Zaur İbrahimli:“Fremanın “qayıdış” tələbi isə əslində Azərbaycanın ərazi bütövlüyünə və suverenliyinə qarşı yönəlmiş siyasi addımdır”
ABŞ konqresmeni, Ermənistan İşləri üzrə Konqres Qrupunun həmsədri Bred Şerman Kapitolidə Bakıda həbsdə olan hərbi canilərin saxlanmasının 1000-ci gününə həsr olunmuş mətbuat konfransı keçirib. Konfransda çıxış edən ABŞ Konqresin üzvü Laura Friman həqiqətəuyğun olmayan, reallıqdan uzaq, qərəz dolu fikirlər səsləndirib. O, separatçıların həbsini “qanunsuz” adlandırıb və əsassız olaraq iddia edib ki, onlar guya burada “zorakılığa”, “təhdidlərə” məruz qalıblar.
Friman onu da deyib ki, Qarabağdan köçüb getmiş ermənilər də yenidən Qarabağa qaytarılmalıdır. O iddia edib ki, guya Qarabağdan ermənilər zorla qovulub və “erməni mədəni irsi zədələnib, məhv edilib”
Konqresmen bildirib ki, ermənilərin təhlükəsiz şəkildə Qarabağa qayıda bilməsi üçün ABŞ-da bir sıra təşəbbüslər üzərində işləyir.
Çox təəssüflər olsun ki, ermənilərin, hazırda həbsdə olan canilərin Azərbaycan dövlətinə və xalqına qarşı həyata keçirdiyi soyqırımları, müharibə və insanlıq əleyhinə cinayətləri bir dəfə də olsun qeyd etməyi özünə borc bilməyən konqresmen Azərbaycana qarşı daha sərt sanksiyalar tətbiq etmək barədə danışıb. Onu da deyib ki, ermənilər Qarabağa qayıtmayınca, Bakıda həbsdə olan canilər azad olunmayınca sülhdən söhbət gedə bilməz.
Təsəvvür edin ki, Ermənistan höküməti tamam başqa söz deyir, Paşinyan Qarabağdan könüllü köçüb getmiş ermənilərin geri qayıdışının mümkün olmadığını deyir, canilərin müdafiəsinə qalxmır, amma hansısa muzdlu, erməni lobbisinin əlində oyuncağa çevrilən konqresmen bu cür əsassız iddialarda bulunur.
Halbuki, reallıq başqadır, o insanlar Azərbaycan xalqına qarşı amansız cinayətlər törətdiyi üçün ədalət məhkəməsi qarşısında dayanıb və həbsə məhkum ediliblər. Onları “qəhrəmanlaşdırmaq” insanlıq əleyhinə işlənilən cinayətlərə şərik olmaq deyil bəs nədir? Digər tərəfdən, ermənilər Qarabağdan könüllü köçüb gediblər, Azərbaycan vətəndaşlığını qəbul edib yaşamaq əvəzinə köçüb getməyi seçiblər. Burada Azərbaycan dövlətinin nə günahı ola bilər ki? Təbii ki, heç bir günahı yoxdur. Başqa bir tərəfdən də Qarabağda qədim erməni irsi olmayıb, ermənilər ərazilərimizi işğal edəndən sonra qədim alban məbədlərini, kilsələrini saxtalaşdırıblar, eyni zamanda qanunsuz olaraq yeni kilsələr inşa ediblər.
