Ukrayna Xarici Kəşfiyyat Xidmətinin hesabatına görə, Rusiya 7 iyun parlament seçkiləri ərəfəsində Ermənistana siyasi, informasiya və iqtisadi təzyiqi əhəmiyyətli dərəcədə artırıb. Qeyd edilir ki, Kremlin əsas məqsədi hazırkı baş nazir Nikol Paşinyanın seçkilərdə məğlubiyyəti ilə tam rejim dəyişikliyi etməkdir. Ən azından, Moskva yeni parlamenti parçalamağa, Avropa tərəfdarı “Vətəndaş Müqaviləsi” partiyasını xarici siyasət və milli təhlükəsizliklə bağlı birtərəfli qərarlar qəbul etmək qabiliyyətindən məhrum etməyə çalışır.
Xarici Kəşfiyyat Xidmətinin məlumatına görə, bu müdaxilə strategiyası Rusiya Prezident Administrasiyasının Strateji Əməkdaşlıq və Tərəfdaşlıq İdarəsi vasitəsilə əlaqələndirilir. Əməliyyat illərlə davam edən təsir kampaniyaları nəticəsində qurulmuş bir-biri ilə əlaqəli bir neçə mexanizmə əsaslanır. Kampaniya may ayının sonlarında Moskvanın Ermənistanın mühüm ixrac məhsullarına qarşı hədəf ticarət qadağaları tətbiq etməsi ilə sürətlənməyə başladı. Xarici Kəşfiyyat Xidməti bildirib ki, “Rusiya Ermənistan mallarının, o cümlədən tərəvəz, çiçək, mineral su, eləcə də konkret istehsalçılardan konyak və şərabların idxalına bir sıra məhdudiyyətlər tətbiq edib. Formal olaraq, Moskva bu tədbirləri “fitosanitar pozuntular” və məhsul təhlükəsizliyi ilə bağlı narahatlıq kimi izah edir, ticarətdən siyasi şantaj aləti kimi istifadə edir”.
Siyasi cəbhədə Kreml Samvel Karapetyanın “Güclü Ermənistan” partiyası, Robert Köçəryanın “Hayastan” bloku, Qaqik Tsarukyanın “Çiçəklənən Ermənistan” partiyası və Arman Tatoyanla əlaqəli siyasi layihələr də daxil olmaqla bir neçə Rusiyayönlü müxalifət fraksiyası arasında səsləri birləşdirməyə çalışır. Bu müxalifət qüvvələrini gücləndirmək və Paşinyan hökumətini nüfuzdan salmaq üçün Rusiya “Facebook”, “TikTok”, “İnstagram” və “YouTube”da genişmiqyaslı sosial media kampaniyasına başlayıb və gündəlik məzmunu 2,5-3 milyon baxış sayına çatdırmağı hədəfləyir. Xarici Kəşfiyyat Xidməti, həmçinin, Rusiya kəşfiyyat orqanlarının seçiciləri fiziki olaraq səfərbər etmək üçün yüksək xərcli bir əməliyyat üzərində işlədiyini açıqladı. Moskva, hazırda Rusiyada yaşayan 100.000-ə qədər erməni əsilli vətəndaşın sərhədi keçərək mövcud administrasiyaya qarşı səs verməsi üçün nəqliyyat təşkil edir. Xarici Kəşfiyyat Xidməti bu əməliyyatın potensial miqyasını 50 milyon dollar olaraq qiymətləndirir. Paşinyana qarşı əməliyyat, əsasən, Rusiyanın mövcud təbliğat infrastrukturuna əsaslanır və bu səyləri açıq şəkildə Kremlin dəstəklədiyi Sosial Dizayn Agentliyi və Rusiya Baş Qərargahının Baş Kəşfiyyat İdarəsi tərəfindən idarə olunan bədnam dezinformasiya şəbəkəsi olan “Fırtına-1516” ilə əlaqələndirir. Bu hibrid kampaniyanın bir hissəsi olaraq, Moskva “İrəvan1” adlı yeni bir media orqanı yaratmağa hazırlaşır. Xarici Kəşfiyyat Xidmətinin məlumatına görə, platforma Rusiyadakı erməni diasporunu hədəf alacaq, mövcud Ermənistan hökumətinə qarşı mənfi hisslər oyadacaq və eyni zamanda Rusiya ilə ittifaqın ölkənin yeganə gələcəyi olduğu iddiasını təbliğ edəcək.
Tahir TAĞIYEV
