Milyarder Samvel Karapetyanın rəhbərlik etdiyi "Güclü Ermənistan" alyansı iyunun 7-də keçirilən parlament seçkilərindən sonra baş nazir Nikol Paşinyana qarşı vahid cəbhə yaratmaq məqsədilə ölkənin iki digər böyük müxalifət qüvvəsi ilə danışıqlara başlayıb. Karapetyan "seçkidən sonrakı müxalifət koalisiyası" ideyasını irəli sürüb. O, hökumətə qarşı birgə addımları əlaqələndirmək üçün müxalif qüvvələrin iştirakı ilə xüsusi "əlaqələndirmə şurası" yaradılmasını təklif edib.
Keçmiş prezident Robert Köçəryanın "Hayastan" alyansı bu təklifi dərhal müsbət qarşılayıb. Köçəryan jurnalistlərə açıqlamasında Karapetyanın təşəbbüsünü yüksək qiymətləndirib. "Hayastan" blokundan deputatlığa namizəd olmuş Levon Köçəryan həftəsonu danışıqların müsbət istiqamətdə getdiyini və tezliklə yaxşı xəbərlər veriləcəyini bildirib. Blokun digər rəsmisi İşxan Sağatelyan isə müxalifət arasında məsləhətləşmələrin davam etdiyini təsdiqləsə də, detalları açıqlamayıb. Ermənistan Mərkəzi Seçki Komissiyasının məlumatına görə, Paşinyanın "Vətəndaş Müqaviləsi" partiyası 49.8 faiz səslə seçkilərdə qalib gəlib. "Güclü Ermənistan" 23.3 faizlə ikinci, "Hayastan" 9.9 faizlə üçüncü, Qaqik Tsarukyanın "Çiçəklənən Ermənistan" partiyası isə 4 faizdən bir qədər az səslə dördüncü sırada qərarlaşıb. Rəsmi nəticələrin saxtalaşdırıldığını bildirən bu üç partiya və digər üç müxalif qrup seçkilərin ləğvi üçün Konstitusiya Məhkəməsinə müraciət edib.
Tsarukyanın müttəfiqi Suren Surenyants "Çiçəklənən Ermənistan"ın da danışıqlarda iştirak etdiyini təsdiqləyib. Onun sözlərinə görə, rus-erməni milyarder Karapetyan hakimiyyət dəyişikliyi üçün hələlik konkret yol xəritəsi təqdim etməyib. Surenyants düşünür ki, birgə aksiyaların uğuru məhz bu sənəddən asılıdır. Müxalif siyasətçinin fikrincə, Karapetyan, Köçəryan və Tsarukyan əsas qərarları üçtərəfli görüşdə qəbul edəcəklər. Hələlik belə bir görüşün anonsu verilməyib. Müxalifət tərəfdarlarının çoxu hüquqi müstəvidəki mübarizəyə şübhə ilə yanaşır və küçə aksiyalarının bərpasını tələb edir. Surenyantsın düşərgəsi isə hesab edir ki, "ildırımsürətli inqilab" real olmadığı üçün müxalifət tələsməməli və uzunmüddətli müqavimətə hazırlaşmalıdır. Surenyants bildirib: "Hakimiyyət ətrafındakı daxili və xarici təlatümlər səngiməyəcək, əksinə, problemlər daha da dərinləşəcək. Paşinyanın xarici öhdəlikləri və Rusiya-Ermənistan münasibətlərindəki ciddi böhran da buna daxildir. Ona görə də müxalifət ortamüddətli fəaliyyət proqramı qəbul etməlidir".
Samirə SƏFƏROVA
