Ermənistanın müdafiə naziri Suren Papikyan qarşıdan gələn parlament seçkilərində səs vermək üçün Rusiyadan gələn Ermənistan vətəndaşlarının hərbi təlimlərə göndərilməsi ilə bağlı xəbərlərə münasibət bildirib. Jurnalistlərlə söhbətində o bildirib ki, Rusiyadan gələn Ermənistan vətəndaşı hərbi xidmətə cəlb olunursa, deməli, onun vətən qarşısında borcu var. Jurnalistlərdən birinin bunun yalnız Rusiyadan gələnlərə aid olub-olmadığı barədə sualına Papikyan cavab verib ki, bu təkcə Rusiyadan deyil, həm də Fransa, ABŞ və digər ölkələrdən gələnlərə aiddir.
Daha əvvəl Ermənistan baş nazirinin aparat rəhbərinin müavini Taron Çaxoyan bildirmişdi ki, Rusiyadan rüşvət alaraq ölkəyə gələn Ermənistan vətəndaşları 25 günlük təlim düşərgəsinə çağırılacaq və imtina edənlər cinayət məsuliyyətinə cəlb olunacaq. Sosial mediada artıq hərbi polisin hava limanında və quruda nəzarət-buraxılış məntəqələrində növbədə olduğu və Ermənistan pasportu olan çağırış yaşına çatmış kişilərə çağırış vərəqələri payladığı barədə məlumatlar yayılıb. “Parlaq Ermənistan” partiyasının lideri Edmon Marukyan xaricdən gələn Ermənistan vətəndaşlarının ehtiyat təliminə göndərilməsi barədə məlumatlardan sonra hakimiyyətin hərəkətlərini pisləyib. Onun sözlərinə görə, bu cür addımlar ordunu nüfuzdan salır və son paradın PR effektini tamamilə aradan qaldırır: “Baş nazirin aparat rəhbərinin müavini Ermənistana səs vermək üçün gələn vətəndaşların hərbi təlimə göndərilməli olduğunu bildirəndə məlum olur ki, insanlar səs vermək hüququndan istifadə edə bilmirlər. Bəlkə də onlar sadəcə turistdirlər? İndi neçə təyyarə gəlir? Həmişə eyni sayda təyyarə gəlib. Nə demək istəyirsiniz? Ordu insanları cəzalandırmaq üçün bir yerdir?”. Siyasətçi Müdafiə nazirinin hava limanında növbətçi olan hərbi polis zabitlərinin əməliyyat işləri ilə məşğul olması və hərbi xidmətdən yayındığı iddia edilən şəxslərin müəyyən edilməsi ilə bağlı iddialarını gülünc adlandırıb.
Tahir TAĞIYEV
