Abutalıb Səmədov:“Kir Starmerin istefasının əgər yüz səbəbi varsa, burada Rusiya olsa-olsa yüzüncü yeri tuta bilər”
Böyük Britaniyanın Baş naziri Kir Starmerin istefasından sonra Putinin xüsusi nümayəndəsi Kirill Dmitriyev bildirib ki, siyasətini dəyişməsə, növbədə Almaniya kansleri Fridrix Merts olacaq.
Starmerin istefası ilə bağlı fikirlərini sosial mediada paylaşan Dmitriyev Starmeri immiqrasiya, cinayətkarlıq, enerji və iqtisadiyyat sahələrində yanlış siyasət yürütməkdə günahlandırıb: "Starmerin müharibəpərəst və yanlış siyasətini daim ifşa edərək buna birlikdə nail olduq. O, Britaniyanı qoruya bilmədi və Qərb sivilizasiyasını məhv edirdi. Əgər siyasətini dəyişməsə, növbə Mertsindir".
Dmitriyev iddia edib ki, Britaniyanın son 10 ildə vəzifə yerinə yetirən yeddi baş nazirin yaratdığı problemləri həll etmək üçün Çörçill kimi bir liderə ehtiyacı var.
Kreml sözçüsü Dmitri Peskov da mətbuat konfransında Starmerin qərarına münasibət bildirib. Peskov Starmerin Ukraynanın əsas dəstəkçilərindən biri olduğunu və Baş nazirin istefasının Londonun Rusiyaya qarşı "düşmən" münasibətini dəyişdirməyəcəyini vurğulayıb.
Kreml sözçüsü bildirib ki, Starmer Britaniya-Rusiya münasibətləri ilə bağlı özünü fərqləndirmək üçün heç bir iş görməyib: “O, həmişə münasibətləri sıfır səviyyədə saxlamağın tərəfdarı olub. Britaniya siyasi səhnəsində heç kimin ölkəmiz haqqında Starmerdən fərqli bir fikirdə olması ehtimalı azdır”.
Yəni doğurdan Starmerin iflası Rusiyaya qarşı apardığı siyasətdın qaynaqlanıb?
“Alyans”SAM-ın sədri Abutalıb Səmədov baki-xeber.com-a bildirdi ki, Kir Starmerin istefasında Rusiya amili ola bilsin müəyyən qədər rol oynayıb. “Ancaq bu həddindən artıq kiçik bir roldur. Yəni Ukrayna müharibəsi təbiidir ki, bütün Avropaya təsir edib. Avropada iqtisadiyyatın inkişafını ləngidən amillərdən biri olub. Avropa ölkələri, o cümlədən Böyük Britaniya Ukraynaya yardımlar etmək məcburiyyətində qalıblar. Bu da təbiidir ki, əhalinin dolanışığına öz təsirini göstərib, onların narazılığının artmasına gətirib çıxarıb və son nəticədə xalqın, vətəndaşların hakimiyyətdən ciddi narazılığını doğurub. Ancaq Kir Starmerin istefasının əgər yüz səbəbi varsa, burada Rusiya olsa-olsa yüzüncü yeri tuta bilər. Əsas səbəb ölkə iqtisadiyyatının günü-gündən geri getməsi ilə bağlıdır. Starmer 2024-cü ildə hakimiyyətə gələndə və seçkiləri udanda özü də bəyan eləmişdi ki, biz hakimiyyətə gələndən sonra vəziyyət pisləşəcək. Sonradan tədricən yaxşılaşmağa başlayacaq. Ancaq bu sonradan nə vaxt olacaq? Nə vaxt yaxşılaşmağa başlayacaq? Bu gün o qədər də aydın deyil və xalq da bunu başa düşə bilmir və qəbul etmək istəmir. Elə Leyboristlər Partiyasının həm ilin əvvəlində keçirilən seçkilərdə parlamentə boş yerlərə keçirilən seçkilərdə məğlub olması, sonrada yerli seçkilərdə uğursuzluğa düçar olması ölkədəki iqtisadi durumungünü-gündən yaxşılaşmaması, pisləyə doğru getməsi ilə bağlıdır. Xüsusilə İran hadisələri də vəziyyəti bir az ağırlaşdırdı”.
A.Səmədov qeyd etdi ki, çünki Hörmüz boğazının bağlanması neftin qiymətini xeyli qaldırdı və bu da digər qiymətlərə ciddi şəkildə təsir göstərdi. “Leyboristlər anlamağa başladılar ki, lider dəyişməsə onları qarşıdakı illərdə yaxşı heç nə gözləmir. Baxmayaraq ki, Starmerə ciddi nöqsan sayıla biləcək elə hadisələr yox dərəcəsində idi. Bir-iki hadisəni sadalayırdılar. Tutaq ki, kiminsə Starmerə gün eynəkləri bağışlamasını qeyd edirdilər ki, hardasa 240 funt-sterlinq dəyərində olub və onu da o rəsmləşdirmişdi. Ancaq bütün hallarda bu hədiyyə cəmiyyətdə yaxşı qarşılanmamışdı. Yaxud onun Mandelsonu səfir təyin etməsi. Müəyyən prosedurlara əməl olunmamışdı və o səfir təyin olundandan sonra məlum olmuşdu ki, Mandelson adı çox ciddi cinayətlərdə hallanan Cefri Epşteynlə yaxın əlaqələri var. Bu skandal da Starmerin nüfuzuna çox ciddi təsir göstərdi. Ancaq həlledici amil təbiidir ki, iqtisadi vəziyyətin ağırlaşması oldu və Leyboristlər Partiyası Starmerin liderlikdən getməsini və onun yerinə daha nüfuzlu, daha perspektivli bir şəxsin seçilməsini düzgün saydı. Uzun müddət Starmer müqavimət göstərsə də, istefa vermək məcburiyyətində qaldı. İstefanın kökündə dayanan bu amil oldu. Ancaq Rusiya təmsilçiləri təbiidir ki, dünyada baş verən hər cür uğursuzluğu Rusiyaya bağlamağa, Rusiya ilə olan münasibətlərdəki problemlərə bağlamağa çalışırlar və bu da bizim üçün yeni hadisə deyil”-deyə A.Səmədov qeyd etdi.
İradə SARIYEVA
