Əli Mustafa: “Hesab edirəm hələ də imkan və fürsət var, yetər ki, Birləşmiş Ştatlar bunda qərarlı olsun”
Məlum olduğu kimi, Ermənistan və Azərbaycan 8 avqust 2025-ci il tarixində Vaşinqtonda sülh sazişini paraflayıblar. Həmin vaxtdan sonra gözləntilər var idi ki, ABŞ 907-ci düzəlişi buna görə birdəfəlik ləğv edəcək.
Çünki o vaxt bədnam düzəliş ona görə qəbul edilmişdi ki, guya Azərbaycan Ermənistanı blokadada saxlayır. Ancaq Vaşinqton görüşündən sonra Azərbaycan üzərindən Ermənistana daşımalar həyata keçirilir və hər hansı blokada deyilən bir şey ortada yoxdur. Lakin bu günlərdə məlum oldu ki, Tramp 907-ci düzəlişi yenə bir il dondurub.
O da məlumdur ki, noyabrda ABŞ Konqresində aralıq seçkilər keçiriləcək. Həmin seçkilərdən sonra bədnam düzəlişi birdəfəlik ləğvi çıxmaza düşməzmi? Çünki Demokratlar Partiyasının qalib gəlmə ehtimalı böyükdür. Niyə bu dəfə düzəliş birdəfəlik ləğv edilmədi, axı buna imkan var idi?
Sözügedən məsələni baki-xeber.com-a şərh edən siyasi ekspert Əli Mustafanın fikrincə, həqiqətən də 907-cü düzəlişi ləğv etmək üçün indi daha münasib vaxtdır: “Ona görə ki, Prezident Trampın Konqresdə həm Nümayəndələr Palatasında, həm də Senatda nəzarət imkanları var. Söhbət Konqresin hər iki qanadında çoxluğun hakim Respublikaçılar Partiyasının tərəfində olmasından gedir. Noyabr seçkilərindən sonra balansın dəyişəcəyi gözlənilir. Məsələ ondadır ki, erməni lobbisinin Demokratlar Partiyasına güclü təsir imkanı var. Həmin partiya imkan verməz ki, 907-ci düzəliş birdəfəlik ləğv edilsin. Yəni siyasi məqsədəuyğunluq baxımından 907-ci düzəlişi indi birdəfəlik ləğv etmək üçün daha münasib vaxtdır. Bir neçə ay əvvəl bununla bağlı ümidlər var idi. Ancaq əfsuslar olsun ki, bu, baş vermədi. Bu məsələdə bir vacib məsələ də var. Konkret olaraq 907-ci düzəliş o zaman guya Azərbaycanın Ermənistanı blokadaya alması səbəbindən qəbul edilmişdi. Yəni hansı səbəbdən bu qərar qəbul edilmişdisə, artıq bu, aradan qaldırılıb. Ona görə də əslində Konqresdə hər iki partiya bu qərarın ləğvinə qarşı çıxmamalıdılar. Paşinyan seçkilərdə qalib gəlsə, öz tərəfindən müraciət edə bilər. O mənada ki, Azərbaycan tərəfindən Ermənistana qarşı blokada yoxdur. Fikrimcə, belə bir müraciət olsa, bu, ümumi işə fayda verə bilər. Hesab edirəm hələ də imkan və fürsət var, yetər ki, Birləşmiş Ştatlar bunda qərarlı olsun. O da məlumdur ki, iqtisadi nöqteyi-nəzərdən 907-ci düzəliş Azərbaycan üçün elə böyük maneə deyil. Sadəcə, siyasi baxımdan belə bir düzəlişin mövcudluğu bizim xeyrimizə deyil. Çünki Azərbaycanla ABŞ arasında strateji tərəfdaşlıq sazişi olduğu üçün belə bir düzəlişin mövcudluğu iki ölkə münasibətlərinin ruhuna ziddir. Ən azından ABŞ-ın öz strateji tərəfdaşına fərqli yanaşması olmalıdır. Hər halda ümid edirəm ki, 907 gec-tez ləğv ediləcək”.
Vidadi ORDAHALLI
