Qulamhüseyn Əlibəyli: “Kreml siyasətini dəyişməsə, növbəti təcridlə üzləşəcək”
Dekabrın 3-də BMT Rusiyadan "zorla aparılan, yaxud deportasiya edilən ukraynalı uşaqların dərhal, təhlükəsiz və qeyd-şərtsiz" qaytarılması tələbi ilə qətnamə qəbul edib.
ABŞ daxil 91 ölkə qətnaməni dəstəkləyib. Rusiya və 11 ölkə qətnamənin əleyhinə səs verib, 57 ölkə bitərəf qalıb. Azərbaycan səsvermədə iştirak etməyib. Qonşulardan Ermənistan, Türkiyə də eyni cür davranıb. Gürcüstan qətnamənin lehinə, İran əleyhinə səs verib. Rusiya BMT Baş Assambleyası üzvlərini qətnaməyə qarşı çıxmağa çağırmışdı. Qətnamə layihəsini Ukrayna, Kanada və Avropa İttifaqı hazırlayıb.
Burada diqqəti çəkən məqam odur ki, vur-tut 11 ölkə Rusiya kimi ölkəni dəstəkləyib. 57 ölkə bitərəf qalsa da, əslində dolayı da olsa bu, həmin ölkələrin Rusiyaya qarşı olmasının göstəricisidir. Bu, bir daha Rusiyanın beynəlxalq aləmdə nə qədər təkləndiyini ortaya qoyur.
“Bu kimi məsələlər beynəlxalq aləmdə Rusiyanın onsuz da aşağı olan nüfuzunu daha da aşağı salır”
Sözügedən məsələ ilə bağlı fikirlərini “Bakı-Xəbər”lə bölüşən sabiq millət vəkili, hüquqşünas Qulamhüseyn Əlibəyli hesab edir ki, ümumilikdə, Rusiya Ukraynaya təcavüz etməklə, ərazilərini işğal etməklə özünün beynəlxalq təcridinin əsasını qoydu: “Bu, hardasa 4 ildir davam edir. Düzdür, son dövrlərdə Trampın Rusiya ilə münasibətləri bərpa etməsi Putini müəyyən qədər təcriddən çıxarsa da, müxtəlif məsələlərə görə həmin təcrid siyasəti davam edir. Onlardan biri də işğal olunmuş ərazilərdə Rusiyanın törətdiyi cinayətlərdir. Ukrayna mülki əhalisinin bilərəkdən hədəf alınması və hərbi əsirlərin qətlə yetirilməsi ilə bağlıdır. O cümlədən, Rusiya 20 minə qədər uşağı Ukraynadan oğurlayıb. Söhbət işğal olunmuş Ukrayna ərazilərində Rusiyanın törətdiyi insanlıq əleyhinə cinayətlərdən gedir. Bu kimi məsələlər beynəlxalq aləmdə onsuz da Rusiyanın aşağı olan nüfuzunu daha da aşağı salır. Eyni zamanda Rusiyanın təklənmiş olduğunu göstərir. Ukraynadan uşaqların zorla aparılması məsələsi neçə müddətdir beynəlxalq aləmin diqqətini cəlb edir. Çünki həmin uşaqların zorlanması, onlarla amansız rəftar olunması, onların işgəncələrə məruz qalması faktları var. Özü də belə faktlar az deyil. Bununla yanaşı, sözügedən faktlar BMT səviyyəsində ümumiləşdirilib. Həmçinin, müəyyən qətnamə layihəsi təklif olunub. Rusiya həmin qətnamənin əleyhinə çıxsa da, digər dövlətləri bunun əleyhinə səs verməyə çağırsa da, cəmi 11 dövlət bu ölkəni müdafiə edib. Ancaq 91 dövlət qətnamənin lehinə səs verməklə, 57 dövlət bitərəf qalmaqla, digərləri səsvermədə iştirak etməməklə Moskvanın çağırışını müdafiə etməyiblər. Bu sübut edir ki, Rusiya beynəlxalq aləmdə təklənir. Kreml siyasətini dəyişməsə, növbəti təcridlə üzləşəcək”.
Vidadi ORDAHALLI
