Tural İsmayılov: “Rəsmi reaksiyaların gecikməsi həmin ölkələrin məsələni diplomatik kanallar vasitəsilə qiymətləndirməsi ilə də bağlı ola bilər
TASS-ın məlumatına görə, Rusiya Təhlükəsizlik Şurasının sədr müavini Dmitri Medvedev Sankt-Peterburq Beynəlxalq Hüquq Forumunda bildirib ki, "Moldova və Ermənistan hazırda Ukraynadakı marionet rejimin seçdiyi eyni yolu gedirlər".
O qeyd edib ki, SSRİ-nin dağılmasından sonra NATO "marionet rejimlərdən Rusiyaya qarşı qoç kimi istifadə edib".
Rusiya Təhlükəsizlik Şurasının sədr müavini deyib: "Gürcüstanla da, 2014-cü ildə rusofobiyanın ocağına çevrilən Ukrayna ilə də belə olub".
"Təəssüf ki, hazırda Moldova ilə, hətta təəssüf ki, Ermənistanla da belədir"-deyə Medvedev bildirib.
Medvedev Gürcüstanı, Ukraynanı, Moldovanı və Ermənistanı oyuncaq rejimlər adlandırıb. Lakin bu dövlətlərin hələ heç biri ona cavab verməyib. Medvedevin bu bəyanatı niyə cavabsız qalır? Bu ölkələrin reaksiyası yoxdurmu? Niyə məhz onlar oyuncaq rejim adlandırılıb?
Politoloq Tural İsmayılov baki-xeber.com-a bildirdi ki, Dmitri Medvedevin Gürcüstan, Ukrayna, Moldova və Ermənistanı "oyuncaq rejimlər" adlandırması diplomatik etika və dövlətlərarası münasibətlərin ruhuna uyğun olmayan bir yanaşmadır. “Dövlətlərin legitim hakimiyyətlərini və xalqların siyasi seçimlərini bu formada xarakterizə etmək nə beynəlxalq hüququn prinsiplərinə, nə də müasir siyasi mədəniyyətə uyğun gəlir.
Əslində Medvedevin sadaladığı ölkələri birləşdirən əsas xüsusiyyət onların son illərdə daha müstəqil xarici siyasət yürütməyə çalışmalarıdır. Ukrayna Avro-Atlantik məkanla inteqrasiyanı seçib, Moldova Avropa İttifaqına üzvlük istiqamətində addımlar atır, Gürcüstan Qərblə əməkdaşlığı genişləndirməyə çalışır, Ermənistan isə ənənəvi təhlükəsizlik arxitekturasını yenidən nəzərdən keçirir. Bu proseslər həmin ölkələrin suveren qərarlarıdır və onları təhqiramiz ifadələrlə qiymətləndirmək doğru deyil.
Bu bəyanatın hələlik ciddi cavab almamasının bir neçə səbəbi var. İlk növbədə, son illərdə Medvedevin çıxışları daha çox siyasi polemika və daxili auditoriyaya hesablanmış ritorika kimi qəbul edilir. Buna görə də bəzi dövlətlər onun hər açıqlamasına reaksiya verməyi məqsədəuyğun saymırlar. Digər tərəfdən, rəsmi reaksiyaların gecikməsi həmin ölkələrin məsələni diplomatik kanallar vasitəsilə qiymətləndirməsi ilə də bağlı ola bilər”.
T.İsmayılov hesab edir ki, dövlətlər arasında münasibətlər qarşılıqlı hörmət üzərində qurulmalıdır. “Böyük və ya kiçik olmasından asılı olmayaraq, hər bir ölkənin öz siyasi kursunu müəyyənləşdirmək hüququ var. Müasir dünyada dövlətləri "oyuncaq rejim" kimi təqdim etmək daha çox qarşıdurmanı dərinləşdirir və dialoq imkanlarını zəiflədir.
Əgər Rusiya regionda nüfuzunu və təsir imkanlarını qorumaq istəyirsə, bunu ittihamlar və etiketlər vasitəsilə deyil, qarşılıqlı faydalı əməkdaşlıq, iqtisadi tərəfdaşlıq və etimad quruculuğu yolu ilə etməlidir. Siyasi reallıq göstərir ki, təzyiq dili adətən əks nəticə verir və dövlətlərin daha da müstəqil davranmasına səbəb olur"-deyə T.İsmayılov əlavə etdi.
İradə SARIYEVA
