Ramil Hüseynov: “Zaxarovanın hansı hədə ilə çıxış etməsindən asılı olmayaraq proseslər geridönməzdir”
Ermənistan Kollektiv Təhlükəsizlik Müqaviləsi Təşkilatında (KTMT) illərdir davam edən üzvlük haqqı borcu səbəbindən işçi orqanlarda səsvermə hüququndan məhrum edilə bilər. Bu barədə Rusiya Xarici İşlər Nazirliyinin rəsmi nümayəndəsi Mariya Zaxarova “RIA Novosti”yə bildirib.
O, təşkilatın nizamnaməsinin 25-ci maddəsinə istinad edərək qeyd edib ki, öhdəliklərin yerinə yetirilməməsi halında üzv dövlətlərə qarşı müvafiq tədbirlər tətbiq oluna bilər: “Büdcəyə iki il ərzində borc yaranarsa, kvota vəzifələrinə namizəd irəli sürmək hüququnun dayandırılması, eləcə də borc tam ödənilənədək işçi orqanlarda səsvermə hüququnun məhdudlaşdırılması nəzərdə tutulur”.
Guya bu xəbərdarlıqla nəsə dəyişəcək? Elə Paşinyanın istəyi bu deyilmi?
Sözügedən məsələ ilə bağlı fikirlərini baki-xeber.com-la bölüşən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, Zaxarovanın bu xəbərdarlığı gülünc doğurur: “Ən azından ona görə ki, Ermənistan hakimiyyətinin bu məsələdə mövqeyi bəllidir. Onlar açıq şəkildə bəyan edirlər ki, geri dönüş olmayacaq. Baş nazir Nikol Paşinyan bu günlərdə açıq bəyan edib ki, Ermənistan üzvlük haqlarını ödəməyəcək. Heç nəyi dəyişmək fikrində deyillər Bundan başqa, o, Ermənistanın KTMT-dən çıxarılması ehtimalının onu narahat etmədiyini deyib. Əgər ölkənin birinci şəxsi KTMT ilə bağlı belə mövqe ortaya qoyursa, o zaman Rusiya tərəfinin belə xəbərdarlıqla çıxış etməsinin anlamı nədir? Paşinyan hakimiyyətinin istəyi odur ki, KTMT Ermənistanı blokdan çıxarsın. Ermənistan özü də blokdan çıxa bilər. Sadəcə Paşinyan siyasi manevr edərək Putinin əlinə arqument verib onu qəzəbləndirmək istəmir. Onsuz da Rusiya son vaxtlar Ermənistana qarşı iqtisadi təzyiqləri artırıb. Belə bir vaxtda Ermənistan KTMT-dən rəsmən çıxsa, bu, Rusiyanın sanksiyaları daha da genişləndirilməsinə, qazın qiymətini artırmasına səbəb olacaq. Paşinyan hakimiyyətinin istəyi odur ki, KTMT Ermənistanı hərbi blokdan çıxartsın. Zaxarovanın nə deməsindən, hansı hədə ilə çıxış etməsindən asılı olmayaraq sözügedən məsələdə proseslər geridönməzdir. Nəzərə almaq lazımdır ki, Ermənistanda mövcud hakimiyyət seçkilərdə yeni qələbə qazanıb. Onların qələbə qazanması o deməkdir ki, erməni cəmiyyəti Ermənistanın Rusiyanın marionetkası olmaq istəmir. O baxımdan KTMT ilə bağlı xəbərdarlıq Ermənistanda əks effekt verəcək”.
Vidadi ORDAHALLI
