Elşən Manafov: “Demokratiya pərdəsi altında Yaxın və Orta Şərqin müsəlman ölkələrində müharibələr aparılır”
Prezident İlham Əliyev İslam Əməkdaşlıq Təşkilatının üzvü olan dövlətlərin Parlament İttifaqı Konfransının 20-ci Sessiyasının iştirakçılarına müraciətində bildirib ki, bəzi Avropa təsisatlar anti-İslam əhvali-ruhiyyəsini təlqin edirlər:
“İslamofobiya yalnız müsəlmanlara qarşı dözümsüzlük halı deyil, qarşılıqlı anlaşmaya və dinc birgəyaşayışa təhdid yaradan təhlükəli tendensiyadır. Məyusedici haldır ki, Qərbdə bəzi siyasi dairələr, Avropa Parlamenti və Avropa Şurası Parlament Assambleyası kimi beynəlxalq təsisatlar anti-İslam əhvali-ruhiyyəsini təlqin edərək, İslamı ekstremizm və terrorizm ilə eyniləşdirməyə, dinimizə qarşı qərəzli təsəvvür yaratmağa və onu təhlükə mənbəyi kimi qələmə verməyə cəhdlər göstərir”.
Sözügedən məsələ ilə bağlı fikirlərini baki-xeber.com-la bölüşən politoloq Elşən Manafov bütün bunlara bir neçə prizmadan yanaşdı: “Qərb alyansı son illərdə özünün enerji təminatı, strateji təbii resurslara yiyələnmək, yeni bazarlar əldə etmək və ya bu bazarlardan geosiyasi anlamda ənənəvi rəqibləri olan dövlətləri sıxışdırıb çıxarmaq məqsədilə müxtəlif vasitələrdən istifadə edir. Demokratiya, insan hüquqları pərdəsi altında Yaxın və Orta Şərqin müsəlman ölkələrində müharibələr aparılır. Bəlli regionda infrastrukturun dağılmasına, regionun müsəlman əhalisinin sosial problemlərinin yüksələn xətlə artmasına, onların dinc şəraitdə yaşamaq hüququna birbaşa təhdid yaradılır. Nəticədə əhali məlum ölkələri tərk etmək məcburiyyətində qalaraq əsasən Avropa ölkələrinə üz tutur. Məlum miqrasiya axını isə Avropa İttifaqı ölkələrində gəlmələr və yerli əhali arasında sosial, etnik və dini zəmində narazılığa səbəb olur. Bu, bəzi hallarda isə açıq toqquşmalara gətirib çıxarır. Bəllidir ki, gəlmələr fərqli sivilizasiya və mental mədəniyyət təmsilçiləri olduqlarından Avropanın oturuşmuş bir sıra dəyərlərini qəbul edə bilmirlər. Üstəlik, Avropanın rəsmən dini tolerantlıq prinsiplərinə söykənməsi, gerçəkdə isə gəlmələrə aşağılayıcı baxış və münasibət vəziyyəti daha da gərginləşdirir. Aİ-də və təsisatlarında olan bəlli siyasi dairələr miqrasiya axınının doğurduğu problemləri nəzarətdə saxlamaq və yeri gələndə onlardan öz siyasi konyuktur maraqları üçün istifadə etmək məqsədilə islamofobiya və onun doğurduğu xof amilindən yararlanmağa çalışırlar. Bütün bunları isə Aİ ölkələrində sabitliyin qorunub saxlanılması və təhlükəsizliyin gözlənilməsi adı altında həyata keçirirlər”.
Politoloq onu da qeyd etdi ki, Yaxın Şərqdən Avropaya olan miqrasiya axınının əsas səbəbkarları məhz Avropadakı qlobalist dairələrdir: “Bu axın onların müsəlman ölkələrində islam terrorizminə qarşı mübarizə apardıqları hərbi kampaniyaların birbaşa təsiri ilə əlaqədardır. Digər tərəfdən miqrantlar Avropa siyasi istibleşmentləri, Avropanın işgüzar dairələri üçün ucuz işçi qüvvəsidir. Bunu Fransa prezidenti Makronun miqrasiya siyasətinin bu ölkədə doğurduğu sosial kataklizmlər, dini və etnik zəmində qarşıdurmalar da sübut etdi. İslamofobiya Avropadakı bəlli dairələrin uzun müddətdir ki, Azərbaycana münasibətdə həyata keçirdikləri siyasətin alt qatlarında özünə yer eləmiş geosiyasi məzmunlu faktordur. Azərbaycanın müstəqil siyasəti, onun Avropanın ağır çəkili siyasi istibleşmentləri ilə belə bərabər münasibətlər qurmaq əzmi bəzi dairələri narahat edir. Münasibətlərin qarşılıqlı anlaşma və mənfəət prinsipləri zəminində genişləndirilməsi üçün sərgilədiyi siyasi iradə bəllidir ki, Avropada erməni diasporası ilə sıx əlaqələrə malik olan tərəfləri qane etmir. Odur ki, məlum dairələrin lobbiçilik dəstəyi ilə Avropa institutlarında rəsmi Bakını ermənilərə münasibətdə “etnik təmizləmə siyasətinin” həyata keçirilməsində məsul bilən, Azərbaycan dövlətçiliyini tolerantlıq prinsiplərini pozmaqda ittiham edən qətnamə və bəyannamələr qəbul edilir. Öz siyasəti ilə daim sivilizasiyalar arası dialoqun tərəfdarı olan, özünün yüksək tolerantlığı, fərqli sivilizasiyalara hörmət və ehtiramı ilə tanınan Azərbaycan dövlətçiliyi buna qarşıdır. Bu saxta siyasətin arxasında hansı niyyət və məqamların olduğunun mahiyyətinə varır. Bəlli dairələrlə münasibətlər məlum siyasətin doğurduğu reallıqlar üzərində aparılır”.
Vidadi ORDAHALLI
