Akif Nağı: “Söhbət erməni kilsəsindən və müxalif siyasi qüvvələrdən gedir ki, onların bir hissəsi həbs olunub”
Ermənistanın baş naziri Nikol Paşinyan uzun müddətdir ki, ölkədəki casus şəbəkəsinə qarşı mübarizə aparır.
“Ermənistanda təsir agentləri şəbəkələri ifşa olunub və onların maliyyə mənbələri zərərsizləşdirilib”. Armenpress-in məlumatına görə, N.Paşinyan bunu parlamentdə hökumət saatı zamanı "Mülki Müqavilə" fraksiyasının deputatı Lusine Badalyanın bu şəbəkələrin yaxın gələcəkdə ifşa olunacağı günün gəlib-gəlməyəcəyi ilə bağlı sualına cavab olaraq bildirib. "Əgər təsir agentlərinin şəbəkələrindən danışırsınızsa, mənim fikrimcə, bu şəbəkələr, o cümlədən məhkəmələrdə başlanan və baxılmaqda olan cinayət işləri də tam ifşa olunub”, - Paşinyan deyib. Paşinyan ritorik bir sual verib: niyə daxili siyasi həyatda fırtınalar olmur? Sonra əlavə edib ki, yəni fırtınalar var, amma bir qəhvə fincanında, çünki bu təsir agentləri, maliyyə mənbələri, hibrid alətlər zərərsizləşdirilib.
Paşinyan hansı casusların ifşasından danışır?
“Paşinyanın bu bəyanatı həm Rusiyaya, həm də Rusiyanın Ermənistanın daxilindəki şəbəkəsinə bir mesajdır ki...”
Azad Vətən Partiyasının sədri Akif Nağı “Bakı-Xəbər”ə bildirdi ki, Ermənistan hökuməti həm daxildəki müxalif qüvvələrə, həm də xarici casuslara qarşı mübarizə aparır: “Xaricdən Ermənistana ciddi təsirlər var. Ermənistana əsas təsir edən Rusiyadır və Rusiya çalışır ki, Ermənistanda prosesləri öz istəklərinə uyğun məcraya yönəltsin. Bu baxımdan, həm Rusiyada yaşayan ermənilər tərəfindən, həm də xaricdən Ermənistana müəyyən təzyiqlər var. Həm təzyiq, təsir göstərirlər, həm də arada xoş münasibət göstərib məqsədlərinə nail olmaq istəyirlər, mövqelərini Ermənistanda gücləndirməyə çalışırlar. Paşinyan hökuməti daha çox daxildəki təsir agentlərini nəzərdə tutur, söhbət onların ifşasından gedir. Xarici təsir agenti şəbəkəsi dünyada geniş yayılmış bir formadır. Hər ölkə marağı olan başqa bir ölkədə özünün təsir agentlərini yaratmağa çalışır. Deputatların, nazirlərin, müxtəlif dövlət strukturlarında çalışanların, müxalifətin içərisində bu təsir agentləri ola bilər. Həmin dövlətlər o casus şəbəkəsini maliyyələşdirir, arxasında dayanır və onların vasitəsilə ölkədə müəyyən ictimai rəy formalaşdırmağa çalışırlar. Yəni birinci növbədə təsir agentləri fəaliyyət göstərir, casusluq etdikləri hansısa bir ölkənin maraqlarına uyğun ictimai rəy formalaşdırırlar. Tutalım, agentlər vasitəsilə parlamentdə istədikləri qərarların qəbuluna nail olurlar. Eyni zamanda müxalifətdə olan qüvvələrdən də radikal addımların atılması, ölkədə pozuculuq fəaliyyətinin həyata keçirilməsi, sərt çıxışlar etmək üçün istifadə edirlər. Paşinyan da vurğulayıb ki, ölkənin daxilində fırtına yoxdur, onlar heç nə edə bilmirlər. Çünki Paşinyan hakimiyyətə gələn gündən ən müxtəlif formada ölkənin daxilində Rusiyapərəst qüvvələr, müxalifət aksiyalar, yürüşlər keçirirdi. Onların içində həm keçmişdə hakimiyyətdə olan qüvvələr var, həm də hakimiyyət uğrunda mübarizə aparmaq üçün yeni qüvvələr formalaşdırılıb. Oradakı xətlərdən biri erməni kilsəsi ilə bağlıdır. Bu zaman ərzində Paşinyanın apardığı uyğun siyasət nəticəsində bütün istiqamətlərdə onların təsir imkanları zəifləyib. Ola bilsin ki, konservləşdirilmiş qüvvələr də var, xarici himayədarları onları hələ işə salmayıblar”.
A.Nağının sözlərinə görə, Paşinyan burada daha çox Rusiyanı nəzərdə tutur, çünki Rusiya qədər Ermənistana təsir etmək istəyən dövlət yoxdur. A.Nağının fikrincə, Azərbaycan, Türkiyə, Avropa dövlətləri Ermənistanda hansısa proseslərin qeyri-stabil vəziyyətə gətirilməsi üçün maraqlı deyillər, burada maraqlı tərəf Rusiyadır. “Rusiya öz hədəfinə çatmaq üçün kilsə ilə bağlı uyğun siyasət yeridirdi. Baxmayaraq ki, kilsə hələ də hökumətə müavimət göstərir, Rusiyanın dəstəyi ilə müəyyən qüvvələri öz ətrafında cəmləşdirib ortaya Paşinyana qarşı hansısa mövqe qoymağa çalışır. Son günlərdə onların regional dini rəhbərləri, din xətti ilə müəyyən mövqe tutan mərkəzlər, müəyyən şəxslər birlikdə Paşinyan hakimiyyətinə etirazla bağlı bir müraciət də qəbul etdilər. Əslində isə Rusiya tərəfindən tam idarə olunan II Qaregini müdafiə etməyə çalışırdılar. Amma alınmır. Rusiya artıq Ermənistanda yeni təsir agentləri yarada bilmir. Olanlar da artıq təsir imkanlarını itirib.
Söhbət erməni kilsəsindən və müxalif siyasi qüvvələrdən gedir ki, onların bir hissəsi həbs olunub, bir qisminin fəaliyyət dairələri məhdudlaşdırılıb, nə ictimai rəyə, nə parlamentə təsir göstərə bilirlər. Təsir agentləri nə qədər çalışsalar da, tapşırıqları yerinə yetirə bilmir. Paşinyan onlara qarşı mübarizəsini davam etdirəcəyini göstərir. Paşinyanın bu bəyanatı həm Rusiyaya, həm də Rusiyanın Ermənistanın daxilindəki şəbəkəsinə bir mesajdır ki, biz qalib mövqedəyik, sizin bütün cəhdlərinizin qarşısını alırıq, geri çəkilməyəcəyik. Məqsəd də odur ki, onların Ermənistandakı fəaliyyəti tam olaraq məhdudlaşdırılsın”-deyə A.Nağı bildirdi.
İradə SARIYEVA
