təbili çaldıqdan sonra onlar bir qədər hərəkətə gələr və bu məsələnin üzərinə daha sistemli şəkildə gedərlər”
Avropa Parlamentinin (AP) Türkiyəyə qarşı qərəzli iddialar və əsassız qiymətləndirmələr ehtiva edən qərar və hesabatları rəsmi Ankara tərəfindən birmənalı olaraq rədd edilir.
Türkiyə Xarici İşlər Nazirliyinin (XİN) yaydığı bəyanatda bildirilir ki, növbəti qərar hərbçilərə aid olub və Ankara tərəfindən yenə qınanıb.
"Avropa Parlamentində (AP) qəbul edilən, Türk Silahlı Qüvvələrinə qarşı əsassız və ağılasığmaz iddialar ehtiva edən qərar "yox hökmündə"dir. Qərar haqqında Şimali Kiprin XİN-i tərəfindən verilən açıqlamaya tam dəstək veririk", - bəyanatda bildirilib.
Qeyd olunub ki, özündə böhtanlar ehtiva edən sözügedən qərar Avropa İttifaqının (Aİ) və xüsusən də AP-nin Kipr məsələsi ilə bağlı müəyyən dairələrin təsiri altında mənimsədiyi qərəzli və təhrif olunmuş yanaşmadır: "Aİ orqanlarının Kipr məsələsinə münasibətdə tarixi reallıqlardan və bitərəflikdən getdikcə uzaqlaşan bir yanaşma nümayiş etdirməsini narahatverici hesab edirik".
Xatırladaq ki, AP-də Türkiyə Silahlı Qüvvələrinin Kipr adasından çıxarılmasını tələb edən qətnamələr qəbul olunur.
Türkiyənin, qardaş ölkənin ümumilikdə mediasının Avropa Parlamentinin Kiprdə “uşaq və qadın soyqırımı” qətnaməsinə etirazı çox sönük oldu.
Məsələn, başqa vaxtlarda televiziyalar bununla bağlı təbliğat aparırlar, geniş müzakirələr açır, dəyirmi masalar, dialoqlar keçirdir, canlı yayımlar verirdilər.
Amma bu məsələdə bir yumşaq yazılmış etiraz bəyanatından balqa heç nə görünmədi. Halbuki, Avropa Parlamenti açıq şəkildə Türkiyəni Kiprdə “qadınları və uşaqları” genosiddə ittiham edib. Bu ötəri fakt deyil. Bu cür sönük reaksiyanın səbəbi nədir?
Yəni Türkiyə mediasında bu mövzuda kiçik bir informaiyadan başqa heç nə getmədi. Bunun səbəbi nədir?
Siyasi şərhçi Azər Həsrət baki-xeber.com-a bildirdi ki, hazırda
Türkiyə mediasının başı Fələstin məsələsinə qarışıb. “Əslinə qalanda qardaş Türkiyə mediasının başı Fələstin məsələsinə o qədər qarışıb ki, özünə aid olan məsələləri belə arxa plana keçirir. Bu tərəfdən də İran məsələsinə bunların başı həddən artıq çox qarışıb. Yəni, faktiki olaraq Fələstini, İranı öz problemləri hesab edirlər və hətta bununla bağlı bir-biriləri ilə mübahisə edirlər. Üstəlik, Türkiyə mediasında Azərbaycanın üzərinə hücum çəkirlər. Beləcə də özlərinə aid olan məsələlər arxa plana keçir. Halbuki, o adamlar diqqəti bu cür məsələlərdən yayındırmamalı, əslinə qalanda Fələstinlə, İranla deyil, məhz qardaş Türkiyənin özü, eləcə də Kuzey Kipr Türk Cumhuriyeti ilə məşğul olmalıdırlar. Amma görürsünüz ki, bunlar həmin məsələləri arxa plana keçirir. Bu da bizim illərdir dediyimizi bir daha sübut edir. Biz davamlı şəkildə demişik ki, Türkiyədəki bu qüvvələr xaricdən idarə olunur”.
A.Həsrətin sözlərinə görə, bu xaric sadəcə olaraq İran deyil, Rusiya deyil, həm də Avropa mərkəzləridir. “Yəni, oradan tapşırıq, istiqamət verilir ki, bu yöndə təbliğat qurun və onlar da qururlar. Həmin təbliğatda da bir qayda olaraq Azərbaycana hücumlar yer alır. Bunu təbiidir ki, Azərbaycanı sevənlər etməz ki. Türkiyə Azərbaycana qardaş, dost dövlətdir, yəni biz iç-içəyik və bizim ayrımız başqamız yoxdur ki. Amma görürsünüz, onlar Azərbaycana hücum edirlər. Bunu dövlət etdirmir təbii ki. Məhz həmin o mərkəzlər etdirir. Ona görə də bu Kuzey Kiprla bağlı məsələdə Türkiyə mediasının münasibəti olduqca sönükdür. Ümid edək ki, biz burada həyəcan təbili çaldıqdan sonra onlar bir qədər hərəkətə gələr və bu məsələnin üzərinə daha sistemli şəkildə gedərlər. Fələstin, İran, bunlar Türkiyənin iç məsələsi deyil, üstəlik, ümumiyyətlə Türkiyəyə dəxli olan məsələlər deyil”. A.Həsrət vurğuladı ki, görünən odur, Türkiyə mediasında, xüsusən də təsir imkanları olanlar hər şeyi, hətta Türkiyənin öz dövlət maraqlarını bir kənara qoyub Fələstin, İran deyib zar-zar ağlayırlar.
İradə SARIYEVA
