Təbriz Musayev: “Rusiyanı elə bataqlığa salıblar ki, oradan çıxması asan olmayacaq”
“Financial Times” qəzeti yazır ki, Trampın mövqeyini yenidən Kiyevin xeyrinə dəyişməsindən sonra Rusiya ABŞ-ı Ukraynadakı müharibənin başa çatdırılması üzrə vasitəçilik səylərindən imtina etməkdə ittiham edib. Rusiyanın xarici işlər naziri Sergey Lavrov bəyan edib ki, ABŞ müharibədə “obyektiv vasitəçi rolundan açıq şəkildə uzaqlaşır” və Tramp ötən il Moskvanın mövqeyinə daha yaxın olan öz bəyanatlarını “unudub”.
Qapalı müzakirələrdən xəbərdar olan iki mənbənin sözlərinə görə isə, G7 sammiti zamanı Tramp Ukraynanın Rusiya ərazisinin dərinliklərindəki hədəflərə zərbələr endirməsi kampaniyasından çox təsirlənib və ruhlanıb. Bu zərbələr ABŞ kəşfiyyatının dəstəyi ilə də həyata keçirilir. Bununla yanaşı, iyunun 24-də Lavrov “Primakov qiraətləri” beynəlxalq forumunda çıxışı zamanı deyib ki, amerikalı müzakirəçilər Stiv Uitkoff və Cared Kuşnerin Rusiyaya daha bir səfərinin mümkünlüyü müzakirə olunur. Onun sözlərinə görə, Rusiya tərəfi Eviandakı G7 sammitindən sonra ABŞ-ın mövqeyinin dəyişib-dəyişmədiyini anlamaq niyyətindədir.
Görünən odur ki, Rusiya tərəfi ABŞ-ın Ukrayna ilə bağlı mövqeyini dəyişməsinə inanmaq istəmir. Halbuki, bununla bağlı kifayət qədər faktlar var.
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayevin fikrincə, Putinin sarsaq siyasəti üzündən Rusiya elə bir tələyə salınıb ki, çətin oradan ciddi itkilərsiz çıxa bilsin: “Bunların faciəsi odur ki, baş verənləri anlayıb ziyanın yarısından da olsun geri addım atmağa cəsarət etmirlər. Putinin ətrafı belə, onu buna inandırmaqla bağlı hansısa təşəbbüslə çıxış etmir. Halbuki, haradan baxılsa Rusiyanın strateji məğlubiyyəti ortadadır. Putin Kiyevi 3 günə tutacağını deyirdi, amma 4 il 4 aydır amansız müharibə gedir. Müharibəyə qədər Avropa İttifaqının qaza olan tələbatının 40 faizini ödəyirdi. Ötən müddət ərzində Rusiya həm Avropa kimi varlı bazarı itirib, həm o istiqamətdə yollar bağlanıb, həm də sanksiyalar altındadır. Rusiyanı elə bataqlığa salıblar ki, oradan çıxması asan olmayacaq. Bu gün Ukraynanın Rusiyanın dərinliklərinə endirdiyi zərbələr, neft emalı zavodlarını sistemli şəkildə məhv etməsi təkcə Kiyevin uğuru deyil. Bu, Qərbin Ukraynaya göstərdiyi maliyyə, texnoloji və kəşfiyyat dəstəyinin kompleks şəkildə olmasının nəticəsidir. Ukrayna lisenziyası ilə Avropanın müxtəlif ölkələrində dronların, raketlərin komponentləri hazırlanır. Rusiya həmin zavodları vura bilmir. Niyə? Çünki bu, NATO-ya qarşı müharibə elanı olacaq. Bu gün Ukraynaya nəinki ABŞ, Böyük Britaniya da kəşfiyyat dəstəyi verir və bunu açıq dilə gətirməkdən çəkinmirlər. Koordinatların bu dərəcədə dəqiq vurulması həm də kəşfiyyat məlumatları hesabına təmin edilir. Proseslərin gedişi onu deməyə əsas verir ki, Ukrayna sadəcə atəşkəslə kifayətlənməyəcək. Ərazilərinin bir qismini tələb edəcək. Halbuki, ötən il Ukrayna təki müharibə dayansın deyə atəşkəsə razı idi, amma Putin bunu dəyərləndirmədi. Hesab edirdi ki, Tramp Zelenskini kapitulyasiyaya məcbur edəcək. Nəzərə almadı ki, bütün Avropa Ukraynanın arxasında dayanıb və Trampın mövqeyi həlledici olmayacaq. Nəticə də odur ki, Tramp bu gün mövqeyini 180 dərəcə dəyişərək “Ukrayna uğurla vuruşur, müqavimət göstərir” deyir. Bax budur reallıq”.
Vidadi ORDAHALLI
