Bəhruz Quliyev: “...Azərbaycanın illərdir səsləndirdiyi mövqenin gecikmiş etirafıdır”
ATƏT-in Minsk Qrupu həmsədr ölkələr ABŞ, Rusiya və Fransanın Qarabağ münaqişəsinin həllinə imkan verməməsi üçün yaradılıb. Hazırda tətildə olan və hakim Vətəndaş Müqaviləsi Partiyasının proporsional namizədlər siyahısına rəhbərlik edən Ermənistanın baş naziri Nikol Paşinyan bunu İctimai Televiziyada seçkiqabağı debat zamanı bildirib.
O bunu həll olunmamış münaqişənin müxtəlif vaxtlarda bu ölkələrin maraqlarına xidmət etməsi ilə əlaqələndirib.
Əslində Minsk Qrupunun belə məkrli məqsədlə yaradıldığını Azərbaycan Prezidenti İlham Əliyev çoxdan deyirdi. Müharibə bitəndən Prezident Əliyev bunu deyir. Hətta o vaxtdan da deyirdi ki, Minsk Qrupunu buraxmaq lazımdır və bunun üçün Ermənistanla birgə bəyanat imzalanmalıdır. Amma Ermənistan bu fikri yaxına buraxmırdılar və “Minsk Qrupu”nun işi var, münaqişə hələ həll olunmayıb, Minsk Qrupunu buraxmaq olmaz, münaqişə həll olunandan sonra buraxacağıq” və sair deyirdilər. Amma Azərbaycan israr etdi və Ermənistanı buna razı saldı. Vaşinqtonda ABŞ prezidenti Trampın yanında görüş keçiriləndə artıq Ermənistan bunu qəbul etdi. Yəni bu Azərbaycanın dediyi məsələdir və Paşinyan bunu da qəbul etdi.
“Nikol Paşinyanın ATƏT-in Minsk Qrupunun fəaliyyətinə dair son açıqlaması əslində Azərbaycanın illərdir səsləndirdiyi mövqenin gecikmiş etirafıdır. Azərbaycan Prezidenti İlham Əliyev dəfələrlə bəyan etmişdi ki, Minsk Qrupu 30 ilə yaxın müddətdə münaqişənin həllinə deyil, status-kvonun qorunmasına xidmət edib. Əgər bu institut həqiqətən problemi həll etmək istəyirdisə, niyə üç onillik ərzində işğal faktına son qoyulmadı, BMT qətnamələrinin icrası təmin edilmədi?
Müharibədən sonra Prezident İlham Əliyev açıq şəkildə bildirdi ki, Qarabağ münaqişəsi artıq tarixə qovuşub və Minsk Qrupunun fəaliyyəti üçün heç bir əsas qalmayıb".
Bu fikirləri baki-xeber.com-a “Səs” qəzetinin baş redaktoru, siyasi ekspert Bəhruz Quliyev deyib.
Ekspert bildirib ki, Azərbaycan bununla bağlı Ermənistanın birgə müraciət etməsini və qurumun rəsmən ləğv olunmasını təklif edirdi. Lakin uzun müddət məhz Ermənistan bu məsələdən yayınır, “münaqişə tam həll olunmayıb” arqumenti ilə Minsk Qrupunu siyasi gündəmdə saxlamağa çalışırdı.
"Hesab edirəm ki, bu gün Paşinyanın səsləndirdiyi fikirlər göstərir ki, Ermənistan rəhbərliyi də artıq reallığı qəbul etməyə məcburdur. Bu həm də seçki öncəsi Paşinyanın Ermənistanın itkilərinin səbəbini açması və məsuliyyəti Minsk Qrupunun üzərinə atmasıdır. Sözsüz ki, əgər Minsk Qrupu problemi həll etmək istəsəydi Ermənistan bu vəziyyətə düşməzdi. Vaxtilə Azərbaycanın irəli sürdüyü və israrla müdafiə etdiyi mövqe indi Ermənistan tərəfindən də etiraf edilir. Bu, bir daha təsdiq edir ki, regionda yeni siyasi reallıqları yaradan tərəf Azərbaycan olub və beynəlxalq vasitəçilik mexanizmlərinin səmərəsizliyi barədə səsləndirilən fikirlər zaman keçdikcə öz təsdiqini tapıb.
Əslində Paşinyanın bu açıqlaması təkcə Minsk Qrupunun fəaliyyətinə verilən qiymət deyil, həm də Prezident İlham Əliyevin illərdir irəli sürdüyü siyasi tezislərin haqlı olduğunun növbəti təsdiqidir."-deyə, B.Quliyev əlavə edib.
İradə SARIYEVA
