Bakıda keçirilən İslam Əməkdaşlıq Təşkilatına (İƏT) üzv dövlətlərin Parlament İttifaqı Konfransının 20-ci sessiyası müsəlman ölkələri arasında siyasi, iqtisadi və parlament əməkdaşlığının gücləndirilməsi baxımından mühüm platforma kimi qiymətləndirilir. Dünyada baş verən geosiyasi proseslər, regional münaqişələr, iqtisadi çağırışlar və qlobal təhlükələr İslam ölkələrinin daha sıx əməkdaşlıq etməsini, ortaq problemlərə birgə yanaşmalar sərgiləməsini zəruri edir. Bu baxımdan Bakı sessiyası yalnız parlamentlərarası dialoq üçün deyil, həm də İslam dünyasının gələcək inkişaf istiqamətlərinin müəyyənləşdirilməsi baxımından mühüm əhəmiyyət daşıyır. Azərbaycanın belə bir mötəbər tədbirə ev sahibliyi etməsi ölkəmizin İslam dünyasında artan nüfuzunun və etibarlı tərəfdaş kimi qəbul edilməsinin daha bir göstəricisidir. Ölkəmiz hər zaman İslam həmrəyliyinin gücləndirilməsinə, müsəlman dövlətləri arasında qarşılıqlı etimadın və əməkdaşlığın inkişafına mühüm töhfələr verib. Məhz buna görə də Bakı artıq beynəlxalq dialoq, əməkdaşlıq və qarşılıqlı anlaşma məkanlarından birinə çevrilib.
Parlament diplomatiyası müasir beynəlxalq münasibətlər sistemində xüsusi əhəmiyyət kəsb edir. Dövlətlər arasında siyasi münasibətlərin inkişafında qanunverici orqanların rolu getdikcə artır. Parlamentlərarası əməkdaşlıq yalnız qanunvericilik təcrübəsinin paylaşılmasına deyil, həm də iqtisadi, humanitar və mədəni əlaqələrin inkişafına mühüm təsir göstərir. Bu mənada Bakıda keçirilən sessiya İƏT üzv dövlətləri arasında münasibətlərin daha da dərinləşməsinə, qarşılıqlı maraq doğuran məsələlər üzrə ortaq mövqelərin formalaşdırılmasına geniş imkanlar yaradır. Bu platformada qəbul olunan qərarlar sözügedən problemlərin araşdırılmasına mühüm töhfə verə bilər.
Bu günlərdə Bakının uğurla ev sahibliyi etdiyi İslam İnkişaf Bankının illik toplantısı da İslam ölkələri arasında iqtisadi əməkdaşlığın genişlənməsi baxımından əhəmiyyətli rol oynayır. İslam İnkişaf Bankının rəhbərliyi Bakıda keçirilən tədbirdə Azərbaycanla əməkdaşlığa xüsusi önəm verdiklərini açıq şəkildə ifadə edib. Bu, ilk növbədə Azərbaycanın qarşılıqlı faydalı əməkdaşlığa açıq siyasəti, irəli sürdüyü layihələrin regional və qlobal əhəmiyyəti ilə bağlıdır. Azərbaycan bu gün regionda iqtisadi sabitliyi, əlverişli investisiya mühiti və etibarlı tərəfdaş imici ilə seçilən ölkələrdən biridir. Eyni zamanda, ölkəmizdə xarici investisiyaların cəlb olunmasına xidmət edən müasir qanunvericilik bazasının formalaşdırılması, dövlət tərəfindən yerli və xarici investorlar üçün əlverişli biznes mühitinin yaradılması Azərbaycanın beynəlxalq maliyyə institutları və sərmayədarlar üçün cəlbediciliyini artırır.
Dövlət zəmanəti ilə həyata keçirilən iri layihələr və beynəlxalq maliyyə sazişləri müntəzəm olaraq Milli Məclisdə müzakirə edilərək təsdiqlənir. Bu proses dövlətin maliyyə və investisiya siyasətində şəffaflığın təmin edilməsinə, həmçinin cəmiyyətin nümayəndələri vasitəsilə qərarların qəbulunda iştirakına imkan yaradır. Bütün bunlar Azərbaycanın beynəlxalq maliyyə institutları ilə əməkdaşlığının daha da genişlənməsi üçün möhkəm zəmin formalaşdırır.
Həqiqətən də, son illər Azərbaycanın həyata keçirdiyi uğurlu iqtisadi siyasət, regional və qlobal əhəmiyyət daşıyan təşəbbüslər, eləcə də beynəlxalq təşkilatlarla səmərəli əməkdaşlığı ölkəmizin nüfuzunu daha da artırıb. İƏT Parlament İttifaqının Bakı sessiyası da bir daha göstərdi ki, Azərbaycan İslam dünyasının həmrəyliyinə, sülhə, qarşılıqlı dəstəyə və ortaq inkişaf ideyalarına mühüm töhfələr verən dövlətlərdən biridir.
Müsəlman ölkələri arasında siyasi və iqtisadi əməkdaşlığın gücləndirilməsi, parlament diplomatiyasının inkişafı və ortaq problemlərin birgə həlli istiqamətində belə platformaların əhəmiyyəti bundan sonra da artacaq. Azərbaycanın bu proseslərdə fəal iştirakı həm ölkəmizin beynəlxalq mövqeyinin möhkəmlənməsinə, həm də İslam dünyasında birliyin və həmrəyliyin daha da güclənməsinə xidmət edir.
Cavanşir Feyziyev,
Milli Məclisin deputatı.
