Xəbər verildiyi kimi, Ermənistan Baş naziri Nikol Paşinyan Rusiya Prezidenti Vladimir Putinlə çox mühüm və qapalı telefon danışığı apardığını, həmçinin Kreml rəhbərinə xüsusi bir vəd verdiyini rəsmən elan edib. O, seçkiqabağı təşviqat kampaniyası zamanı xalqa müraciət edərək, iki ölkə rəhbəri arasında əldə olunmuş gizli sövdələşmənin detallarını bölüşüb.
“Rusiya Prezidenti ilə apardığım son telefon danışığı zamanı biz çox mühüm bir məsələdə tam razılığa gəldik. Mən ona söz verdim və razılaşdıq ki, Ermənistanda keçiriləcək seçkilər başa çatdıqdan dərhal sonra mən Rusiya Federasiyasına rəsmi səfər edəcəyəm. Biz Vladimir Putinlə üz-üzə görüşəcəyik və ikitərəfli münasibətlərdə yaranmış bütün cari problemləri, o cümlədən ən kritik sualları birdəfəlik həll edəcəyik”, - Paşinyan qeyd edib.
Belə çıxır ki, Putin də artıq Nikol Paşinyanın rəhbəri olduğu partiyanın qələbəsinə əminlik hasil edib və bununla barışıb?
Siyasi şərhçi Aydın Quliyev Musavat.com-a bildirib ki, Paşinyan Ermənistanın lideri olaraq artıq xarici siyasətdə qəti seçimini edib: “Paşinyan da, Ermənistanın rəhbərliyindəki digər şəxslər də KTMT və Avrasiya İqtisadi Birliyi ilə bağlı mövqelərini ortaya qoyublar. Avropa İttifaqına inteqrasiya istiqamətində qanun da qəbul ediblər. Ermənistanın Avropa İttifaqına inteqrasiyası ilə bağlı Vladimir Putinin də aydın mövqeyi var. Putin hətta Ermənistanın avrointeqrasiyasını Ukrayna ilə müqayisə edib. Ona görə də son telefon danışığında Paşinyanın dediyi sözlər, Putinin ona ehtimal olunan verdiyi cavablar siyasi gedişlərə, manevrə daha çox oxşayır. Aydın məsələdir ki, Paşinyan bu telefon danışığını ictimailəşdirməkdə xüsusi maraq güdür. Paşinyanın bu telefon danışığını aparmaqda və vəd verməkdə məqsədi Rusiya liderini sakitləşdirmək, seçki ərəfəsində və seçki günü onu daha aqressiv hərəkətlərdən çəkindirməkdir”.
Ekspertin sözlərinə görə, seçkidə və sonrakı günlərdə Putinin qəzəbinə tuş gəlməmək üçün Paşinyan belə bir gediş edib: “Paşinyan bu telefon danışığını aparmaq və danışıqlar barədə açıqlama verməklə Ermənistan seçicilərini də sakitləşdirməyə çalışdı ki, seçkinin nəticələrinə görə heç bir problem olmayacaq, Rusiya prezidenti ilə dialoqdadır və problemlər həllini tapacaq. Bununla göstərmək istəyir ki, artıq Putin də onun hakimiyyətdə qalmasına qarşı deyil və seçkidən sonra onunla işləmək niyyətindədir. Revanşist, Rusiyayönlü qüvvələrə seçkiyə sayılı günlər qalmış “Putinlə anlaşdım, Putin mənim hakimiyyətdə qalmağımı qəbul edir” mesajını vermiş oldu. Paşinyan bu telefon danışığındakı müzakirəni publikaya çatdırmaqla Rusiyayönlü qüvvələrə mesaj verdi ki, “siz özünüzü nə qədər yandırsanız da, mən sizin ağsaqqalınızla razılaşmışam”. Bu mesaj təbii ki, həmin qüvvələrin elektoratında məyusluq və seçkiyə inamsız, həvəssiz getmə əhvalı yaradacaq”.
A.Quliyevin fikrincə, Putinin özünü Paşinyanın vədlərinə inanırmış kimi göstərməkdə məqsədi var: “Putin Paşinyanın söylədiklərinə və seçdiyi taktikaya hörmətlə yanaşdığını nümayiş etdirir. Putin Paşinyanın seçkidə daha çox səs qazanmaq ehtimalının yüksək olduğunu görür. Reallığı indiki vəziyyətdə qiymətləndirir. Lakin o demək deyil ki, Paşinyan baş nazir seçildikdən sonra Putin ondan əl çəkəcək. Putin heç vaxt Ermənistanın Qərbə, Avropa İttifaqına inteqrasiya xəttini qəbul etməyəcək. Paşinyanın Ermənistanı bu xəttə qaldıqca Rusiyanın təzyiqləri davam edəcək”.
Etibar Seyidağa
