Qulamhüseyn Əlibəyli: “Bu, həm Ermənistanı şantaj cəhdidir, həm də Azərbaycan üçün iqtisadi imkan deməkdir”
Rusiya Prezidentinin xüsusi nümayəndəsi Boris Titov kənd təsərrüfatı məhsullarının tədarükü baxımından Azərbaycanın Rusiyaya Ermənistandan daha çox məhsul təqdim edə biləcəyini bildirib.
Onun sözlərinə görə, Rusiya bazarında Ermənistan kənd təsərrüfatı məhsullarının yerini Azərbaycan məhsulları tuta bilər.
Titov qeyd edib ki, kənd təsərrüfatı sahəsində Azərbaycanın istehsal və ixrac potensialı Ermənistandan daha genişdir və bu, Rusiyanın tələbatının ödənilməsində mühüm rol oynaya bilər.
Maraqlıdır, Rusiya həqiqətən də Azərbaycana belə bir fürsət, meydan verərmi, yoxsa ölkəmizin adından istifadə edərək Ermənistanı şantaj edir?
Sözügedən məsələ ilə bağlı fikirlərini baki-xeber.com-la bölüşən sabiq millət vəkili, hüquqşünas Qulamhüseyn Əlibəyli hesab edir ki, Titovun Azərbaycanın Rusiyaya kənd təsərrüfatı məhsullarının tədarükü baxımından Ermənistandan daha böyük imkanlara malik olması barədə fikirləri, həm Ermənistanı şantaj cəhdidir, həm də Azərbaycan üçün iqtisadi imkan kimi qiymətləndirilə bilər: “Ermənistandan kənd təsərrüfatı məhsullarının idxalının Rusiya tərəfindən dayandırılmasının iki gündən sonra keçiriləcək parlament seçkilərin nəticələrinə təsir göstərmək üçün sırf siyasi məqsədlərlə həyata keçirildiyi hamıya aydındır. Moskva bununla Ermənistanın kənd təsərrüfatı istehsalçılarını Rusiyanın təsirindən uzaqlaşmağa çalışan Paşinyan hakimiyyətinə qarşı qaldırmağa çalışır. Həmçinin onları özünün nəzarəti altında olan revanşistlərə səs verməyə məcbur etmək istəyir. Başqa sözlə, kənd təsərrüfatı məhsullarının idxalının dayandırılması Ermənistana kobud təzyiq və şantaj vasitəsi kimi baxılır. Lakin Rusiya Ermənistandakı parlament seçkilərinin nəticələrinə əhəmiyyətli təsir göstərə bilməyəcəyini artıq dərk etdiyindən daxili bazarda kənd təsərrüfatı məhsullarına olan tələbatını ödəmək üçün alternativ yollar axtarır. Bu alternativdə Azərbaycana üstünlük verdiyini bildirir”.
Q. Əlibəylinin fikrincə, Rusiya bir neçə dəfə Azərbaycana münasibətdə də belə təzyiq vasitəsindən istifadə edib: “Və Azərbaycanda istehsal olunan kənd təsərrüfatı məhsullarının Rusiya bazarlarına daxil olmasını məhdudlaşdırıb. Yəni bu, o demək deyil ki, nə vaxtsa Azərbaycan da oxşar şantaja məruz qalmayacaq. Digər tərəfdən, həqiqətən də Azərbaycanın kənd təsərrüfatı sahəsində istehsal və ixrac potensialı Ermənistandan daha genişdir. Azərbaycanın əlverişli coğrafi mövqeyi, müxtəlif iqlim qurşaqlarına malik olması, münbit torpaq ehtiyatları kənd təsərrüfatı məhsullarının istehsalı və ixracı sahəsində ölkənin potensialını əhəmiyyətli dərəcədə yüksəldir. Azərbaycan ilə Rusiya arasında mövcud olan nəqliyyat-logistika infrastrukturu, o cümlədən, beynəlxalq nəqliyyat dəhlizləri və sərhəd keçid məntəqələrinin imkanları buna şərait yaradır. Bu, kənd təsərrüfatı məhsullarının qısa müddətdə və keyfiyyətini itirmədən Rusiya bazarına çatdırılmasına imkan verir. Xüsusilə tez xarab olan məhsulların ixracı üçün ölkəmizin mümkün potensialını daha da artırır. Bu baxımdan Azərbaycan Rusiyaya daha çox çeşiddə və həcmdə kənd təsərrüfatı məhsulları ixrac edə bilər. Eyni zamanda Rusiya bazarının müvafiq tələbatının ödənilməsində mühüm rol oynaya bilər. Bütövlükdə, Azərbaycanın kənd təsərrüfatı məhsullarının istehsal həcmi, çeşid müxtəlifliyi və logistika imkanları nəzərə alındıqda, imkanlar böyükdür. Ölkəmizin Rusiya bazarında mövqelərinin gələcəkdə daha da güclənməsi üçün geniş perspektivlər mövcuddur. Bu isə Azərbaycan-Rusiya iqtisadi münasibətlərinin inkişafında yeni imkanlar açmaqla yanaşı, regionda qarşılıqlı faydalı əməkdaşlığın genişlənməsinə xidmət edə bilər”.
Vidadi ORDAHALLI
