Ramil Hüseynov: “Paşinyan bu dəfə seçkilərdə böyük üstünlüklə qalib gəlsə və Aİ ilə bağlı siyasətinə yenidən baxmasa...”
Ermənistanın Avrasiya İqtisadi İttifaqına (Aİİ) üzvlüyünün dayandırılması prosedurunun dekabra qədər hazırlanması planlaşdırılır. Bunu Rusiya Baş nazirinin müavini Aleksey Overçuk deyib.
“Hazırda üzvlüyün dayandırılmasının hansı nəticələrə səbəb olacağını öyrənəcəyik. Məsələ ondadır ki, Aİİ haqqında müqavilədə nə üzvlüyün dayandırılması, nə də üzv ölkələrin ittifaqdan xaric edilməsi mexanizmi mövcuddur. Buna görə də bütün bu məsələlər hüquqi baxımdan diqqətlə araşdırılmalıdır”, - deyə Overçuk qeyd edib.
Overçuk bildirib ki, Ermənistanda keçiriləcək seçkilərdə avropapərəst qüvvələr qələbə qazanacağı təqdirdə Rusiya müvafiq addımlar atacaq: “Biz gələcəyini Avropa İttifaqında görən bir ölkəni maliyyələşdirmək niyyətində deyilik. Avropa İttifaqı Rusiya ilə qarşıdurmaya hazırlaşır. Sabah bizimlə qarşı-qarşıya gələ biləcək qüvvələri niyə dəstəkləməliyik?”.
Sözügedən məsələni baki-xeber.com-a şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, Ermənistanın Avropa İttifaqına üzv olmağı heç üfüqdə də görünmür: “Bunu Rusiya tərəfi də yaxşı bilir. Məsələ ondadır ki, Aİ-yə üzv olmaq heç də asan deyil. Sadəcə, Rusiya hakimiyyətinə təsir edən odur ki, Ermənistan Moskvanın yaratdığı qurumlarda təmsil olunmaqla Avropaya üz tutub. Yəni gələcəyini Avropa İttifaqında görmək istəyir. Özü də məsələ tək Paşinyan hakimiyyətinin götürdüyü kursla bağlı deyil. Məsələ ondadır ki, erməni cəmiyyətinin böyük hissəsi Avropa kursunu dəstəkləyir. Yoxsa Paşinyan bu qədər irəli gedə bilməzdi. Paşinyan bu dəfə seçkilərdə böyük üstünlüklə qalib gəlsə və Aİ ilə bağlı siyasətinə yenidən baxmasa, Ermənistanın Aİİ-dən çıxarılması ehtimalı var. Yox əgər seçkilərdə Rusiyaya bağlı revanşistlər qalib gəlsə, bu məsələ gündəlikdən çıxacaq. Rusiyanın əlində Ermənistana təsir etmək üçün kifayət qədər iqtisadi rıçaqlar var. Ancaq Rusiyanın bütün bunlardan sona qədər tam gücü ilə istifadə edəcəyi bir qədər şübhəlidir. Çünki o zaman erməni cəmiyyətinin Rusiyaya nifrəti daha da artacaq və Moskvaya bağlı siyasi qüvvələr pis vəziyyətə düşəcəklər. Bir sözlə, Putin Ermənistana mesaj verir ki, Aİİ-nin iqtisadi imkanlarından yararlanmaqla Avropaya inteqrasiya kursunu yeritməyə daha dözməyəcəklər. Məsələ ondadır ki, Kreml Ukrayna və Moldovada baş verənlərin Ermənistanda təkrarlanmasını istəmir. O üzdən, Ermənistan məsələsində bu qədər həssas və yeri gələndə sərt mövqedən çıxış edirlər. Çünki Cənubu Qafqazda sonununcu qalanı itirməkdə olduqlarının fərqindədilər”.
Vidadi ORDAHALLI
