Samir Hümbətov: “Meloyanın açıqlaması həm təəccüb doğurur, həm də sanki onun siyasətdə naşı olduğunu göstərir”
Konstitusiyaçı və "Bizim Yolumuz" hərəkatının üzvü Goar Meloyan özünün Facebook səhifəsində yazıb ki, mediada yayılan məlumatlara görə, ABŞ və Azərbaycan nümayəndələri TRIPP layihəsinin inkişaf perspektivlərini müzakirə ediblər. “Bu o deməkdir ki, Ermənistanın iştirakı olmadan iki başqa ölkə tamamilə Ermənistan Respublikasının suveren ərazisindən keçən marşrutun taleyini müzakirə edir”-deyə Meloyan yazıb.
Qeyd olunur ki, 8 avqustdan bəri Ermənistan hökuməti TRIPP marşrutunun yalnız Ermənistan-Amerika əməkdaşlığı məsələsi olduğunu iddia edir. “Lakin faktlar bunun əksini göstərir: Azərbaycan Ermənistanın iştirakı olmadan ABŞ-la Ermənistanın suveren ərazisindən keçən marşrutu müzakirə edir”-deyə Meloyan iddia edib.
O, vurğulayıb ki, bu Ermənistan Respublikasının suverenliyinə guya birbaşa xələl gətirir.
“TRIPP də daxil olmaqla, Ermənistandan keçən istənilən yolla bağlı bütün məsələlər yalnız Ermənistan Respublikasının iştirakı ilə müzakirə və razılaşdırıla bilər" deyib Meloyan.
Meloyan niyə belə deyir?
Beynəlxalq Münasibətlər və Diplomatiya Araşdırmaları Mərkəzinin rəhbəri, politoloq Samir Hümbətov baki-xeber.com-a “Meloyanın açıqlaması həm təəccüb doğurur, həm də sanki onun siyasətdə naşı olduğunu göstərir. Ortada 8 avqust anlaşması var. Bu anlaşmada da tərəflərin üzərinə düşən öhtəliklər qeyd olunub. Bu işin həyata keçməsi üçün tərəflər öz üzərlərinə düşən öhtəliyi yerinə yetirməlidirlər”-deyə bildirdi.
“Bu ölkənin siyasi dairələrində bu qədərmi məlumatsızlıq var ki, onlar məsələnin mahiyyətini anlaya bilmirlər”
S.Hümbətovun sözlərinə görə, 8 avqust Vaşinqton anlaşmasında tərəflərin öz öhtəliklərini yerinə yetirməli olması ilə bağlı tələb var. “Təbii ki, ABŞ TRIPP marşrutunun, dəhlizin açılmasının tərəfdarıdır. Bunun üçün səhv etmirəmsə, artıq 145 milyon dollar vəsaitin ayrılması ilə bağlı fikirlər səslənib. Azərbaycanın ABŞ-la danışıqlarının əsas predmeti TRIPP məsələsi deyil, bütövlükdə Azərbaycan-ABŞ münasibətlərinin necə qurulmasına həsr olunub. İkincisi, TRIPP marşurutu məsələsinə gəldikdə həmin hissə Ermənistan ərazisinə düşür və bu o deməkdir ki, bu məsələni ABŞ və Ermənistan həll edir. Ona görə də mənə çox təəccüblü gəlir, Ermənistanın xarici siyasəti ilə məşğul olanlarda, bu ölkənin siyasi dairələrində bu qədərmi məlumatsızlıq var ki, onlar məsələnin mahiyyətini anlaya bilmirlər. Yəni anlaya bilmirlər ki, burada məsələ Azərbaycan və ABŞ deyil. Tutalım, Azərbaycan və ABŞ arasında danışıq Naxçıvan ərazisindən, yəni Azərbaycanın öz ərazisindən keçən hissə ilə bağlı ola bilər.
Söhbət Ermənistan ərazisindən keçən hissədən gedirsə artıq burada fərqli vəziyyət var. Bu Ermənistan-ABŞ münasibətlərinə aiddir. Böyük ehtimal ki, bu hardasa bir qədər təxribata da oxşaya bilər. Amma hər vəziyyətdə Azərbaycan ABŞ-la apardığı danışıqlarda təbii ki, müstəqildir. Onun nə Ermənistana, nə də digər ölkəyə aidiyyəti var.
Ortada bizim ABŞ-la strateji əməkdaşlıq müqaviləsini bağlamaqla bağlı İşçi Qrupunun fəaliyyəti, 907-ci düzəlişin ləğvi və başqa bir sıra məsələlər var ki, biz onları ABŞ-la həll etməyə çalışırıq. Bunun Ermənistana aidiyyəti yoxdur ki...Bu cür açıqlama təbii ki, tərəflər arasında bir az da etimadsızlığın olduğunun göstəricisidir. Görünür ki, Ermənistan etimad göstərmək istəmir, bu da heç də yaxşı hal deyil”-deyə S.Hümbətov əlavə etdi.
İradə SARIYEVA
