Elşad Həsənov: “Ukraynanın hərbi uğurları hər keçən gün Tramp administrasiyasının mövqeyinə öz təsirini göstərir”
Birləşmiş Millətlər Təşkilatının iclasında ABŞ Rusiya təcavüzünə qarşı mübarizədə Ukraynaya dəstəyini bir daha təsdiqləyib və Moskvanı dərhal sülh danışıqlarına razılıq verməyə çağırıb. Bunu ABŞ-ın BMT-dəki daimi nümayəndəsinin müavini Den Neqrya bildirib.
Diplomatın sözlərinə görə, Vaşinqton Ukrayna xalqının öz azadlığını və dövlət suverenliyini müdafiə etməsində ona dəstək olmağa davam edir və Rusiyanın mülki infrastruktura və mədəni irsə hücumlarını pisləyir. O, ABŞ prezidenti Donald Trampın "G7" sammiti zamanı səsləndirdiyi mövqeyini xatırladıb: “Rusiya razılığa gəlməlidir. Zaman Moskvanın tərəfində deyil”. Vaşinqton həmçinin Rusiya ordusundakı əhəmiyyətli itkiləri qeyd edib.
Tramp dövründə ABŞ-ın belə sərt mövqeyi nadir haldır. ABŞ-ın mövqeyini sərtləşdirməsi Rusiyaya təsir göstərəcəkmi? Tramp niyə sözügedən məsələdə mövqeyini sərtləşdirir?
Sözügedən məsələni baki-xeber.com-a şərh edən siyasi ekspert Elşad Həsənovun fikrincə, son vaxtlar Ukraynanın təşəbbüsü ələ alması, Rusiyaya güclü zərbələr endirməsi ABŞ-ın mövqeyinə öz təsirini göstərib: “Son zamanlar Ukraynanın Rusiyanın təcavüzünə qarşı apardığı dron müharibəsi, bu ölkənin dərinliklərinə endirdiyi zərbələr öz effektini göstərir. Endirilən zərbələr Rusiya daxilində çox böyük problemlər yaradır. Xüsusən də neft emalı zavodlarının vurulması Rusiyada ciddi yanacaq çatışmazlığı probleminə səbəb olub. Artıq Rusiya kimi dünyaya yanacaq satan ölkədə böhran yaranıb. Krım yarmadasında mülki əhaliyə benzin satılması dayandırılıb. Rusiyanın bir sıra digər şəhərlərində isə, avtomobil sahiblərinə 20 litrdən artıq benzin satılmır. Hətta bu məsələ Rusiya Təhlükəsizlik Şurasında müzakirəyə çıxarılıb. Tramp əvvəl Putinin mövqeyindən çıxış edirdi. Çünki hesab edirdi ki, Ukrayna Rusiyanın qarşısında duruş gətirməyəcək. Ona görə də bütün vasitələrlə Ukrayna prezidenti Volodimir Zelenskiyə təzyiq göstərirdi və onu güzəştə getməyə çağırırdı. Tramp görəndə ki, Ukrayna ciddi müqavimət göstərir və Rusiyaya güclü zərbələr endirir, bu zaman mövqeyini dəyişməyə başladı. Tez-tez bəyan edir ki, Rusiya hər ay cəbhədə 25-30 min əsgər itirir. Proseslərə təsir edən digər amil Ukraynanın hərbi sənayesinin sürətlə inkişaf etməsidir. Hələ SSRİ dönəmində Ukrayna güclü hərbi sənaye potensialına malik idi. Sonra sözügedən sahədə ciddi durğunluq yarandı. Rusiyanın Ukraynaya təcavüzündən sonra Avropanın yardımı ilə hərbi sənayenin inkişafı müşahidə edilir. Artıq Ukrayna öz balestik raketlərini yaratmaqdadır. Digər növ Ukrayna istehsalı raketlərlə Rusiyanın bir sıra kritik obyektlərinə zərbələr endirilir. Bir sözlə, Ukraynanın hərbi uğurları hər keçən gün Tramp adminstrasiyasının mövqeyinə öz təsirini göstərir. Ona görə də BMT çərçivəsində keçirilən müzakirələrdə ABŞ-ın daimi nümayəndəsinin müavini Rusiyanı sülh danışıqlarına razılıq verməyə çağırdı. Fikrimcə, ABŞ-la İranın razılığa gəlməsinin də buna təsiri var. Üstəlik, G7 sammitində Avropa liderləri Ukrayna məsələsində Trampı əmin edə bildilər. Fikrimcə, Avropa və ABŞ Ukraynaya dəstəyi daha da artırsalar Rusiya sülhə məcbur olacaq”.
Vidadi ORDAHALLI
