Abutalıb Səmədov: “Bu görüş ehtimalı mümkündür, ancaq yaxın müddətdə bunun baş verəcəyini güman etmirəm”
Ukrayna prezidenti Volodimir Zelenski rusiyalı həmkarı Vladimir Putinə yazdığı məktubda bildirib ki, Ukrayna münaqişəyə son qoymağı təklif edir. Zelenski məktubunda Ukraynanın müharibəyə son qoyulması üçün danışıqlara hazır olduğunu bildirib və Putinə birbaşa görüş keçirməyi təklif edib. O, Avropa ölkələri və ABŞ-nin də danışıqlar prosesində iştirak etməsinin vacib olduğunu vurğulayıb.
Ukrayna lideri həmçinin bütün hərbi əsirlərin "hamının hamıya" prinsipi ilə dəyişdirilməsini təklif edib və bunun müharibənin başa çatmasına doğru mühüm addım ola biləcəyini qeyd edib.
Zelenski bildirib ki, əgər Rusiya müharibəni dayandırmasa, Ukrayna öz müstəqilliyi və mövcudluğu uğrunda mübarizəni davam etdirəcək.
Zelenski Putini təkbətək görüşə və müharibəyə son qoymağa çağırıb. Putin gələcək, gəlməyəcək, gəlsə ciddi bir nəticə olarmı?
“Alyans” SAM-ın sədri Abutalıb Səmədov baki-xeber.com-a bildirdi ki, Zelenski Putini görüşə dəvət edib, açıq məktub yazıb və mətbuat katibi Peskov məktubun hələ Putinə verilmədiyini deyib. “Təbiidir ki, bu ola bilməz. Putinə məktub çatdırılıb. Görünür, o da hələ düşünmək istədiyinə görə belə cavab verirlər ki, Putinin hələ məlumatı yoxdur. Ancaq jurnalistlərlə keçirdiyi son görüşdə Putin dolayısı ilə Zelenskaya cavab verib. Putin deyib ki, “Ankoriç formulu” əsasında saziş imzalamağa hazırdır. Yəni Ukrayna Donbasdan imtina etsə, görüşüb razılaşmağa gəlmək mümkündür. Putin onu da əlavə edib ki, sazişi Zelenski imzalaya bilməz. Çünki onun prezidentlik müddəti 2024-cü ildə bitib və sazişi legitim nümayəndə imzalamağı aldı. Putin görüş barədə razılığa gələcəkmi? Ən azından ümid var ki, bu barədə müzakirələr ola bilər. Baxmayaraq ki, Putin son bir ildə təqribən 1300 kvadrat kilometr Donbas ərazisini işğal etdiklərini deyib təkcə. Haradasa 4 min kvadrat kilometr ərazi qalıb ki, onu da işğal etməyi planlaşdırır. Ancaq hiss olunur ki, Rusiya da yorulub və Zelenski məktubunda bu məsələni də qeyd edib. “Rusiya yorulanda dəyişikliklər baş verir” deyib və Türkiyədə, İsveçrədə yaxud ərəb ölkələrinin birində görüşməyi təklif edib. Hər halda, Peskovun qeyri-ciddi cavabını nəzərə almasaq, o, Moskvada görüşməyi təklif edib. Ümid var ki, bu görüş ehtimalı mümkündür, ancaq yaxın müddətdə bunun baş verəcəyini güman etmirəm”. A.Səmədov vurğuladı ki, müəyyən məsələlər müzakirələr olmalıdır, müəyyən razılaşmalar barədə bir fikrə gəldikdən sonra, ən əsası da Donbasla bağlı razılaşmaya gələndən sonra bu görüş ola bilər. “Putin Donbas barədə razılıq olmadan güman edirəm ki, görüşməyəcək və bu məsələni müzakirə etmək istəməyəcək. Əgər görüşə razılıq versə, ciddi nəticənin olmasına ümid bəsləmək olar. Çünki danışıqlar, müzakirələr uzun müddətdir gedir. Hansı məsələlərdə problemlərin olduğu da məlumdur. Və əgər prezidentlər görüşməyə razılıq verirlərsə, ciddi nəticənin olacağına ümid bəsləmək olar. Ancaq çox güman ki, bu, qısa müddətdə baş verməyəcək”-deyə A.Səmədov vurğuladı.
İradə SARIYEVA
