Əli Orucov: "Slovakiya hüquq-mühafizə orqanları baş nazir Robert Fiko barəsində dövlətə xəyanət şübhəsi ilə cinayət işi açıb"
Slovakiya Baş naziri Robert Fiko Ermənistanda keçirilən Avropa Siyasi Şurasının sammitində jurnalistlərin Moskvaya səfərinə dair sualına kəskin reaksiya verib. O bildirib ki, mayın 9-da Moskvaya gedəcək, Qırmızı Ordunun Naməlum Əsgər məzarına gül qoyacaq və Putinlə qısa görüş keçirəcək. Bunun səbəbini Slovakiyanın azad edilməsi zamanı həlak olan 70 min sovet əsgərinin xatirəsini yad etmək istəyi ilə izah edən Fiko vurğulayıb ki, paradda iştirak etməyəcək.
Çexiya isə Fikonun Rusiyaya gedən təyyarəsinin öz hava məkanından keçməsinə icazə verəcəyini açıqlayıb. Ötən il Avropanın hava məkanı Fikoya bağlı idi.
Sual yaranır: Fiko paradda iştirak etməyəcəksə, niyə səfərini məhz Avropanın qələbə günü kimi qəbul etmədiyi 9 may tarixinə salıb? Fikonun bu addımı nə dərəcədə məqbul və düşünülmüş sayıla bilər?
Məsələyə münasibət bildirən politoloq Əli Orucov "Bakı-Xəbər" nəşrinə açıqlamasında bildirib ki, Avropa Birliyində Rusiyameylli siyasət yürüdən əsas iki-üç siyasi lider xüsusilə fərqlənirdi: "Bunlardan biri Macarıstanın baş naziri V.Orban, digəri isə Slovakiyanın baş naziri R.Fikodur. Bu tip liderlər Moskva ilə əlaqələrinin davam etdirilməsinə həm də ona görə üstünlük verirlər ki, bu və ya digər şəkildə, xüsusən də enerji asılılıqları var. Slovakiya baş naziri Qərbin Putinlə dil tapmasının və onunla razılaşmalara gəlinməsinin tərəfdarıdır. Fiko Ukrayna məsələsinə də fərqli yanaşır. Onun enerji təhlükəsizliyi sahəsindəki fəaliyyəti, xüsusilə Ukraynaya fövqəladə elektrik enerjisi təchizatının dayandırılması ilə bağlı qərarları ölkəsində və Qərbdə etirazlar doğurdu. Slovakiya hüquq-mühafizə orqanları baş nazir Robert Fiko barəsində dövlətə xəyanət şübhəsi ilə cinayət işi açıb. Onun 9 May hərbi paradında iştirak etməməsi mümkün artacaq təzyiq və etirazlardan yan keçmək cəhdidir. Slovakiya baş naziri bir qədər ehtiyatlı davranmaq məcburiyyətindədir. Putinlə qısa görüşmək və Qırmızı Ordunun Naməlum Əsgər abidəsini ziyarət etmək Kremlə əlaqələrinin qopmadığının nümayişi kimi də izah oluna bilər. Bu heç də 70 min sovet əsgərinin xatirəsini yad etmək istəyindən qaynaqlanmır. Fikonun ziyarət edəcəyi həmin Qırmızı Ordu 1968-ci ildə Çexoslovakiyaya hərbi müdaxiləsi zamanı yüzlərlə günahsız mülki şəxsin ölümünə və yaralanmasına, həmçinin repressiyalara və həbslərə səbəb olmuşdu. Məncə, bunların üzərindən keçərək təcavüzkar bir dövlətin əsgəri və prezidenti ilə görüşmək daha çox şəxsi maraqların təzahürüdür".
Dəniz NƏSİRLİ
