Akif Nağı: “...Rusiyanın belə bir cəhd etməsi mümkündür”
2025-ci ilin oktyabrında Cinayət Məcəlləsinin dövlətə xəyanət, dövlət hakimiyyətini ələ keçirməyə yönələn əməllər və cinayət yolu ilə əldə edilmiş əmlakı leqallaşdırma maddələri ilə ittiham olunan və Səbail Rayon Məhkəməsinin barəsində 4 ay müddətinə ev həbsi (ev dustaqlığı) qətimkan tədbiri seçdiyi Prezident Administrasiyasının keçmiş rəhbəri Ramiz Mehdiyevin Rusiya ilə əlaqələri üzə çıxıb.
Onun Rusiyanın dəstəyi ilə Azərbaycanda dövlət çevrilişi etməklə bağlı planı ifşa olunub. Hazırda “Ramiz Mehdiyev işi” üzrə hüquqi müstəvidə proses gedir. Məhkəmə araşdırmaları nəticəsində ömrü boyu Rusiyaya işləyən bu adamın radikal müxalifətlə də sıx əlaqəsi ifşa olundu...
Rusiya Ramiz Mehdiyevi fiziki olaraq ortadan götürməkdə maraqlı ola bilərmi?
O prinsiplə ki, Ramiz Mehdiyev məhkəmədə bu ölkənin xüsusi xidmət orqanları ilə çoxillik əməkdaşlığı barədə Rusiya üçün xoş olmayan mətləbləri aça bilər. Bu baxımdan, Rusiya onu aradan götürmək istəyə bilərmi? Belə ehtimal mümkün görünürmü?
“Ola bilsin ki, Rusiya Ramiz Mehdiyevlə bağlı da həmin təcrübəyə əl atsın”
Azad Vətən Partiyasının sədri Akif Nağı “Bakı-Xəbər”ə bildirdi ki, dünyada dövlətlərin bir-birinə qarşı müəyyən adamları aradan götürməsi, məhdudlaşdırması praktikası var. “Bu ən böyük dövlətlərdə olur. ABŞ-da da belə təcrübə var. Onun istifadə etdiyi dövlət xadimi, baş nazir, prezident, terrorçu qrupun rəhbəri olsun, onları istifadə etdikdən sonra aradan götürür. Bu hallar ya təyyarə qəzası, ya da başqa hallarda həyata keçirilə bilir. Rusiyada da bundan zaman-zaman geniş şəkildə istifadə olunur. Rusiyanın daxilində müəyyən adamların qəzaya salınması, başqa üsullarla aradan götürülməsi, öldürülməsi kimi hallar mövcuddur. Bu gün də Rusiya tərəfindən həyata keçirilən, amma hələ üstü açılmayan hadisələr az deyil. Yəni müxtəlif yerlərdə kimlərisə zərərsizləşdirmək, aradan götürmək üçün müəyyən terror hərəkətlərinə yol verirlər. Yəni bu, Rusiyanın siyasətində, təcrübəsində var. Ola bilsin ki, Rusiya Ramiz Mehdiyevlə bağlı da həmin təcrübəyə əl atsın. Bu mümkündür, amma dəqiq söz demək çətindir. Əgər əlləri çatsa, imkanları olsa nəsə edə bilərlər. Ona görə də Ramiz Mehdiyevin ev dustaqlığında saxlanılmasının bəlkə də bir səbəbi ondan ibarətdir ki, onu ev dustaqlığında nəzarətdə saxlamaq daha asandır, nəinki həbsxanada. Çünki həbsxanada müxtəlif xətlər, müxtəlif kanallar, yollar var. Bu səbəbdən orada nəyisə nəzarətdə saxlamaq adətən çətin olur. Amma ev dustaqlığında tam təcrid olunub, nəzarətdədir, ailə üzvləri, yanına gedib-gələnlər də məlumdur. Ona görə də, bəlkə o məntiq də var ki, kimlərsə onu vaxtından qabaq aradan götürməsinlər, yaxud başqa addım atmasınlar. Mümkündür. Məlumdur ki, onun Rusiya ilə əməkdaşlığı olub, istintaq gedir, müəyyən məsələlər ortaya çıxır.
Ermənistanı misal çəkmək istəyirəm, vaxtilə bu ölkənin əli ilə parlamentə girib parlamentariləri gülləbaran edib spikeri güllələyib öldürdülər. Yəni Rusiyanın belə bir təcrübəsi var.
Ona görə də, burada Mehdiyev nə deyə, Rusiya ilə bağlı nələri vurğulaya, bu ölkəyə qarşı hansı məsələləri deyə bilər, bunların dərəcəsinə uyğun olaraq Rusiyanın belə bir cəhd etməsi mümkündür”.
A.Nağının fikrincə, R.Mehdiyevin evi nəzarətdədir və ciddi şəkildə qorunur, ona həmlə olunması, hanısa formada xəstələndirilsin və sair kimi məsələlərlə bağlı imkanlar kifayət qədər məhdudlaşdırılıb. “Amma ola bilər ki, kənardan öldürücü atəş açmaqla da ona qarşı addım atılsın. Yəni dünyada raketlərlə, yaxud başqa qurğularla uzaqdan atəş açmaq təcrübəsi var. Buna da əl atma cəhdləri ehtimal oluna bilər. Hesab edirəm ki, yəqin Azərbaycan hüquq-mühafizə orqanları bu məsələni nəzərə alırlar. O adam Azərbaycana qarşı belə hərəkətlər törədib, ona qarşı çox ciddi ittihamlar var, bu, dövlətə xəyanət ittihamıdır. Çox düz ittihamlardır. Bu baxımdan, əslində o adam qorunmalı deyil. Amma müəyyən məsələlərin ortaya çıxması və o öz layiqli cəzasını alması üçün məhkəməyə qədər onu qoruyub saxlamaq lazımdır”-deyə A.Nağı vurğuladı.
İradə SARIYEVA
