Gürcüstanın üçüncü prezidenti Mixeil Saakaşvili özünü Nelson Mandela ilə müqayisə edərək, səsinin digər gürcülərin fikirlərindən daha vacib olduğunu bildirib. O, bu açıqlamanı tanınmış gürcü jurnalisti Nanuka Jorjolianinin Vahid Milli Hərəkata rəhbərlik etməsi ilə əlaqədar verib. Saakaşvili təkcə partiyanı böhrandan çıxarmaqla kifayətlənmək niyətində deyil: “Bəli, mən təcrid olunmuşam, əsasən özüm və həbsxana işçiləri ilə ünsiyyətdə oluram. Amma ən əsası, paylaşımlarımı oxuyanlar mənim çaşqın və bu ölkədə baş verənlərdən xəbərsiz olmadığımı görürlər... Nelson Mandela 30 il həbsxanada yatıb, lakin onun fikirləri Afrika Milli Konqresi tərəfindən müntəzəm olaraq oxunub”.
Saakaşvili, həmçinin, onu "Gürcü Arzusu"nun qurucusu Bidzina İvanişvili ilə müqayisə etməyin səhv olduğunu bildirib. Saakaşvilinin sözlərinə görə, keçmiş baş nazir partiyasını pula və zorakılığa güvənərək idarə edir, özü isə yalnız mənəvi nüfuza güvənir. Vahid Milli Hərəkat Partiyasının hazırkı sədri Tina Bokuçava təşkilatın iyul ayında keçiriləcək qurultayından sonra istefa verəcək. Saakaşvili həbsdə olduğu müddətdə Bokuçava və Jorjolianinin təşkilata birgə rəhbərlik etməsinə açıq idi, lakin qadınlar ortaq məxrəc tapa bilmədilər. Parlamentin vitse-spikeri və “Gürcü Arzusu” Partiyasının üzvü Nino Tsilosani bildirib: “Vahid Milli Hərəkat Partiyasında Saakaşvilinin qeyri-adi lider olduğu heç kimə sirr deyil, amma indi qadınlar onun arxasındakı yer uğrunda bir-biri ilə mübarizə aparırlar. Bu, ən böyük faciədir... Vahid Milli Hərəkat Partiyası tənəzzüldə olan bir partiyadır. Onu davam etdirən yeganə şey liderləri Saakaşvilini, sanki Stokholm sindromu keçirmiş kimi sevən tərəfdarlarıdır”. Nanuka Jorjoliani 2024-cü ilin sonlarında hökumət əleyhinə etirazları, o cümlədən əvvəllər xəstə uşaqlara kömək edən və etirazlarda saxlanılanların cərimələrini ödəmək üçün vəsait toplamağa başlayan Nanuki Fondunu dəstəkləyib. Buna cavab olaraq, hakimiyyət orqanları təşkilatın hesabını dondurub və həmin vaxta qədər hesabda bir neçə yüz min lari toplanıb. 2026-cı ildə Nanuka Jorjoliani piyadaların hərəkətinə mane olduğuna görə üç gün həbs edilib. O iddia edir ki, Saakşavilinin partiyasında böhran meneceri olmaq niyyətindədir. Partiyanın ciddi problemləri olduğu 2024-cü il parlament seçkilərindən sonra da aşkar idi. O vaxtlar partiya səslərin yalnız 10%-ni toplamışdı, keçmiş sədri Nika Melianın rəhbərlik etdiyi “Axali” partiyası isə 11% səs toplamışdı. Hər iki təşkilat hazırda Müxalifət Alyansının bir hissəsidir, lakin Saakaşvili onu məhv etmək üçün çalışır.
Keçmiş prezident bu yaxınlarda etdiyi çıxışında “Axali” və “Lelo” partiyalarının tam hüquqlu siyasi təşkilatlar olmadığını, əksinə, Vahid Milli Hərəkatdan səs oğurlamağa ümid edən şəxslərin biznes layihələri olduğunu iddia etdi. O, həmçinin, digər müxalifət fiqurlarını “Gürcü Arzusu” üçün işləməkdə, demokratik ideallara xəyanət etməkdə və sairdə ittiham etdi.
“Lelo”nun icraçı katibi Tazo Datunaşvili keçmiş prezidentə cavab olaraq bildirib ki, "Qızılgül İnqilabı"nın yaradıcısı və müstəqil Gürcüstanın memarlarından biri olan insanın indiki vəziyyətinə düşməsi təəssüf doğurur. Hər necə olsa, Vahid Milli Hərəkat Partiyası iyul ayında Müxalifət Alyansından çıxmağı nəzərdən keçirəcək. Lakin görünür, qərar artıq verilib. Bokuçavanın sözlərinə görə, o və Saakaşvili əvvəlcə birləşməyə qarşı çıxıblar.
Bu arada, Gürcüstanın baş naziri İrakli Kobaxidze müxalifət düşərgəsindəki fikir ayrılığından sevincini gizlətmir. O, bütün radikal müxalifətin kadr və intellektual çatışmazlığından əziyyət çəkdiyinə inanır: "Vahid Milli Hərəkat Partiyası və onun müttəfiq qüvvələri kimi partiyalar müxalifətin əsasını təşkil etdiyi müddətcə ölkəmizdə sağlam demokratik sistem formalaşa bilməz. Bu partiyaların getdikcə zəifləməsi yaxşıdır. Bu şəraitdə Gürcüstan sağlam müxalifət spektri və nəticədə sağlam demokratik sistem inkişaf etdirmək potensialına malikdir".
Tahir TAĞIYEV