Politoloq Zaur İbrahimli baki-xeber.com-a bildirdi ki, Konqresmen Laura Fremanın son çıxışında irəli sürdüyü iddialar-erməni hərbi əsirlərin və mülki şəxslərin Azərbaycanda “qanunsuz saxlanılması”, “simvolik məhkəmə prosesləri”, mədəni irsin “dağıdılması” və s. birtərəfli siyasi prizmadan irəli gəlir. “Rəsmi Bakının mövqeyi beynəlxalq humanitar hüququn, o cümlədən 1949-cu il Cenevrə Konvensiyalarının müddəalarına əsaslanır. Beynəlxalq humanitar hüquqa görə, hərbi əsir statusu döyüş əməliyyatları zamanı əsir düşən şəxslərə şamil edilir. Lakin Azərbaycan Xarici İşlər Nazirliyinin dəfələrlə vurğuladığı kimi, hazırda saxlanılan şəxslərin əhəmiyyətli hissəsi müharibə bitdikdən sonra, üçtərəfli bəyanatın imzalanmasından təxminən 20 gün sonra Azərbaycanın azad edilmiş ərazilərinə qanunsuz daxil olmuş şəxslərdir. Bu şəxslər nə beynəlxalq humanitar hüquq, nə də heç bir konvensiya üzrə hərbi əsir statusuna malik deyillər. Onlar terror-sabotaj qrupu kimi fəaliyyət göstərmiş, Azərbaycan hərbçilərinin ölümünə və mülki şəxsin ağır yaralanmasına səbəb olmuşlar. Bundan əlavə, Azərbaycan 2020-ci ilin oktyabrından etibarən 200-dən çox erməni əsir və mülki şəxsi azad edərək Ermənistana qaytarıb-bu, xeyirxah humanitar addım və beynəlxalq öhdəliklərə uyğun hərəkətdir. Qalan şəxslər isə ya müharibə cinayətlərində, ya etnik təmizləmədə, ya da digər ağır cinayətlərdə təqsirli bilinərək məhkum edilmişlər. Azərbaycanda saxlanılan bütün beynəlxalq hüquq tələblərinə uyğun rəftar edilib. Beynəlxalq Qırmızı Xaç Komitəsinin nümayəndələri onlara müntəzəm baş çəkmiş, ailə üzvləri ilə əlaqə imkanı yaradılmış, tibbi müayinələr aparılmış və heç bir işgəncə və ya pis rəftar izi aşkar edilməmişdir. Azərbaycanın məhkəmə prosesləri beynəlxalq standartlara uyğun keçirilmişdir”.
Z.İbrahimli qeyd etdi ki, Freman və digər konqresmenlər Ermənistanın Azərbaycan vətəndaşları Dilqəm Əsgərov və Şahbaz Quliyevi 7 il ərzində girov saxlamasına, Avropa İttifaqının isə bu məsələyə biganə qalmasına heç bir reaksiya verməmişlər. “Bu, açıq-aşkar ikiüzlü standartdır.
Dağlıq Qarabağ və ətraf rayonlar beynəlxalq səviyyədə tanınmış Azərbaycan əraziləridir. Ermənistanın bu əraziləri 30 ilə yaxın işğalı dövründə Azərbaycanın mədəni irsinə, o cümlədən məscidlərə, tarixi abidələrə və qəbiristanlıqlara-vurulan ziyan haqqında beynəlxalq təşkilatların çoxsaylı hesabatları mövcuddur. Lakin Freman bu barədə susur. “Arsax” əhalisinin “zorla köçürülməsi” ilə bağlı iddiası da tamamimlə cəfəng iddiadır. Ermənistan Baş naziri belə bunu dəfələrlə təkzib edib. 2023-cü ildə erməni əhalisinin Azərbaycanın suveren ərazisini tərk etməsi könüllü köç olmuşdur. Fremanın “qayıdış” tələbi isə əslində Azərbaycanın ərazi bütövlüyünə və suverenliyinə qarşı yönəlmiş siyasi addımdır. Bu həmçinin, revanişt ideologiyanı təbliğ edən, təşviq edən, bu istiqamətdə fəaliyyəti maliyyələşdirilən, okeanın o tayından təhülkəsiz şəraitdə guya vətən təəssübü çəkən erməni lobbisisinin pulu ilə sülh gündəliyinə zərbə vurmaq, etimadsızlıq yaratmaqdır. Bu elə öz ölkəsinin, ABŞ-ın starteji xarici siyasət kursuna qarşı çıxmaqdır. Yaxşı olar ki, Freman, keçmiş senator Menendesin aqibətini xatırlasın. Tarixi təcrübə göstərir ki, daşnak ideoloqlarından maliyyə alıb ermənipərəst olanlar gec-tez tarix və məhkəmə qarşısında cavab verirlər”-deyə Z.İbrahimli vurğuladı.
İradə SARIYEVA
